Yaʼtel te Jpuk-kʼopetik 6:1-15
6 Ta yorail-abi, te kʼalal yak ta toyel yajtalul te jnopojeletike, te judioetik te ya xkʼopojik ta griego jajchik ta wulwulkʼop ta stojol te judioetik te ya xkʼopojik ta hebreo ta skaj te maba yakik ta ichʼel ta wenta te meʼba antsetik yuʼunik ta swenta te weʼelil te ya yichʼ pukel ta jujun kʼajkʼale.
2 Jich yuʼun, te 12 ta tul jpuk-kʼopetik la stsobik tal spisil te jnopojeletik sok jich la yaltiklanbeyik: «Ma snujpʼuk te ya kijkitaytik scholel te skʼop Dios yuʼun ya jpuktik te weʼelile.
3 Jich yuʼun, kermanotak, tsaaik ta awolilik juktul winiketik te lek skʼoplalik te nojel ta yoʼtanik te chʼul espíritu* sok te ay spʼijil yoʼtanik yuʼun ya swentainik te aʼtelil ini te ya skʼan pasele.
4 Yan te joʼonkotike ya kaʼtelintik skʼoponel Dios sok te aʼtelil yuʼun te scholel skʼop Diose».
5 Spisil te jnopojeletik lek la yaʼiyik te bin la yichʼ alele. Jich yuʼun la stsaik te Esteban, te bayal schʼuunel yoʼtan sok te nojel ta yoʼtan te chʼul espíritu,* soknix te Felipe, Prócoro, Nicanor, Timón, Parmenas sok te Nicolás te talem ta Antioquía te yakʼojix sba ta judioil.
6 La yikʼik bael ta stojol te jpuk-kʼopetik, te kʼalal skʼoponojikix-a te Diose, la skajan skʼab ta stojolik.
7 Ta swenta-abi, jich pujkxan bael te skʼop Diose sok bayal mo yajtalul te jnopojeletik ta Jerusalén. Bayal sacerdoteetik jajch yakʼ schʼuunel yoʼtanik.
8 Te Esteban leknax ilbil yuʼun te Diose sok ay yuʼel ta spasel mukʼul milagroetik* sok mukʼul aʼteliletik ta yolil te lume.
9 Pero, ay chaʼoxtul winiketik te ayik ta sinagoga te sbiilinojik te Libre ayike sok ay chaʼoxtul te talemik ta Cirene, Alejandría, Cilicia sok ta Asia, bajt stijik ta kʼop te Esteban.
10 Pero maba juʼ yuʼunik stsalel ta kʼop ta skaj te ay spʼijil yoʼtan sok te nojel ta yoʼtan te chʼul espíritu* te kʼalal ya xkʼopoje.
11 Jich yuʼun, muken la stijbeyik yoʼtan chaʼoxtul winiketik yuʼun jich ya yalik: «Kaʼiyojkotik stojol te la sbolkʼoptay te Moisés sok te Diose».
12 Jich la sjachbeyik yoʼtan te lume, te jwolwanejetik yuʼun te judioetik sok te escribaetike. Ta repentenax kʼotik te banti ay te Esteban, la sjumtayik ta tsakel sok la yikʼik bael ta stojol te Sanedrín.
13 Tey la stejkʼanik lotil testigoetik te jich la yalike: «Te winik ini ma xkom ta sbolkʼoptayel te chʼul templo sok te Leye.
14 La kaʼiykotik te yak ta yalel te ya sjin te templo te Jesús te Nazarenoe sok te yalaj sjelbotik te costumbreetik te la yakʼbotik jilel te Moisese».
15 Spisil te machʼatik nakajtik ta Sanedrín te kʼalal la yilbeyik te sit yelaw te Esteban jich la yilbeyik te bin-utʼil sit yelaw jtul chʼul-abat.
Notaetik
^ Ta griego: «señailetik».
