Carta ta stojol te Hebreoetik 5:1-14
5 Jich yuʼun, machʼauk-a te ya yichʼ tsael yuʼun ya x-och ta mukʼul sacerdote ya yichʼ yaʼtel ta spasbeyel yaʼtel te Dios, jaʼ ya skoltay te ants winiketik ta yakʼel majtaniletik sok ta yakʼel chikʼbil majtanil yuʼun stojel mulil.
2 Ya snaʼbey yoʼbolil sba te machʼatik ya sta smulik ta skaj te ma snaʼike, melel jaʼnix jich ya sta smulik-euk,
3 jaʼ yuʼun ya yakʼ majtaniletik ta swenta te smulik-euke, jich te bin-utʼil ya spas ta stojol te lume.
4 Maʼyuk machʼa te stukel ya yakʼ sba ta mukʼul sacerdote, jaʼnax teme jaʼ la yichʼ ikʼel yuʼun te Diose, jich te bin-utʼil ikʼot te Aarón.
5 Jaʼnix jich-euk, te Cristo maba la sle yutsilal stukel yuʼun ya yotses sba ta mukʼul sacerdote, jaʼ akʼbot yutsilal yuʼun te machʼa jich albote: «Jaʼat jnichʼanat; ta ora ini kʼoonix ta atat».
6 Ay yan te jich tsʼibaybil jilele: «Jaʼat sacerdoteat ta sbajtelkʼinal jich te bin-utʼil te Melquisedec».
7 Te kʼalal kuxin ta balumilal te Cristoe, tulan awun sok la yokʼetay sba ta skʼanbeyel wokol te machʼa ya xjuʼ ya xkoltayot lokʼel yuʼun ta lajele, la yichʼ aʼiybeyel skʼop ta swenta te xiʼoj* te Diose.
8 Manchukme jaʼ sNichʼan te Diose, la snop schʼuunel mantal ta swenta te wokoliletik kʼax ta stojole.
9 Te kʼalal tsʼakal yichʼojix lekubtesel-ae, jaʼ ta stojol te ya xjuʼ ya staik skuxlejalik sbajtelkʼinal te machʼatik ya xchʼuunbot te smantale,
10 melel jaʼ akʼbot yichʼ yaʼtel yuʼun te Dios ta mukʼul sacerdote jich te bin-utʼil te Melquisedec.
11 Ay bayal te bin ya xjuʼ ya kaltik ta stojole, pero wokol ta cholel ta skaj te amakoj achikinike.
12 Ta ora ini ya skʼan te yakuk anaʼikix ta lek nojpteswanej te jichuke, jaʼ ya akʼanik te ya awichʼik nojptesel yan buelta kʼalalto ta sjajchibal ta swenta te mantaliletik te kʼun ta nopel te chʼultesbil yuʼun te Diose. Jaʼ ya xtuun awuʼunik yan buelta te leche, ma jaʼuk te tulan weʼelil.
13 Te machʼatik yakikto ta yuchʼel leche ma snaʼik te bin ya yal te skʼop Dios te ya yakʼ jnoptik te bin stojile, melel alalikto.
14 Yan stukel te tulan weʼelile jaʼ yuʼun te mukʼul ants winiketike, jaʼik te machʼatik ya stuuntesik spisil-ora te snopojibal yuʼunike, jich snopojik yilel ta lek te bin lek sok te bin ma lekuke.
