Te lek yach’il k’op ya yal te Juan 21:1-25
21 Ta patil, te Jesús la yakʼ sba ta ilel yan buelta ta stojol te jnopojeletik yuʼun ta stsʼeel te Mar yuʼun Tiberíades. Jich la yakʼ sba ta ilel ta stojolik.
2 Sjokinoj sbaik te Simón Pedro, Tomás (te Dídimo ya yalbeyik), Natanael te talem ta Caná te ay ta skʼinal Galilea, te snichʼnab Zebedeo sok chaʼtulxan jnopojeletik yuʼun.
3 Jich albotik yuʼun te Simón Pedro: «Ya xboon ta tsak chay». «Ya xbootik-euk, ya jokinatkotik bael», xchiik te yantike. Jich bajtik, moik ta barco, pero maʼyuk jkojtuk chay la stsakik ta sjunal ajkʼabal-abi.
4 Te kʼalal yakix ta sakubel-a te kʼinale, ay ta stiʼil mar te Jesuse, pero maba la snaʼik te jnopojeletik teme jaʼ te Jesuse.
5 Jich albotik yuʼun te Jesús: «Jnichʼnab, ¿jich yilel te maʼyuk jkojtuk chay atsakojik yuʼun ya aweʼik?». «Maʼyuk», xchiik.
6 Jich albotik yuʼun te Jesús: «Chʼojaik ochel te stsakojibal achayik ta swaʼel te barcoe, jichme ya ataik-a». Te kʼalal la schʼojik ochel te stsakojibal chaye, noj ta bayal chayetik te ma xjuʼix yuʼunik slokʼesel-ae.
7 Te jnopojel te kʼux aʼiybil yuʼun te Jesús jich la yalbey te Pedro: «¡Jaʼ te Kajwaltike!». Te kʼalal la yaʼiy stojol te Simón Pedro te jaʼ te Kajwaltike, la slap skʼuʼ, melel tʼanal-a,* la schʼoj sba ochel ta mar.
8 Pero, te yantik jnopojeletik talik ta chʼin barco stukelik, sjochojik tal te stsakojibal schayik te nojel ta chaye, melel maba namal* ayik ta stiʼil mar; ayniwan 90 metro snamalil ayik-a.
9 Te kʼalal kʼotik ta stiʼil te mare, la yilik te pasbil kʼajkʼ. La yilik te ay chay ta sba akʼal soknix la yilik te ay pane.
10 Jich albotik yuʼun te Jesús: «Ichʼaik tal chaʼoxkojtuk te chay te lajeltonax atsakbelike».
11 Jich te Simón Pedro mo ta barco, la sjoch tal ta lum te stsakojibal chay te nojel ta mukʼul chayetik, ay 153 ta kojt. Manchukme bayal ta kojt, maba tuchʼ te stsakojibal chaye.
12 Jich albotik yuʼun te Jesús: «Laʼikme, laʼ weʼanik». Maʼyuk jtul jnopojel te la skʼan sjojkʼoybey «¿Machʼaat-a?», melel snaʼojik-a te jaʼ te Kajwaltike.
13 Noptsaj* tal te Jesús, la stsak te pan sok la spuktiklanbey te jnopojeletike, jaʼnix jich la spuktiklanbey-euk te chaye.
14 Jaʼix yoxebal buelta te la yakʼ sba ta ilel te Jesús ta stojol te jnopojeletik yuʼun te kʼalal yichʼojix chaʼkuxajtesel ta yolil te machʼatik lajemike.
15 Te kʼalal laj yoʼtanik ta weʼel, te Jesús jich la sjojkʼoybey te Simón Pedro: «Simón te snichʼanat Juan, ¿jaʼbal kʼuxonxan ta awoʼtan-a te bitʼil ini?». Jich la yal te Simón Pedro: «Jaʼ, Kajwal, anaʼoj te kʼuxat ta koʼtane». Jich albot yuʼun te Jesús: «Makʼlinbon te tuminchijetik kuʼune».
16 Jich jojkʼoybotxan yuʼun ta schebal buelta: «Simón te snichʼanat Juan, ¿kʼuxonbal ta awoʼtan?». Jich la yal te Simón Pedro: «Kʼux, Kajwal, anaʼoj te kʼuxat ta koʼtane». Jich albot yuʼun te Jesús: «Kanantaybon te chʼin tuminchijetik kuʼune».
17 Jich jojkʼoybot yuʼun ta yoxebal buelta: «Simón te snichʼanat Juan, ¿akʼanojonbal?». Te Pedro la smel yoʼtan yuʼun te bitʼil yoxebalix buelta te jich jojkʼoybot yuʼune «¿Akʼanojonbal?». Jaʼ yuʼun, jich la yal: «Kajwal, anaʼoj spisil; anaʼoj te jkʼanojate». Jich albot yuʼun te Jesús: «Makʼlinbon te chʼin tuminchijetik kuʼune.
18 Jamal ya kalbat, te kʼalal keremat-to-ae, jaʼatnix ya alap te akʼuʼe sok bayuk ya xbaat te banti ya akʼane; pero te kʼalal ya xmamalubat yame ajach akʼab sok yan machʼa ya yakʼbatix alap te akʼuʼe sok ya yikʼat bael te banti maba ya akʼane».
19 Jich la yal ini yuʼun jich ya yakʼ ta naʼel te bin lajel ya xkʼot ta stojol te Pedro yuʼun jich ya yichʼ albeyel yutsilal-a te Diose. Te kʼalal jich la yalbey yaʼiye, la yalxan: «Mame xa akom aba ta atʼunbelon».
20 Te Pedro la sut sba sok la yil te yak ta talel ta spatik te jnopojel te kʼux aʼiybil yuʼun te Jesuse, jaʼnix te machʼa la spajkan sba ta stan te Jesús te kʼalal yakik ta weʼel-a sok te jich la sjojkʼoybey «Kajwal, ¿machʼa-a te ya yakʼat ta kʼabale?».
21 Te kʼalal la yil te Pedroe, jich la sjojkʼoybey te Jesús: «Kajwal, ¿bin ya xkʼot ta stojol te winik ini?».
22 Jich albot yuʼun te Jesús: «Teme ya jkʼan te ya xjil liʼi jaʼto te kʼalal ya xchaʼtalone, ¿bin awenta-a? Te jaʼate mame xa akom aba ta atʼunbelon».
23 Jich yuʼun, pujk skʼoplal ta yolil te hermanoetik te maba ya xlaj stukel te jnopojel ini. Pero, te Jesús ma jaʼuk la yalbey te Pedro te maba ya xlaj te jnopojel-abi, te bin la yale jaʼ ini: «Teme ya jkʼan te ya xjil liʼi jaʼto te kʼalal ya xchaʼtalone, ¿bin awenta-a?».
24 Te jnopojel ini jaʼme ya yalbey skʼoplal spisil ini sok te jaʼ la stsʼibay jilele, jich yuʼun ya jnaʼtik te smelelil spisil te bin la yalbey skʼoplale.
25 Ta melel, ay bayal bintikxan la spas te Jesús, te ayuk ya yichʼ tsʼibayel spisile, ya kal te joʼone, maba ya x-och ta balumilal* spisil te balbil junetik te ya yichʼ tsʼibayel te jichuke.
Notaetik
^ O «jtebxanix skʼuʼ-a».
^ O «jakal».
^ O «Jijtsʼ».
^ Jich yaʼiyel te jaʼ skʼoplal te bibliotecaetik ta balumilale.
