Carta yuʼun Judas 1:1-25
1 Joʼon Judason, te j-abaton yuʼun te Jesucristo sok jaʼ yijtsʼinon te Santiago, ya jtsʼibaybeyex te carta ini, jaʼex te ikʼbilex yuʼun te jTatik Dios te kʼuxex ta yoʼtan sok te kanantaybilex swenta jun-nax ya xkʼoex sok te Jesucristoe:
2 Ya jkʼan te yakuk snaʼbeyex-xan yoʼbolil abaik te Dios, te yakuk yakʼbeyex lamalkʼinal sok te kʼuxukex-xan ta yoʼtane.
3 Kermanotak te kʼuxex ta koʼtane, la jpas tulan yuʼun ya jtsʼibaybeyex ta swenta te jkoleltike. Pero, jaʼ lekxan la kil te ya jtsʼibaybeyex yuʼun ya jkʼanbeyex te yakuk apasik tulan te manchuk ya achʼayik te chʼuunel oʼtanil te jun-nax buelta la yichʼik akʼbeyel te machʼatik chʼultesbilike.
4 Jaʼ la jtsʼibaybeyex ta skaj te ay winiketik te muken och ta awolilik te namey albilix ta sJun Dios te castigo ya yichʼike. Jaʼ winiketik te ma xyichʼik ta mukʼ te Diose, maʼyuk skʼexlalik ta skʼaxuntayel mantal,* melel jaʼ ya smak sbaik-a te slekil yoʼtan Dios te ma snujpʼuk ya kichʼtik sok ma junuk yoʼtanik ta stojol te Kajwaltik Jesucristo te jaʼ yuʼunotike.
5 Manchukme anaʼojikix ta lek te bin ya kalbeyexe, ya jkʼan ya jultesbeyex ta awoʼtanik te la skoltay lokʼel Jehová* te lum yuʼun ta Egipto, pero patil la slajin te machʼatik ma la yakʼik ta ilel schʼuunel yoʼtanike.
6 Jaʼnix jich, te chʼul-abatetik te maba la yichʼik ta mukʼ te yaʼtelik la yijkitayik te yawil te banti ayike, jaʼ yuʼun la yichʼik chukel sbajtelkʼinal sok akʼel ta mero ijkʼal kʼinal yuʼun te Dios swenta ya smaliyik te ichʼel ta kʼope.
7 Jichnix bitʼil te Sodoma sok Gomorra sok te mukʼul lumetik te ayik ta sjoyobale la yakʼ sbaik ta spasel mulwej* te ilobtik sba sok jaʼ la spasik te bin ya skʼan te sbakʼetalik te ma jichuk pasbilik yuʼun te Diose. Te bitʼil la yichʼik lajinel ta kʼajkʼ ta sbajtelkʼinal yuʼun te Diose, jaʼ jultesel oʼtanil ta jtojoltik-euk.
8 Manchukme jich snaʼojik te winiketik-abi, jaʼnax baem ta yoʼtanik te ya xwayichajik, ya sbolobtesik te sbakʼetalik sok te sbakʼetal te yantik, ma xyichʼik ta mukʼ te machʼatik yichʼoj mukʼ yaʼtelik, jaʼnix jich ya sbolkʼoptayik te machʼatik lek ilbilik yuʼun te Diose.
9 Kʼalal te arcángel Miguel la stsak sba ta kʼop sok te Pukuj* ta swenta sbakʼetal te Moisés, maʼyuk bin chopol* la yal ta stojol yuʼun ya yakʼbey castigo, jaʼnax jich la yal: «Jaʼme akʼa yichʼat ta kʼop te Jehová»,* xchi.
10 Te winiketik ini ya sbolkʼoptayik te bintik ma snaʼbeyik swentaile. Pero, te bintik ya snaʼbeyik swentaile, jich ya spasik te bin-utʼil te chambalametik te ma snaʼik kʼinal, te jichnax ya spasik te bin kʼayemik ta spasele, jich yakik ta sbolobtesel sbaik-a.
11 ¡Yame yil swokolik! Melel stʼunojbeyik stalel te Caín; yakik ta sleel slekilalik, jaʼ baem ta yoʼtanik stʼunbeyel te schopol talel te Balaam, sok yichʼojik lajinel ta skaj te la stoy sbaik jich bin-utʼil te Coré.
