Yaʼtel te Jpuk-kʼopetik 18:1-28
18 Te kʼalal kʼot ta pasel spisil ini, lokʼ bael ta Atenas, bajt ta Corinto.
2 Tey la sta jtul judío-winik te Áquila sbiil, jaʼ slumal te Ponto. Mato ayuk bayal kʼajkʼal te lokʼ tal ta Italia sok te yinam te Priscila sbiile ta skaj te la yal ta mantal te Claudio te akʼa lokʼukik bael ta Roma spisil te judioetike. Jich yuʼun, te Pablo bajt yulaʼtay.
3 Jich bitʼil pajal te yaʼtelike, la sjokinlan jilel ta nainel sok jun-nax aʼtejik. Te yaʼtelike jaʼ spasel nailpakʼ.
4 Ta jujun skʼajkʼalel sábado, te Pablo la yal skʼop Dios ta sinagoga sok la stijbey yoʼtan te judioetik sok te griegoetik yuʼun ya schʼuunik te bin ya yale.
5 Te kʼalal koik tal ta Macedonia te Silas sok te Timoteo, kʼotik ta Corinto. Jaʼ yuʼun, te Pablo jaʼ la yaʼtelin scholel te skʼop Diose, la yalbey yaʼiy te judioetik sok la yakʼbey yilik te jaʼ Cristo te Jesuse.
6 Pero, te bitʼil maba la skom sbaik ta skontrainel te Pablo sok ta sbolkʼoptayel, la slilin te skʼuʼe sok jich la yaltiklanbey: «Jaʼex ay ta awentaik te alajelike.* Ma jaʼukix ay ta jwenta. Ta ora ini ya xboon ta stojol te jyanlumetike».
7 Jich lokʼ bael ta sinagoga, och ta sna te Ticio Justo, jaʼ jtul winik te yichʼoj ta mukʼ te Diose te slakʼoj sba sok sinagoga te snae.
8 Pero, te Crispo te jwolwanej yuʼun te sinagoga sok spisil te machʼatik ay ta snae la schʼuunik te Kajwaltike. Bayal ta tul corintioetik la yaʼiyik te skʼop Diose, jajch schʼuunik sok la yichʼik jaʼ.*
9 Ta ajkʼabal, te Pablo jich albot yuʼun te Kajwaltik ta najalsitil:* «Mame xiwat, kʼopojan, mame xa akom aba,
10 melel jokinojat, mame ayuk machʼa ya yutsʼinat, bayal ta tul ants winiketik ay kuʼun ta mukʼul lum ini».
11 Jil jun jaʼbil sok olil tey-a ta yakʼel ta nopel te skʼop Diose.
12 Te kʼalal ay ta ajwalil* ta Acaya te Galión, te judioetik la schap skʼopik ta skontrainel te Pablo sok la yikʼik bael ta chajpajibal.
13 Jich la yalik: «Te winik ini yak ta yakʼbeyel schʼuun Dios te ants winiketik te ma jichuk ya yal te leye».
14 Te kʼalal kʼan kʼopojuk te Pabloe, te Galión jich la yalbey te judioetike: «Te yuʼunuk ay bin ma stojiluk spasoj o te ay tulan smul te winik ini, snujpʼ te ya jchʼam kaʼiy te akʼopik te jichuke.
15 Pero, teme jaʼnax skʼoplal kʼopetik, biililetik sok ley awuʼunike, chajpana atukelik. Ma jkʼan ya kakʼ jba ta juez ta schajpanel te kʼopetik ini».
16 Jich la stentiklan lokʼel ta chajpajibal.
17 Jich ta spisilik la stsakik te Sóstenes, te jwolwanej yuʼun te sinagoga, jich jajch smajik ta yelawal chajpajibal, pero te Galión ma la skʼan la schʼik sba-a te kʼop ini.
18 Te Pablo jilxan cheʼoxebuk kʼajkʼal tey-a. Ta patil la spatbey jilel yoʼtan te hermanoetike, och ta barco, bajt ta skʼinal Siria, jokinot bael yuʼun te Priscila sok te Áquila. Ta Cencreas la yakʼ ta joxel* sjol yuʼun ay bin jamal yaloj ta stojol Dios te ya spase.
19 Te kʼalal kʼotik ta Éfeso, tey la yijkitay jilel-a te Priscila sok te Áquila. Te Pablo och bael ta sinagoga, la snojpteslan te judioetik te kʼalal la skoltaylan ta snaʼel te bin ya yal te sJun Diose.
20 Manchukme la skʼanbeyik te yakuk xjilxan cheʼoxebuk kʼajkʼal, ma la schʼuun.
21 Jich la skʼoponlan jilel sok jich la yal: «Teme jich ya skʼan te Jehová,* ya kil jbatik yan buelta». Och ta barco, jich la yijkitay jilel te lum Éfeso,
22 ko bael ta Cesarea. Tey-abi mo bael,* bajt spatbey yoʼtan te congregacione. Patil ko bael ta Antioquía.
23 Jil cheʼoxeb kʼajkʼal tey-a, jich bajt, la sbeentay te lumlumtik te ay ta spamal skʼinal Galacia sok ta Frigia ta yakʼbeyel yip yoʼtan spisil te jnopojeletike.
24 Ay kʼot jtul judío-winik ta Éfeso te Apolos sbiil, jaʼ slumal te Alejandría. Jaʼ jtul winik te ya snaʼ ta lek kʼop sok te ya snaʼ ta lek te bin ya yal te sJun Diose.
25 La yichʼ akʼbeyel snop te be yuʼun te Jehová.* Ta swenta te chʼul espíritu* kʼopoj sok yip yoʼtan sok tsʼakal la yakʼ ta nopel ta swenta te Jesuse, pero jaʼnax snaʼojbey skʼoplal te ichʼjaʼ* yuʼun te Juane.
26 Sok yip yoʼtan jajch ta kʼop ta sinagoga. Te kʼalal la yaʼiy stojol te Priscila sok te Áquila te bin yak ta yalele, kʼejel la yikʼik bael, sok la scholbeyikxan yaʼiy ta jamal te bin-utʼil ay te be yuʼun te Diose.
27 Te bin-utʼil ya skʼan ya xbajt ta Acaya te Apolos, te hermanoetik la stsʼibayik bael carta ta stojol te jnopojeletik te banti ya skʼanbeyik wokol te lekuknax ya yikʼ ta stojolik. Te kʼalal kʼot tey-a, bayal la skoltay te machʼatik la schʼuun Dios ta swenta te slekil yoʼtan Dios te ma snujpʼuk ya kichʼtike,
28 melel maba xiw yoʼtan ta yalel ta jamal ta komonsitil te chʼayemik te judioetik kʼalal la yakʼtiklanbey yil ta sJun Dios te jaʼ Cristo te Jesuse.
Notaetik
^ O «achʼichʼelike».
^ O «procónsul». Jaʼ jtul ajwalil romano.
^ O «jochel».
^ Jaʼniwan ta Jerusalén.
