Yaʼtel te Jpuk-kʼopetik 12:1-25
12 Ta yorailnix-abi, te ajwalil Herodes jajch yutsʼin chaʼoxtul te machʼatik ayik ta congregación.
2 La yakʼ ta milel ta espada te Santiago, te jun smeʼ stat sok te Juane;
3 te kʼalal la yil te lek la yilik te judioetik te bin la spase, jaʼnix jich la yakʼ ta tsakel te Pedroe. (Spisil ini kʼot ta pasel ta skʼajkʼalel te Kʼin yuʼun pan te maba yichʼoj levadura).
4 Jich yuʼun la yakʼ ta tsakel sok la yakʼ ta chukel, la yakʼ chaneb turno ta kanantayel, chantul soldadoetik ta jujun turno, te bin staoj ta nopel jaʼ te ya stejkʼan ta stojol te lum te kʼalal kʼaxix-a te Kʼin yuʼun Pascua.
5 Jich yuʼun, te Pedro la smakik jilel ta chukojibal. Ta yorailnix-abi, te congregación maba la skom sba ta skʼanbeyel wokol Dios ta stojol.
6 Te kʼalal pajelxanix ya yichʼ tejkʼanel yuʼun Herodes te Pedro ta stojol te lume, wayal-a sok chukul ta chaʼlijkʼ cadena sok ay ta yolil chaʼtul soldadoetik, jaʼnix jich ay jkananetik ta stiʼil te chukojibale.
7 Ta repentenax chiknaj tey-a te chʼul-abat yuʼun Jehová* sok xojobajnax te yutil te chukojibale. Jich yuʼun, te chʼul-abat la spikbey smoch bakel* te Pedro sok jich la yalbey: «¡Jajchan ta oranax!». Til* koel te cadenaetik te ay ta skʼabe.
8 Jich albot yuʼun te chʼul-abat: «Lapa te akʼuʼ sok te atep o axanab». Jich la spas te Pedro. Jich albotxan yuʼun te chʼul-abate: «Lapa te anajtil kʼuʼe sok tʼunawon tal».
9 Jich lokʼ bael te Pedro sok la stʼun bael te chʼul-abate, pero ma la snaʼ stojol teme smelelil te bin yak ta spasel te chʼul-abate, la skuy te najalsitile.*
10 Kʼaxik te banti ay te sbabial jtsojb jkananetike, patil ta schebal. Te kʼalal kʼotik ta tiʼnail te pasbil ta takʼin te ya x-ikʼawan bael ta mukʼul lum, jam ta stukel. Jich lokʼik bael sok beenik bael ta jun calle, ta repentenax ijkitayot yuʼun te chʼul-abate.
11 Ta yorail-abi, te kʼalal la snaʼ te Pedro te bin kʼot ta pasele, jich la yal: «La jnaʼix te jaʼ Jehová* te la stikun tal te chʼul-abat yuʼune sok te la skoltayon lokʼel ta skʼab te Herodes soknix spisil te bin smaliyojik te judioetik te ya xkʼot ta jtojole».
12 Te kʼalal la snaʼ stojol te bin yak ta kʼoel ta pasele, bajt ta sna te María te snan* te Juan te jaʼnix jich naʼbil sba bitʼil Marcos, te banti bayal ta tul jnopojeletik yakik ta skʼoponel Dios.
13 Te kʼalal la stij te tiʼnaile, ay jtul j-abat achʼix te Rode sbiil lokʼ yil machʼa-a.
14 Te kʼalal la snaʼ te jaʼ skʼop te Pedro, kʼaxto akʼbot stseʼelil yoʼtan te maba la sjambey te tiʼnaile, animal sujt ochel ta yalel te ay ta tiʼnail te Pedroe.
15 Jich la yalbeyik te achʼixe: «Sojkem ajol». Pero, te bitʼil bayal buelta la yalulan te melele, jich jajch yalik: «Jaʼ te chʼul-abat yuʼun».
16 Pero, te Pedro yaknanix ta stijel-a te tiʼnaile. Te kʼalal la sjamik te tiʼnail sok te la yilike, chamnax yoʼtanik* yuʼun.
17 La sjimulan skʼab yuʼun yakuk xchʼabik sok la scholbey yaʼiyik ta lek te bin-utʼil lokʼesot tal yuʼun Jehová* ta chukojibal. Jich la yaltiklanbeyxan: «Akʼbeyaik snaʼ te Santiago spisil ini soknix te hermanoetike». Te kʼalal laj yoʼtan ta yalel ini, lokʼ bael sok bajt ta yan lugar.
18 Te kʼalal sakub te kʼinale, jajchik ta kʼop te soldadoetik, melel ma snaʼik te banti bajt te Pedroe.
19 Te Herodes la yakʼ ta leel ta lek; pero jich bitʼil te maba la stae, la yichʼtiklan ta kʼop te jkananetik, patil la stikunlan ta akʼbeyel castigo. Tey-abi lokʼ bael ta Judea, ko bael ta Cesarea sok tey jil junchebuk tiempo-a.
20 Te Herodes ilinem ta stojol te yajwalul Tiro sok Sidón. Jich yuʼun, jun-nax la stsob sbaik te Tiro sok Sidón yuʼun bajtik te banti ay te Herodes, te kʼalal kʼopojik sok te Blasto —te jaʼ swentainojbey spisil te bintik ay ta sna te ajwalil—,* la skʼanik te ayuk lamalkʼinal yuʼunik, melel tey ya xtal-a te sweʼelik ta snacion te ajwalil Herodese.
21 Te kʼalal kʼot yorail te ya stsob sbaike, te Herodes la slap skʼuʼ yuʼun ajwalil, la snajkan sba ta chajpajibal sok jajch ta kʼop ta komonsitil.
22 Jich yuʼun, te ants winiketik te stsoboj sbaik tey-ae jich jajchik ta aw: «¡Jaʼ skʼop jtul dios, ma jaʼuk jtul winik!».
23 Ta oranax, te chʼul-abat yuʼun Jehová* la yakʼbey chamel te Herodese, melel ma la yalbey yutsil skʼoplal te Diose. Jich laj ta tiʼel ta yal ja.*
24 Pero, te skʼop te Jehová* mukʼub sok pujkxan ta alel.
25 Te kʼalal laj yoʼtanik ta yakʼel koltayel ta Jerusalén te Bernabé sok te Saulo, sujtik bael sok la yikʼ bael sjokinik te Juan, te jaʼnix jich naʼbil sba bitʼil Marcos.
Notaetik
^ O «scostilla».
^ O «Tilpʼuj», «Pol».
^ O «smeʼ», «smama».
^ O «chajpnax la yilik».
^ Ta griego: «jaʼ te machʼa swentainoj te banti ya xway te ajwalil».
^ Jaʼ chʼin chanetik te ya xtojk kʼalal ay bin kʼaʼemix.
