Yaʼtel te Jpuk-kʼopetik 19:1-41
19 Kʼalal ay ta Corinto-a te Apolose, te Pablo kʼax tal ta witstikil, ko bael ta Éfeso. Tey kʼot sta chaʼoxtul jnopojeletik,
2 jich la sjojkʼoylanbey: «¿Labal awichʼik te chʼul espíritu* te kʼalal ochex ta jchʼuunjele?». Jich la yalik: «Maʼyuk bin-ora kaʼiyojbeytik skʼoplal ta swenta te chʼul espiritue».
3 Jich albotik yuʼun te Pablo: «¿Bin ichʼjaʼ* la awichʼik jiche?». «Jaʼ te ichʼjaʼ yuʼun te Juan», xchiik.
4 Te Pablo jich la yal: «Te Juan la yakʼ ichʼjaʼ* te jaʼ señail sujtesel oʼtanil sok la yalbey te ants winiketik te akʼa schʼuunik te machʼa patil yak ta talel yuʼune, te jaʼ te Jesuse».
5 Te kʼalal jich la yaʼiyik stojole, la yichʼik jaʼ* ta swenta sbiil te Kajwaltik Jesús.
6 Kʼalal te Pablo la skajan skʼab ta stojolike, jich jul te chʼul espíritu* ta stojolik, jajchik ta kʼop ta yanyantik kʼopiletik sok kʼopojik jich bin-utʼil j-alwanejetik.
7 Ta spisilik ayniwan 12 ta tul winiketik.
8 Te Pablo och ta sinagoga, sok yip yoʼtan la yal skʼop Dios oxeb u tey-a sok la snojpteslan te kʼalal la skoltaylan ta snaʼel ta lek swenta ya schʼuunik te Wentainel* yuʼun te Diose.
9 Pero ay chaʼoxtul te machʼatik tulan yoʼtanik te ma la skʼan schʼuunik sok te la sbolkʼoptayik te Be ta stojol te ants winiketik. Jich yuʼun, te Pablo la yijkitaylan jilel, kʼejel la yikʼ bael te jnopojeletike. Ta jujun kʼajkʼal la schol skʼop Dios ta escuela yuʼun te Tirano.
10 Jich la spas cheb jaʼbil. Jich yuʼun, spisil te machʼatik ayik ta skʼinal Asia, jich bitʼil judioetik sok griegoetik, la yaʼiyik stojol te skʼop te Kajwaltike.
11 Te Dios lananix spas mukʼul milagroetik-a ta swenta te Pabloe.
12 Ay chujkilaletik sok majkilaletik yuʼun chʼujtul te la yakʼbeyik sta te sbakʼetal te Pablo, te kʼalal la yichʼik bael ta stojol te jchameletike, lekubik yuʼun te schamelik sok lokʼ te pukujetik ta yoʼtanike.
13 Pero, ay judioetik te bayuk beenik ta slokʼesel pukujetik, jaʼ la stuuntesik te sbiil te Kajwaltik Jesús ta stojol te machʼatik ochemik pukuj ta yoʼtanik. Jich la yalik: «Joʼon ya kalbeyex ta tulan mantal: lokʼanik ta swenta sbiil te Jesús te yak ta yalbeyel skʼoplal te Pabloe».
14 Jaʼ jich la spasik te juktul snichʼnab jtul judío-winik te Esceva sbiil te jaʼ jtul jwolwanej yuʼun te sacerdoteetike.
15 Pero, jich albotik yuʼun jtul pukuj: «Ya jnaʼbey sba te Jesús sok ya jnaʼ machʼa-a te Pabloe. Pero, ¿machʼaex-a te jaʼexe?».
16 Jich yuʼun, te winik te ochem pukuj ta yoʼtane wiluntayotik yuʼun, ta tulutul tsalotik yuʼun, tʼanalik sok ejchenajemik lokʼik bael ta anel tey ta na-abi.
17 Spisil te machʼatik ayik ta Éfeso, jich bitʼil judioetik sok griegoetik, la yaʼiyik stojol te bin kʼot ta pasele. Ta spisilik och xiwel ta yoʼtanik, jich la yichʼxan ichʼel ta mukʼ te sbiil te Kajwaltik Jesuse.
18 Bayal te machʼatik ochik ta jchʼuunjele bajt yalik ta jamal te smulike sok te bintik ma lek yakik ta spasel ta skuxlejalike.
19 Bayal te machʼatik yaʼtelinojik spasel magia la stsobik tal spisil te libroetik yuʼunike sok la schikʼik ta komonsitil. La yichʼ ajtayel te jayebto stojol te libroetike, ay 50 mil ta sejp plata-takʼin lokʼ te stojole.
20 Jich pujkxan bael te skʼop te Jehová* sok la yichʼ bayalxan yip.
21 Te kʼalal kʼotix ta pasel spisil ini, te Pablo la snop ta yoʼtan te ya xbajt ta Jerusalén te kʼalal sbeentayojix-a te Macedonia sok te Acaya, jaʼnix jich la yalxan: «Te kʼalal kʼaxemonix tey-ae, ya skʼan ya xboon ta Roma».
