Carta ta stojol te Hebreoetik 7:1-28
7 Melel te Melquisedec, te jaʼ ajwalil ta skʼinal Salem sok te jaʼ sacerdote yuʼun te Dios, te Machʼa toyol aye, lokʼ sta te Abrahán te kʼalal yak ta sujtel tal ta smilel te ajwaliletike sok la yakʼbey bendición,
2 jich te Abrahán la yakʼbey ta diezmo te Melquisedec spisil te biluketike. Ta sbabial, te sbiile ya skʼan ya yal «ajwalil yuʼun te bin stojil ta pasel»; te jaʼnix jich jaʼ ajwalil ta Salem te ya skʼan ya yal «ajwalil yuʼun lamalkʼinal».
3 Jich bitʼil te ma naʼbiluk machʼatik-a te smeʼ stat, te banti talem stsʼumbal, te bin-ora ayin* sok te bin-ora laje, pero te bitʼil pajal kʼot sok te sNichʼan Dios, sbajtelkʼinal stalel sacerdote stukel.
4 Naʼaikme te mukʼ skʼoplal te Melquisedec yuʼun te jtatik Abrahán, jaʼ yuʼun la yakʼbey ta diezmo te bintik lek la spoj tale.
5 Melelnix-a te jich ya yal te Ley, te snichʼnab Leví te ya yichʼik yaʼtel ta sacerdoteil albilik ta mantal te ya skʼanbeyik te diezmo te lume, te jaʼnix yermanotake, manchukme jaʼiknix stsʼumbal Abrahán.
6 Pero, te winik ini te maba talem ta stsʼumbal Leví la stsak te diezmo te akʼbot yuʼun te Abrahán sok la yakʼbey bendición te machʼa ay bin jamal albot yuʼun te Diose.
7 Te machʼa ya yakʼ bendición jnaʼojtik te jaʼ mukʼxan skʼoplal te bitʼil te machʼa ya yichʼe.
8 Te levitaetik te la yichʼik te diezmoe jaʼik winiketik te ya xlajike, pero te yan winik te la yichʼ akʼbeyel te diezmoe ya yichʼ albeyel skʼoplal ta sJun Dios te kuxule.
9 Te kʼalal la yakʼ diezmo te Abrahán, ya xjuʼ ya yichʼ alel te la stoj diezmo te Leví-euke, manchukme ya yichʼ akʼbeyel diezmo-euk,
10 melel te Leví mato xchiknaj ta stsʼumbal-a te Abrahán te kʼalal lokʼ ta tael yuʼun te Melquisedec.
11 Jich yuʼun, te yuʼunuk jaʼ tojil ants winik ya xkʼootik ta swenta te sacerdoteetik yuʼun stsʼumbal Leví (melel jaʼ jich ya yal te Ley te la yichʼ akʼbeyel te lume), ¿bin yuʼun-nix-a te chiknaj jtul sacerdote te ya yichʼ albeyel skʼoplal te jaʼ jtul sacerdote jich te bin-utʼil te Melquisedec sok te ma jichuk te bin-utʼil te Aarón?
12 Jich bitʼil te yakix ta jeltayel te sacerdoteetike, jaʼnix jich ya skʼan jeltayel te Leye.
13 Melel te winik ini te ya yichʼ albeyel skʼoplale talem ta yan tsʼumbalil, ta tsʼumbalil-abi maʼyuk machʼa aʼtejem ta skajtajib chikʼbil majtanil.
14 Jnaʼojtik ta lek te talem ta stsʼumbal Judá te Kajwaltike, te Moisés maba la yal te ya xchiknaj sacerdoteetik ta tsʼumbalil-abi.
15 Chiknajxan ta ilel ta lek te kʼalal chiknaj yan sacerdote jich te bin-utʼil te Melquisedec,
16 maba la yichʼ yaʼtel ta sacerdoteil te talem ta stsʼumbal ants winik jich te bin-utʼil ya yal te Ley, jaʼ la yichʼ yaʼtel ta swenta jun kuxlejalil te ma xjuʼ ya yichʼ lajinele.
17 Melel jich ya yichʼ alel ta stojol: «Jaʼat sacerdoteat ta sbajtelkʼinal jich te bin-utʼil te Melquisedec».
18 Jich yuʼun, te mantalil te ay ta nailal lajix skʼoplal, melel maʼyuk yip sok ma xtuunix.
19 Melel te Ley maba la yakʼ te tojil ants winiketik ya xkʼootik, pero te kʼalal jul te smukʼul oʼtanil te kʼax lekxane, la yakʼ te toj ya xkʼootik sok jaʼ ta swenta te ya xnoptsajotik* ta stojol te Diose.
20 Jich kʼot ta pasel ta swenta te jich jamal yaloj te Diose
21 (melel ay winiketik te la yichʼ yaʼtelik ta sacerdote manchukme maʼyuk bin jamal albotik yuʼun te Diose, yan stukel te winik ini la yichʼ yaʼtel ta sacerdote ta swenta te jich jamal albot yuʼun te Diose «yaloj ta jamal te Jehová* sok maba ya sjel te bin yaloje: ‹Jaʼat sacerdoteat ta sbajtelkʼinal›»).
22 Te Jesús jaʼ señail kʼot yuʼun te ya xbajt chiknajuk yan chapbilkʼop te jaʼ lekxane.
23 Te sacerdoteetik ma xjuʼ ya spasik ta spisil-ora te yaʼtelik ta skaj te ya xlajike, jich yuʼun bayal machʼatik kʼaxemik ta sacerdoteil.
24 Yan stukel te Jesús te kuxul ta sbajtelkʼinal, maʼyuk yan sacerdote te ya xjelolinot yuʼune.
25 Jaʼnix jich, chapal ta lek yuʼun ya yakʼbey skolel ta sbajtelkʼinal te machʼatik ya xnoptsajik* ta stojol Dios ta swentae, melel kuxul ta sbajtelkʼinal stukel jich ya xjuʼ ya xkʼopoj ta stojol Dios ta swentaik.
26 Melel ya jkʼantik jtul mukʼul sacerdote jich te bin-utʼil te Jesuse: te jun yoʼtan ta stojol Dios, te maʼyuk smul, te maba boloben skʼoplal, te ma junuk yoʼtan sok te jmulawiletik sok te la yichʼ toybeyel skʼoplal kʼalalto ta chʼulchan.
27 Ma pajaluk sok te bin-utʼil te yantik mukʼul sacerdoteetike, melel maba ya yakʼ milbil majtaniletik ta jujun kʼajkʼal —ta swenta te smul sok te smul te lume—, melel jun-nax buelta la yakʼ te milbil majtanil ta sbajtelkʼinal jaʼ te kʼalal la yakʼ sba ta lajele.
28 Melel te Ley ya yakʼbey yaʼtel ta mukʼul sacerdote te winiketik te ya xchʼayik-euke, pero ay bin jamal la yal te Dios te kʼalal yakʼojix-a te Leye, jaʼ te ya yakʼbey yaʼtel ta mukʼul sacerdote jtul Nichʼanil te tsʼakal yichʼojix lekubtesel ta sbajtelkʼinale.
