Yaʼtel te Jpuk-kʼopetik 14:1-28
-
Bayal machʼatik ochik ta jchʼuunjel ta Iconio; jaʼnix jich tal kontrainel (1-7)
-
Ta Listra la skuyik ta diosetik te jpuk-kʼopetik (8-18)
-
La schʼojik ta ton te Pablo, pero maba laj (19, 20)
-
Te Pablo sok te Bernabé la yakʼbeyik yip yoʼtan te congregacionetik (21-23)
-
Sujtik bael ta Antioquía te ay ta skʼinal Siria (24-28)
14 Te kʼalal ayikix ta Iconio, ochik bael ta sinagoga yuʼun te judioetik. Ta swenta te leknax kʼopojike, bayal ta tul judioetik sok griegoetik la schʼuunik te Diose.
2 Pero, te judioetik te maba la schʼuunike la stijbeyik yoʼtan te jyanlumetik yuʼun ya skontrainik te hermanoetike.
3 Bayal kʼajkʼal jilik tey-a sok akʼbotik yuʼel yuʼun te Jehová* yuʼun ya xkʼopojik sok yip yoʼtanik, la spasik milagroetik* sok mukʼul aʼteliletik yuʼun jich ya yakʼik ta naʼel te bin yakik ta scholbeyel skʼoplale, jaʼ te slekil yoʼtan Dios te ma snujpʼuk ya kichʼtike.
4 Pero, te ants winiketik yuʼun te lume la xat sbaik: ay machʼatik te la yakʼ sbaik ta stojol te judioetik sok ay yantik te la yakʼ sbaik ta stojol te jpuk-kʼopetike.
5 Te ants winiketik yuʼun te jyanlumetik la schap skʼopik sok te judioetik soknix te jwolwanejetik yuʼunik swenta ya yutsʼinik sok ya schʼojik ta ton te Pablo sok te Bernabé.
6 Pero, te kʼalal la snaʼik stojol ini, anik bael ta Listra sok ta Derbe —te jaʼ lumetik te ay ta Licaonia— soknix te lumetik te ay ta sjoyobale.
7 Tey la spukik ta alel-a te lek yachʼil kʼope.
8 Ta Listra ay jtul winik te nakal te ma xtuun te yoke. Ta swenta te jich ayine,* maʼyuk bin-ora beenem.
9 Yak ta yaʼiyel te bin yak ta yalel te Pabloe. Jich yuʼun, te Pablo la yilbey sit te winike, jich bitʼil la yil te ay schʼuunel yoʼtan yuʼun ya yichʼ lekubtesel,
10 jich tulan la yalbey: «Jajchan». Jich wil jajchel te winike, jajch ta beel.
11 Kʼalal la yil te ants winiketik te bin la spas te Pabloe, jich la yalik ta aw ta kʼopil licaónica: «¡Koemix tal ta jtojoltik diosetik te la skʼatpʼun sbaik ta winiketik!».
12 La yalik te jaʼ Zeus te Bernabé, pero te Pablo Hermes la yalbeyik, melel jaʼ te bayal ya xkʼopojxane.
13 Te templo yuʼun te Zeus ay ta yochibal te lume, te sacerdote yuʼun te templo-abi la yikʼ tal ta tiʼnailetik toroetik sok coronaetik te pastiklanbil ta nichim, kʼan yakʼ milbil majtaniletik sok te ants winiketike.
14 Te kʼalal la yaʼiyik stojol te Bernabé sok te Pablo, la schʼiʼ skʼuʼik yuʼun, animalnax la sten sbaik ochel ta yolil te ants winiketik sok jich la yalik ta aw:
15 «Winiketik, ¿bin yuʼun te jich ya apasik ini? Melel winikotik-euk jich bitʼil te jaʼexe, ay jwokoltik-euk jich bitʼil te jaʼexe. Jaʼ yuʼun yakotik ta scholel ta atojolik te lek yachʼil kʼop yuʼun ya awijkitayik spasel ini te jkʼaxel ma xtuune sok te ya sujtex ta stojol te kuxul Diose, jaʼ te machʼa la spas te chʼulchan, balumilal, mar sok spisil te bintik ayik tey-ae.
16 Ta namey kʼinal, te Dios la yakʼ te ya spas te bin ya skʼan yoʼtanik te jujun nacionetike,
17 manchukme jich-abi, maba la skom sba ta yakʼel sba ta naʼel ta swenta te bintik lek la spase. La yakʼbey tal jaʼal ta chʼulchan, la yakʼ sitinuk te yawal stsʼunubik, la yakʼbey bayal sweʼelik sok la yakʼ te kʼax tseʼeluk yoʼtanike».
18 Manchukme jich la yaltiklanbey te ants winiketike, wokol juʼ yuʼunik skomel te manchuk ya x-akʼbotikix milbil majtaniletik-ae.
19 Tey-abi kʼotik judioetik te talemik ta Antioquía sok ta Iconio, la stijbeyik yoʼtan te ants winiketik yuʼun ya skontrainik te Pablo, jich yuʼun la schʼojik ta ton sok la stasik lokʼel kʼalalto ta stiʼil te lum yuʼun la skuyik te lajemixe.
20 Pero, te kʼalal joytayot yuʼun te jnopojeletike, la stejkʼan sba jajchel sok chaʼsujt ochel ta mukʼul lum. Ta yan kʼajkʼal bajt ta Derbe sok te Bernabé.
21 Te kʼalal la scholik te lek yachʼil kʼop ta mukʼul lum-abi sok te la yotsesik bayal ta tul jnopojeletike, chaʼsujtik ta Listra, Iconio sok ta Antioquía.
22 Tey la yakʼbeyik yip yoʼtanik-a te jnopojeletik te manchuk ya xchʼay te schʼuunel yoʼtanike sok jich la yaltiklanbeyik: «Ya skʼan ya xkʼax jwokoltik yuʼun ya x-ochotik ta Wentainel* yuʼun te Diose».
23 Jaʼnix jich la sleik jilel te machʼatik la yakʼbeyik yaʼtel ta ancianoil ta jujun congregación, la skʼoponik Dios sok la skom sweʼelik, jaʼnix jich la yakʼbeyik jilel ta skʼab Jehová* te machʼatik ochik ta jchʼuunjeletike.
24 Patil kʼaxik bael ta skʼinal Pisidia, kʼotik ta Panfilia,
25 te kʼalal laj yoʼtanik ta scholel skʼop Dios ta Perga, koik bael ta Atalia.
26 Tey ochik ta barco-a, sujtik bael ta Antioquía, jaʼ te banti kʼanbotik bendición yuʼun te hermanoetik te yakuk xjokinotik bael yuʼun Dios ta spasel te aʼtelil te juʼix yuʼunik spasele.
27 Te kʼalal kʼotik tey-ae, la stsobik tal te congregacione, la scholbey yaʼiyik te bintik spasoj te Dios ta swentaike. Jaʼnix jich la scholbey yaʼiyik te bin-utʼil te Dios la sjambey sbe te jyanlumetik yuʼun ya yakʼik schʼuunel yoʼtanik.
28 Jich yuʼun, te Bernabé sok te Pablo la sjokinik bayal kʼajkʼal te jnopojeletike.