22 Jich la stikun bael ta Macedonia chaʼtul jkoltaywanejetik yuʼun: jaʼ te Timoteo sok te Erasto. Yan stukel te Pablo jil jun tiempo ta skʼinal Asia.
23 Ta yorail-abi jajch tulan kʼop ta swenta te Bee.
24 Ay jtul winik te Demetrio sbiil te yaʼtelinoj spasel ta plata chʼin temploetik yuʼun te Ártemis, bayal la spasik ganar te machʼatik yaʼtelinojik spasel ini.
25 Te Demetrio la stsob tal te sjoʼtak ta aʼtele sok te machʼatik pajal yaʼtelik soke, jich la yaltiklanbey: «Winiketik, anaʼojik ta lek te ya jtatik jtakʼintik ta swenta te aʼtelil ini.
26 Awilojik sok awaʼiyojik stojol te ma jaʼuknax ta Éfeso, te jaʼnix jich jteb ma spisiluk ta skʼinal Asia, te Pablo yak ta sjelbeyel snopojibal yuʼun te ants winiketik sok yak ta yakʼbeyel schʼuun te ma jaʼuk smelelil diosetik te diosetik te pasbil ta kʼabale.
27 Ma jaʼuknax ya jta jwokoltik yuʼun te ma lek ya yichʼix albeyel skʼoplal te kaʼteltike, jaʼnix jich te ma xyichʼix ichʼel ta mukʼ te templo yuʼun te mukʼul antsil dios Ártemis sok yame yichʼ jinbeyel te yutsilal ta spisil te skʼinal Asia sok ta swolol balumilal».
28 Kʼalal jich la yaʼiyik stojol te winiketike, bayal ilinik yuʼun sok jich jajchik ta aw: «¡Mukʼ skʼoplal te Ártemis yuʼun te efesioetike!».
29 Spisil te lume xchʼinchʼonik jajchel ta kʼop, jun-nax ochik bael ta animal ta yutil te teatro, la stasik ochel te Gayo sok te Aristarco, jaʼ sjoʼtak ta beel te Pablo te talemik ta Macedonia.
30 Te Pablo kʼan ochuk bael te banti ay te ants winiketike, pero maba akʼot bael yuʼun te jnopojeletike.
31 Jaʼnix jich ay chaʼoxtul te machʼatik ya yilbeyik skʼoplal te kʼinetik sok tajimaletik te lek ya yilik te Pabloe la stikunik ta albeyel sok la yalbeyik ta wokol te manchuk ya xbajt te banti te teatroe.
32 Yanyantik te bin yakik ta yawtayel te ants winiketike, melel ma snaʼik te bin yak ta kʼoel ta pasele sok jteb ma spisilik ma snaʼik te bin swentail te la stsob sbaike.
33 Te judioetik la stejkʼanik ta stojolik te Alejandroe. Tey-abi, te ants winiketik la skʼanbeyik te yakuk xkʼopoje. Jich yuʼun, te Alejandro la spas seña sok skʼab yuʼun ya skʼan ya xkʼopoj ta stojol te lume.
34 Pero, te k’alal la snaʼik stojol te jaʼ jtul judío-winike, ta spisilik jun-nax jajchik ta aw, ayniwan cheb ora te jich yakik ta awe: «¡Mukʼ skʼoplal te Ártemis yuʼun te efesioetike!».
35 Kʼalal juʼ yuʼun skomel te ants winiketik te secretario yuʼun te lume, jich la yal: «Winiketik yuʼun Éfeso, ¿aybal jtul ants winik te ma snaʼoj te jaʼ ay ta swenta te lum Éfeso ta skanantayel te templo yuʼun te mukʼul Ártemis sok te slokʼomba te chʼay koel tal ta chʼulchane?
36 Maʼyuk machʼa ya yal te ma jichuke. Jaʼ yuʼun koma abaik ta aw sok mame biluknax te bin ya x-och apasike.
37 Te winiketik te la awikʼik tal liʼi maba j-elekʼetik yuʼun templo sok maba sbolkʼoptayojik te antsil dios kuʼuntike.
38 Teme ay kʼop ya skʼan ya yakʼ ta chajpanel te Demetrio sok te sjoʼtak ta aʼtel, jaʼ swentail te ay skʼajkʼalel te ya stsob sbaik te jchajpanwanejetik sok jaʼ swentail te ay ajwaliletik.* Tey akʼa schajpanik-a te kʼop jajchem yuʼunike.
39 Pero, teme aytoxan bin tulan skʼoplal ya akʼan ya awalike, akʼa yichʼ chajpanel ta yorail te mukʼul tsoblej yuʼun te machʼatik yichʼojik mukʼ yaʼtelike.
40 Melel ya xjuʼ ya jmulintik te yakotik ta sjachel kʼop ta stojol te ajwalil ta swenta te bin yak ta kʼoel ta pasel ta ora ini, melel maʼyuk swentail te bin yuʼun xchʼinchʼonex ta kʼope».
41 Te k’alal laj yoʼtan ta yalel ini, la stikunlan bael te ants winiketik te stsoboj sbaike.
Notaetik
^ Jaʼ ajwaliletik romanoetik.
