Carta ta stojol te Hebreoetik 8:1-13
8 Jich yuʼun, te bin mukʼ skʼoplal yakotik ta yalele jaʼ ini: ay jich jtul mukʼul sacerdote kuʼuntik-abi, sok la snajkan sba ta swaʼel te smukʼul naktajib te Machʼa kʼax bayal yutsilal ta toyol
2 sok yak ta abatinel ta chʼul awilal sok te banti te smelelil nailpakʼ te la spas te Jehová,* te ma jaʼuk spasoj te winike.
3 Melel spisil te mukʼul sacerdoteetik la yichʼ yaʼtelik yuʼun ya yakʼik majtaniletik sok milbil majtaniletik; jaʼ yuʼun la skʼan te ay bin ya yakʼ-euk te mukʼul sacerdote ini.
4 Te liʼuk ay ta balumilal maba sacerdote te jichuke, melel ayix winiketik te ya yakʼik te majtanil jich te bin-utʼil ya yal te Leye.
5 Te chʼul aʼtelil te ya spasik te winiketik ini jaʼ señail sok yaxinal te bintik ay ta chʼulchan, jich te bin-utʼil te mantalil la yichʼ akʼbeyel yuʼun Dios te Moisés te kʼalal nopol* ya xjajchix ta spasel-a te nailpakʼ: «Pasa tulan te jichuk ya apas spisil te bin-utʼil la awichʼ akʼbeyel awil ta wits», te xchie.
6 Pero, ta ora ini te Jesús la yichʼix yaʼtel te kʼax lekxane, melel jaʼnix jich tekʼel ta kʼop ta swenta te chapbilkʼop te kʼax lek-euk te la yichʼ yiptajib ta swenta te Ley te bin yaloj Dios te kʼax lekikxane.
7 Melel te lekuk kʼot te sbabial chapbilkʼope, maba la yichʼ pasel te schebal chapbilkʼop te jichuke.
8 Melel jamal chikan ta ilel te ya yil te banti ya xchʼay te ants winiketik yuʼun te lum te kʼalal jich ya yale: «‹Ilawilik, yakix ta noptsajel* skʼajkʼalel te ya jpas yachʼil chapbilkʼop sok te sna Israel sok te sna Judá, xchi te Jehová.*
9 Maba jich te bin-utʼil te chapbilkʼop te la jpas sok te antiguo smeʼ statik te kʼalal bin-ora la jtsakbey lokʼel tal ta skʼabik yuʼun la jlokʼeslan tal ta skʼinal Egipto. Maba jun yoʼtan la yakʼ sbaik ta stojol te chapbilkʼop kuʼune, jich yuʼun maba la jmelix koʼtan ta stojolik›, xchi te Jehová.*
10 »‹Melel te kʼalal ya sta yorail te ya jpas te chapbilkʼop sok te sna Israel —xchi te Jehová—* jaʼ ini. Ya kakʼbey ta snopojibal yuʼunik te leyetik kuʼun sok ya jtsʼibaybey ta yoʼtanik. Joʼon Dioson ya xkʼoon yuʼunik sok jaʼ lum kuʼun ya xkʼotik.
11 »›Maʼyuk machʼa te jich ya snojptes te slumal ni jaʼuk te yermanotak: «¡Naʼbeya sba te Jehová!»,* te xchie. Melel mukʼ bikʼit ya xbajt snaʼbonik jba.
12 Ya xbajt jpasbey perdón yuʼun te bintik ma stojiluk ya spasike, sok maba ya jultesix ta koʼtan te smulike›».
13 Te kʼalal la yalbey skʼoplal «jun yachʼil chapbilkʼop», jich pokoʼubix jilel yuʼun te sbabial chapbilkʼope. Jich yuʼun, te bin ma xtuunix sok te pokoʼubenixe nopol* ya xchʼayix bael.
