Te lek yach’il k’op ya yal te Juan 5:1-47
5 Ta patil, te judioetik la spasik kʼin. Jich yuʼun, te Jesús mo bael ta Jerusalén.
2 Ta Jerusalén, tey ta nopol* Yochibal Tuminchijetik sbiil, ay jun estanque* yuʼun jaʼ te Betzata sbiil ta hebreo, ay joʼeb slejchelul na tey-a.
3 Ta lugar-abi, bayal ta tul jchameletik metsajtik tey-a, jich bitʼil te machʼatik ma xyilik kʼinal, koxoetik sok te machʼatik chamen schial yok skʼabik.
4 *
5 Ay jtul winik tey-a te ayix 38 jaʼbil te ay ta chamele.
6 Kʼalal te Jesús la yil te winik te metsel tey-a sok te la snaʼ te ayix bayal jaʼbil ay ta chamele, jich la sjojkʼoybey: «¿Yabal akʼan ya xlekubat?».
7 Jich la yal te winik te ay ta chamele: «Kajwal, maʼyuk machʼa ay kuʼun yuʼun ya yotseson ta estanque* te kʼalal ya syukʼ sba te jaʼe. Ta jujun buelta te ya jkʼan ya x-ochone, ay machʼa nailajix kuʼun-a».
8 Jich albot yuʼun te Jesús: «Jajchan, kʼecha bael te awayibe, beenan».
9 Jich oranax lekub te winike, la skʼech bael te swayibe sok jajch ta beel. Jaʼ skʼajkʼalel sábado-a.
10 Jich yuʼun, te judioetik jich jajch yalbeyik te winik te la yichʼ lekubtesele: «Ma xjuʼ ya akʼech bael awayib, melel skʼajkʼalel sábado ayotik».
11 Pero, jich la yal te winike: «Te winik te la slekubteson jich la yalbon ‹Jajchan, kʼecha bael te awayibe, beenan›, xchi».
12 Jich la sjojkʼoybeyik: «¿Machʼa-a te winik te la yalbat ‹Kʼecha bael te awayibe, beenan›, te xchie?».
13 Pero, te winik te lekubenixe ma la snaʼ machʼa-a, melel te Jesús la schʼay sba ta yolil te ants winiketik te tey ayik-ae.
14 Ta patil, te Jesús la sta ta templo te winike sok jich la yalbey: «Ilawil, lekubatix yuʼun te achamele. Mame xa alexan amul, mame jaʼuk te kʼaxtoxan ya ata awokole».
15 Jich bajt te winike, la yalbey yaʼiy te judioetik te jaʼ lekubtesot yuʼun te Jesuse.
16 Jaʼ swentail te jajch skontrainik te Jesús te judioetike, melel jich la spastiklan ta skʼajkʼalel sábado.
17 Pero, jich la yalulan te Jesús: «Te jTate yaknanix ta aʼtel stukel-a, jaʼnix jichon yakon-nanix ta aʼtel-euk-a».
18 Ta swenta-abi, te judioetik la sleikxan te bin-utʼil ya smilik te Jesuse, melel la skuyik te ma jaʼuknax ma la yichʼ ta mukʼ te skʼajkʼalel sabadoe, jaʼnix jich la skuyik te la spajaltay sba sok te Dios kʼalal la yal te jaʼ sTat te Diose.
19 Jaʼ yuʼun, te Jesús jich la yaltiklanbey: «Jamal ya kalbeyex te maʼyuk bin ya xjuʼ ya spas ta stukel oʼtan-nax te Nichʼanile. Jaʼnax ya spas te bin ya yil te ya spas te Tatile. Melel spisil te bintik ya spas te Tatile, jichnix ya spas-euk te Nichʼanile.
20 Melel te Tatil kʼux ta yoʼtan te Nichʼanile sok ya yakʼbey snop spisil te bintik ya spase, sok yatome x-akʼbotxan yil mukʼul aʼteliletik te bitʼil ini swenta chamnax awoʼtanik* ya xjilex yuʼun.
21 Jich bitʼil te Tatil te ya schaʼkuxajtes te machʼatik lajemike, jaʼnix jich-euk te Nichʼanil ya yakʼbey skuxlejal te machʼa ya skʼan ya yakʼbeye.
22 Melel te Tatile maʼyuk machʼa ya yichʼ ta kʼop yuʼun smul, jaʼ yakʼojbeyix ta skʼab te sNichʼan spisil te aʼtelil-abi,
23 swenta spisil te ants winiketik ya yichʼik ta mukʼ te Nichʼanil jich bin-utʼil ya yichʼik ta mukʼ te Tatile. Te machʼa ma xyichʼ ta mukʼ te Nichʼanil, jaʼnix jich ma xyichʼ ta mukʼ te Tatil te tikunot tal yuʼune.
24 Jamal ya kalbeyex, te machʼa ya yaʼiybon te jkʼope sok te ya schʼuun te machʼa la stikunon tale yame sta skuxlejal sbajtelkʼinal sok maba ya yichʼ ichʼel ta kʼop yuʼun te smule, kʼaxemix yuʼun te lajel, ayix skuxlejal.
25 »Jamal ya kalbeyex te yame sta yorail —yorailix ini— te ya yaʼiybeyik skʼop te sNichʼan te Dios te machʼatik lajemike, te machʼatik la schʼuunbeyik te skʼope yame xkuxinik.