12 Manchukme ya xweʼ ta awolilik te winiketik ini te kʼalal ya apasik kʼin jich bitʼil awermano abaik, jich kʼoemik te bin-utʼil tonetik ta yeʼtal jaʼ te ya xlajinwanik; jaʼnax baem ta yoʼtanik sleel te bin ya skʼan yoʼtanik stukelike; jich kʼoemik te bin-utʼil tokal te maʼyuk yaʼlel te talel kʼaxel ya x-ikʼotik bael yuʼun te ikʼe; pajalik sok teʼetik te ma xyakʼ sitik ta yorail, lajemikix ta jkʼaxel sok bulbilik lokʼel kʼalalto ta slojpʼ o yisim;*
13 jich kʼoemik te bin-utʼil sbul mar te ya smes lokʼel tal ta stiʼil mar te schopolilik te ya skʼan ya xkʼexawik yuʼun; jich kʼoemik te bin-utʼil ekʼetik te jowijemik te la yichʼik akʼel yuʼun Dios ta mero ijkʼal kʼinal te banti ya x-ayinik ta sbajtelkʼinal.
14 Te Enoc, te sjuk-kajal alnichʼan yuʼun te Adán, jaʼnix jich la yal jilel ta stojolik: «¡Ilawil! Talix te Jehová* sok te bayal ta mil chʼul-abatetik yuʼun
15 ta yichʼel ta kʼop spisil te ants winiketik sok ta yakʼbeyel castigo yuʼun smulik spisil te machʼatik ma x-ichʼotik ta mukʼ yuʼune. Jich ya spas te Dios ta skaj te bayal ta chajp mulil ya spasik sok te kʼaxto ya xbolkʼoptayotik yuʼune».
16 Te winiketik ini jaʼik jwulwulkʼopetik te maʼyuk bin lek ya yil ta skuxlejalik sok te jaʼnax baem ta yoʼtanik te bin ya smulan te sbakʼetalike. Nojel ta toyba kʼopetik te yeik, sok ya yutsilkʼoptayik te yantik yuʼun-nax ay bin ya skʼan ya staik-a.
17 Jich yuʼun, kermanotak te kʼuxex ta koʼtane, julukme ta awoʼtanik te bintik yalojik te jpuk-kʼopetik yuʼun te Kajwaltik Jesucristoe.
18 Spisil-ora jich la yalbeyex: «Te kʼalal nopolix* te slajibal kʼajkʼale yame xchiknaj jlabanwanejetik te jaʼnax ya spasik te bin chopol* ya skʼan te yoʼtanike».
19 Jaʼik te machʼatik ya yaʼiyik xatomba ta awolilik; jich stalelik te bin-utʼil chambalametik te maʼyuk skʼoplal ta yoʼtanik te bintik swenta Diose.
20 Jich yuʼun, kermanotak te kʼuxex ta koʼtane, akʼa stsakxan yip te schʼuunel awoʼtanike sok kʼoponaik Dios ta swenta chʼul espíritu,*
21 yuʼun jich ya x-ayinex ta skʼuxul yoʼtan te Diose, jich bitʼil yakex ta smaliyel te yutsil yoʼtan te Kajwaltik Jesucristo te ya sjam te be yuʼun te kuxlejalil ta sbajtelkʼinal.
22 Jaʼnix jich akʼbeyaik yil yutsil awoʼtanik te machʼatik xchebet yoʼtanik;
23 koltayaik lokʼel ta kʼajkʼ. Ay yantik te ya skʼan ya anaʼbeyik yoʼbolil sbae, pero tsajtayame* abaik, pʼajaikme te kʼuʼul pakʼal te bolobtesbil yuʼun te bakʼetalile.
24 Te machʼanax ya xjuʼ ya skanantayex yuʼun ma xyalex ta mulil, jaʼ te Diose. Jaʼ ya skoltayex yuʼun maba ya xyalex, yuʼun maʼyuk awabakulik* sok te ayuk stseʼelil awoʼtanik ta stojol te yutsilale,
25 jaʼnax Dios kuʼuntik stukel, Jkoltaywanej kuʼuntik ta swenta te Kajwaltik Jesucristo, akʼa yichʼ albeyel yutsil skʼoplal, smukʼul yaʼtel sok te sbajtelkʼinal ayuk yuʼel sok te jaʼnax ya xmantalaj stukel, te stalelnanix ay ta sjajchibal-ae, ta ora ini sok ta sbajtelkʼinal. Jichuk.
Notaetik
^ O «toybail ta skʼaxuntayel mantal». Ta griego kʼop, asélgueia. Ilawil ta glosario, Maʼyuk kʼexlalil ta skʼaxuntayel mantal.
^ O «Diablo».
^ O «ma lek».
^ O «yejkʼach».
^ O «tijilix».
^ O «ma lek».
^ O «ilame».
^ O «ma ijkʼubenukex».
