Te lek yach’il k’op ya yal te Juan 18:1-40
-
Te Judas la yakʼ ta kʼabal te Jesús (1-9)
-
Te Pedro la stuuntes te espada (10, 11)
-
La yikʼik bael te Jesús ta stojol te Anás (12-14)
-
Te sbabial buelta kʼalal te Pedro la smuk ta yoʼtan te Jesús (15-18)
-
Te Jesús ay ta stojol te Anás (19-24)
-
Te schebal sok te yoxebal buelta kʼalal te Pedro la smuk ta yoʼtan te Jesús (25-27)
-
Te Jesús ay ta stojol te Pilato (28-40)
-
Te Wentainel kuʼun ma liʼuk ay ta balumilal (36)
-
18 Te kʼalal laj yoʼtan ta yalel ini, te Jesús bajt sok te jnopojeletik yuʼun ta jejch be jaʼ yuʼun Cedrón, och bael sok te jnopojeletik yuʼun te banti ay awal tsʼunubiletik.
2 Te Judas, te j-akʼaw ta kʼabale, jaʼnix jich yiloj te lugar-abi, melel te Jesús kʼayem-a te tey ya stsob sba sok-a te jnopojeletik yuʼune.
3 Jich yuʼun, te Judas yikʼoj kʼoel jtsojb soldadoetik sok te jkananetik yuʼun te jwolwanej sacerdoteetik soknix te fariseoetik. Stuchtiklanoj kʼoel skʼajkʼik, slamparaik sok yaʼtejibik.
4 Te bitʼil snaʼojix-a te Jesús te bin ya xkʼot ta pasele, noptsaj* bael ta stojolik sok jich la sjojkʼoy: «¿Machʼa ya aleik?».
5 Jich la yalik: «Jaʼ te Jesús te Nazarenoe». «Joʼon-abi», xchi te Jesús. Te Judas, te j-akʼaw ta kʼabale, tey jokinbilik yuʼun-a.
6 Pero, te kʼalal la yal te Jesús «Joʼon-abi», walakʼpat sujtik sok yalik ta lum.
7 Jaʼ yuʼun, jich la schaʼjojkʼoy te Jesús: «¿Machʼa ya aleik?». Jich la yalik: «Jaʼ te Jesús te Nazarenoe».
8 Jich albotik yuʼun te Jesús: «La kalbeyexix te joʼone. Jaʼ yuʼun, teme joʼon ya aleonike, akʼaik bael te winiketik ini».
9 Jich la spas te Jesús yuʼun jich ya xkʼot ta pasel te bin yalojix-ae: «Ma la jchʼay jtuluk te machʼatik la awakʼbone».
10 Tey-abi, te Simón Pedro la slokʼes tal te espada te yichʼoje, la sbojbey lokʼel te swaʼel chikin te yabat te mukʼul sacerdotee. Malco sbiil te j-abate.
11 Pero, te Jesús jich la yalbey te Pedro: «Otsesa ta yawil te espadae. ¿Yuʼunbal ma puersauk ya skʼan ya kuchʼ te bin ay ta copa* te yakʼojbon te Tatile?».
12 Jich yuʼun, te soldadoetik, te comandante yuʼun te soldadoetik sok te jkananetik yuʼun te judioetik la stsakik bael te Jesús sok la schukik.
13 Jaʼ nail la yikʼik bael ta stojol te Anás, melel jaʼ snial mamal te Caifás, te jaʼ ochem ta mukʼul sacerdote ta jaʼbil-abi.
14 Jaʼnix te Caifás te la yalbey te judioetik te jaʼ lekxan te jtulnax winik ya xlaj ta swenta te lume.
15 Tey-abi, te Simón Pedro sok te yan jnopojel la stʼunik bael te Jesuse. Te jnopojel-abi naʼbil sba yuʼun te mukʼul sacerdote, jich yuʼun och bael sok te Jesús ta yamakʼul sna te mukʼul sacerdote,
16 yan stukel te Pedroe tekʼel jilel ta tiʼnail. Jich yuʼun, te jnopojel te naʼbil sba yuʼun te mukʼul sacerdote tal skʼopon te ants te ya skanantay te tiʼnaile, jich la yikʼ ochel te Pedroe.
17 Tey-abi, te j-abat ants te jaʼnix te jkanantiʼnaile jich la sjojkʼoybey te Pedro: «¿Mabal jaʼuk jnopojelat yuʼun-euk te winik ini?». Jich la yal te Pedro: «Maʼuk, ma joʼukon».
18 Te bitʼil ay sik-a, te j-abatetik sok te jkananetik la stsumik kʼajkʼ sok tekʼajtik ta sjoyobal ta skʼatinel. Tey yak ta skʼatinel kʼajkʼ-euk-a te Pedroe.
19 Te jwolwanej yuʼun te sacerdoteetik* la sjojkʼoybey te Jesús ta swenta te jnopojeletik yuʼun sok ta swenta te bin ya yakʼ ta nopele.
20 Jich la yal te Jesús: «Kʼopojon ta komonsitil ta stojol spisil te ants winiketike. Spisil-ora nojpteswanon ta sinagogaetik sok ta templo, te banti ya stsob sbaik spisil te judioetik, maʼyuk bin muken la kalbey skʼoplal.
21 ¿Bin yuʼun te joʼon ya ajojkʼoybone? Jaʼ xa ajojkʼoybey te machʼatik la yaʼiyik stojol te bin la kale. Ilawil, inba ayik, jaʼ snaʼojik te bin la kale».