26 Jich bitʼil te Tatil ay yuʼel yuʼun ya yakʼ kuxlejalil, jaʼnix jich yakʼojbey yuʼel te Nichʼanil yuʼun ya yakʼ kuxlejalil-euk.
27 Sok yakʼojbey yaʼtel yuʼun ya yichʼ ta kʼop te ants winiketik, melel jaʼ te sNichʼan te Winike.*
28 Mame chamuknax awoʼtanik* yuʼun ini, melel yame sta yorail te spisil te machʼatik ayik ta mukenal* yame yaʼiybeyik te skʼope
29 sok yame xlokʼik tal: te machʼatik la spasik te bintik leke yame xchaʼkuxajik yuʼun ya yichʼ skuxlejalik, yan te machʼatik la spasik te bintik chopole* yame xchaʼkuxajik yuʼun ya yichʼik ichʼel ta kʼop.
30 Maʼyuk bin ya xjuʼ ya jpas ta jtukel oʼtan-nax. Ta swenta te bin ya kaʼiy stojole jichme ya x-ichʼawanon ta kʼop, sok stojil te bin-utʼil ya x-ichʼawanon ta kʼope, melel ma jaʼuk ya jpas te skʼanojel koʼtane, jaʼ ya jpasbey skʼanojel yoʼtan te machʼa la stikunon tale.
31 »Te joʼukon-nax ya kalbey jba jkʼoplale, ma smeleliluk te bin ya kal te jichuke.
32 Pero, ay yan machʼa ya yalbon lek jkʼoplal sok jnaʼoj te smelelil te bin ya yal ta jtojole.
33 Te jaʼexe ay machʼatik la atikunik bael ta stojol te Juane, jaʼ la yalbey skʼoplal stukel te bin smelelile.
34 Te joʼone ma jaʼuk ya kichʼ ta wenta te bin ya yal ta jtojol te ants winike, pero ya kalbeyex spisil ini swenta ya ata akolelik.
35 Te Juan jich kʼot bitʼil tsumbil kʼajkʼ te yak ta tilel sok te ya yakʼ sakal kʼinal, pero maʼyuk bayal kʼajkʼal te tseʼelnax awoʼtanik yuʼun te sakal kʼinal la yakʼe.
36 Te bin ya kalbey skʼoplale jaʼ bayalxan yip stukel-a te bin la yalbey skʼoplal te Juane, melel te aʼtelil te la stikunon ta spasel te jTate, jaʼ te aʼtelil te yakon ta spasele, ya yakʼ ta ilel te jaʼ la stikunon tal te Tatile.
37 Te Tatil, te jaʼ la stikunon tal, jaʼ te machʼa yalojbon jkʼoplale. Te jaʼexe maʼyuk bin-ora awaʼiyojbeyik skʼop sok maʼyuk awilojik te bin yilele,
38 sok maʼyuk ta awoʼtanik te skʼope, melel ma xa achʼuunik te machʼa la stikun tale.
39 »Te jaʼexe ya anopik ta lek te sJun Diose, melel ya akuyik te tey ya ataik-a te akuxlejalik sbajtelkʼinal; pero jaʼnix ya yalbon jkʼoplal ini.
40 Manchukme jich-abi, maba ya akʼan ya xtalex ta jtojol swenta ya ata akuxlejalik.
41 Maba ya jkʼan te ya yalbonik yutsil jkʼoplal te ants winiketike.
42 Yan te jaʼexe, jnaʼoj ta lek te maʼyuk skʼuxul awoʼtanik ta stojol te Diose.
43 Te joʼone talemon ta swenta sbiil te jTate, pero te jaʼexe ma xa awichʼonik ta mukʼ. Te ayuk yan te machʼa ya xtal ta swenta te sbiile, ya awichʼik ta mukʼ stukel.
44 ¿Bin-utʼil ya achʼuunonik te jaʼexe, melel jaʼ ya amulanik te talel kʼaxel ya awalbey abaik yutsil akʼoplalik, ma jaʼuk ya aleik te lek akʼoplalik yuʼun te jip jtul smelelil Diose?
45 Mame xa akuyik te joʼon ya jlebeyex amulik ta stojol te Tatile. Te machʼa ya slebeyex amulike jaʼ te Moisés te awakʼoj smukʼul awoʼtanik ta stojole.
46 Ta melel, te yakuk achʼuunik te bin la stsʼibay te Moisés ya achʼuunonik te jichuke, melel jaʼnix la stsʼibaybon jkʼoplal.
47 Pero, teme ma xa achʼuunik te bin la stsʼibaye, ¿bin-utʼil kʼan achʼuunik te bin ya kale?».
Notaetik
^ O «tijil».
^ Jaʼ jun mukʼul yawil jaʼ.
^ Manchukme ya xchiknaj ta cheʼoxeb Bibliaetik te versículo ini, maba ya xchiknaj ta antiguo junetik te ayik ta griego kʼop te naʼbilik sba ta leke.
^ Jaʼ jun mukʼul yawil jaʼ.
^ O «chajpnax ya awilik».
^ O «chajpuknax ya awilik».
^ Jaʼ ya yalbey skʼoplal te smukenal te machʼatik lajemik te ayik ta oʼtanil yuʼun te Diose.
^ O «ma leke».