22 Kʼalal jich la yal te Jesuse, ay jtul jkanan te tekʼel tey-a te la spakʼbey ta majel yelaw te Jesús sok jich la yalbey: «¿Jichbal ya asutbey skʼop te jwolwanej yuʼun te sacerdoteetike?».
23 Jich la yal te Jesús: «Teme ay bin ma lek la kale, albon kaʼiy bin-a; pero teme smelelil te bin la kale, ¿bin yuʼun te ya amajone?».
24 Tey-abi, te Anás chukul la stikun bael te Jesús ta stojol te Caifás te mukʼul sacerdote.
25 Te kʼalal tekʼelto ta skʼatinel kʼajkʼ-a te Simón Pedroe, jich la yichʼ jojkʼoybeyel: «¿Mabal jaʼuk jnopojelat yuʼun-euk?». Te Pedro la smuk ta yoʼtan. Jich la yal: «Maʼuk, ma joʼukon».
26 Ay jtul yabat te mukʼul sacerdote te ay bin yutoj sba sok te winik te la sbojbey lokʼel schikin te Pedroe, jich la yalbey te Pedro: «¿Mabal lajuk kilat sok te winik ini te banti tsʼunbil te awal tsʼunubiletike?».
27 Pero, te Pedro la schaʼmuk ta yoʼtan, ta oranax-abi, okʼ te tat mute.
28 Jich yuʼun la yikʼik lokʼel ta sna Caifás te Jesús, la yikʼik bael ta spalacio te gobernador —yakix ta sakubel kʼinal-a—, pero maba ochik bael stukelik ta spalacio te gobernador yuʼun jich maba ya sbolobtes sbaik-a sok jich ya xjuʼ ya sweʼik-a te weʼelil yuʼun te Kʼin Pascuae.
29 Jaʼ yuʼun lokʼ tal te Pilato te banti ayike sok jich la sjojkʼoy: «¿Bin smul awuʼunik te winik ini?».
30 Jich la yalik: «Te manchuk ay bin chopol* spasoj te winik ini, maba la kikʼtik tal ta atojol te jichuke».
31 Jich albotik yuʼun te Pilatoe: «Ikʼaik bael sok chajpanaik jaʼex jich te bin-utʼil ya yal te ley awuʼunike». Jich la yalik te judioetike: «Te joʼonkotike ma xjuʼ te ay machʼa ya jmilkotik».
32 Jich la yalik swenta jich ya xkʼot ta pasel ta swenta te bin la yal Jesús te bin-utʼil ya yichʼ milele.
33 Jich te Pilato chaʼsujt ochel ta spalacio, la yikʼ tal te Jesús sok jich la sjojkʼoybey: «¿Jaʼatbal te ajwalilat yuʼun te judioetike?».
34 Jich la yal te Jesús: «¿Yuʼun-nixbal jaʼ lokʼ tal ta awoʼtan-a te bin ya ajojkʼoye, o aybal yantik machʼa la yalbat jkʼoplal?».
35 Jich la yal te Pilato: «¿Yuʼunbal judioon? Jaʼnix te anacion sok te jwolwanej sacerdoteetik te la yakʼat ta jkʼabe. ¿Bin-a te ma lek apasoje?».
36 Jich la yal te Jesús: «Te Wentainel* kuʼun ma liʼuk ay ta balumilal. Te liʼuk ay ta balumilal te Wentainel kuʼune, la sjachik kʼop te j-abatetik kuʼun swenta maba ya kichʼ akʼel ta skʼab te judioetik te jichuke. Ta melel, te Wentainel kuʼune ma liʼuk ay ta balumilal ini».
37 Jich la sjojkʼoy te Pilatoe: «¿Yuʼun-nixbal ajwalilat-a jiche?». Jich la yal te Jesús: «Jaʼ, jaʼatnix yakat ta yalel te ajwalilone. Jaʼ swentail te ayinone* sok jaʼ swentail te talon ta balumilale: yuʼun tal kalbey skʼoplal te smelelil kʼope. Spisil te machʼa ya yichʼ ta mukʼ te smelelil kʼope yame yaʼiybon te jkʼope».
38 Jich la sjojkʼoy te Pilato: «¿Bin-a te smelelil kʼope?».
Kʼalal laj yoʼtan ta yalel ini, chaʼlokʼ bael te banti ay te judioetik sok jich la yaltiklanbey: «Te joʼone maba ya jtabey smul te winik ini.
39 Te jaʼexe jaʼ acostumbreik te ya akoltayik lokʼel jtul jchukel ta yorail te Kʼin yuʼun Pascua. ¿Jaʼbal ya akʼanik te ya jkoltay bael te ajwalil yuʼun te judioetike?».
40 Jich chaʼawunik te judioetike: «¡Maʼuk, ma xa akoltay bael te winik ini! ¡Jaʼ xa akoltay lokʼel te Barrabás!». Pero, te Barrabás jaʼ j-elekʼ.
Notaetik
^ O «jijtsʼ».
^ Te copa jaʼ ya skʼan ya yal te jich la skʼan Dios te jich ya yichʼ milel te Jesús ta skaj te la slebeyik smul ta bolkʼoptaywanej.
^ Jaʼ skʼoplal te Anás.
^ O «ma lek».
^ O «pʼejkʼajone», «tojkone».
