Jueces 1:1-36
1 Te kʼalal lajemix-a te Josué, te israeletik jich la sjojkʼoybeyik te Jehová: «¿Machʼa nail ya xmo bael kuʼuntik yuʼun ya yakʼbey guerra te cananeoetike?».
2 Jich la yal te Jehová: «Jaʼ ya xmo bael te stsʼumbal Judá. Ilawilik, yame kakʼbey ta skʼabik te kʼinal ini».
3 Jich te stsʼumbal Judá jich la yalbey te stsʼumbal Simeón, jaʼ te yermanotake: «Jokinawonkotik moel ta kʼinal te banti la kichʼkotik akʼbeyel ta swenta suerte* yuʼun ya kakʼbeytik guerra te cananeoetike. Ta patil ya jokinexkotik bael ta kʼinal te banti la awichʼik akʼbeyel yuʼun ya kakʼbeytik guerra te machʼatik nainemik tey-ae». Jich te stsʼumbal Simeón la sjokin bael te stsʼumbal Judá.
4 Te kʼalal mo bael ta yakʼel guerra te stsʼumbal Judá, akʼbot ta skʼab yuʼun Jehová te cananeoetik sok te perizitaetik. La smilik 10 mil ta tul winiketik ta Bézec.
5 Ta Bézec la staik te Adoni-Bézec, tey la yakʼbeyik guerra-a sok la stsalik te cananeoetik soknix te perizitaetik.
6 Te kʼalal an bael te Adoni-Bézec, snutsojik bael, la stsakik sok la xotʼbeyik* lokʼel schebal te smeʼ skʼab sok schebal te smeʼ yoke.
7 Jaʼ yuʼun, jich la yal te Adoni-Bézec: «Ay 70 ta tul ajwaliletik te la yichʼik xotʼbeyel* lokʼel te schebal smeʼ skʼabik sok te schebal smeʼ yokik te ya stamik te xejtʼelul weʼelil te ya xchʼay koel ta yeʼtal jmesa. Te bin la jpasbey te ajwaliletike, jaʼ jich la spasbon ta jtojol-euk te Diose». Ta patil la yikʼik bael ta Jerusalén, tey laj-a.
8 Te winiketik yuʼun Judá la yakʼbeyik guerra te Jerusalén sok la yuʼuninik; la slajinik ta espada te mukʼul lum sok la schikʼik.
9 Ta patil, te winiketik yuʼun Judá koik bael ta yakʼbeyel guerra te cananeoetik te nainemik ta witstikil, ta Négueb sok ta Sefelá.
10 Jich yuʼun, te stsʼumbal Judá bajt yakʼbey guerra te cananeoetik te nainemik ta Hebrón (te sbiil ta nailal te Hebrón jaʼ Quiryat-Arbá) sok la smiltiklan te Sesái, Ahimán sok Talmái.
11 Tey-abi bajtik ta yakʼbeyel guerra te yajwalul te Debir (te sbiil ta nailal te Debir jaʼ Quiryat-Séfer).
12 Jich la yal te Caleb: «Te machʼa ya yochintay sok ya yuʼunin te Quiryat-Séfer, ya kakʼbey yinamin te kantsil nichʼan Acsá».
13 Te Otniel snichʼan Quenaz, te yijtsʼin te Caleb, la yuʼunin te mukʼul lume. Jich yuʼun, te Caleb la yakʼbey yinamin te yantsil nichʼan Acsá.
14 Te kʼalal bajtikix ta snaik-ae, te Acsá la yalulanbey te Otniel te yakuk skʼanbey te Caleb te ya x-akʼbot jsejpuk skʼinal. Te Acsá ko ta sburro te banti kajal-ae,* jich jojkʼoybot yuʼun te Caleb: «¿Bin ya akʼan?».
15 Jich la yal te Acsá: «Awokoluk, akʼbon junuk jmajtan te jaʼ señail te awakʼojbon te abendicione. Awakʼojbonix jkʼinal ta stojol sur,* pero jaʼnix jich akʼbon te Gulot-Maim».* Jich te Caleb la yakʼbey te Gulot ta kajal sok te Gulot ta alan.
16 Te stsʼumbal te quenita-winik, jaʼ te snial mamal* te Moisés, lokʼik bael ta mukʼul lum Jericó* sok te stsʼumbal Judá bajtik ta jochol takin kʼinal yuʼun Judá te ay ta stojol sur yuʼun Arad. Tey bajtik-a sok tey jilik ta nainel-a.
17 Pero, te stsʼumbal Judá sok te stsʼumbal Simeón, jaʼ te yermanotake, bajt yakʼbeyik guerra te cananeoetik te ayik ta nainel ta Zefat sok la slajinik ta jkʼaxel te mukʼul lume. Jaʼ swentail te Hormá* la yakʼbeyik sbiilin te mukʼul lume.
18 Ta patil, te stsʼumbal Judá la yuʼunin te mukʼul lum Gaza sok te skʼinal, te mukʼul lum Asquelón sok te skʼinal soknix te mukʼul lum Ecrón sok te skʼinale.
19 Te stsʼumbal Judá la yuʼuninik te witstikil, melel jokinbilik yuʼun te Jehová. Pero maba juʼ yuʼunik stenel lokʼel te machʼatik nainemik ta spamlej, melel ay scarretaik yuʼun guerra te chʼixajtik lokʼel espadaetik ta yokik.*
20 Te Caleb la yichʼ akʼbeyel te Hebrón, jich te bitʼil la yal ta mantal te Moisés, te Caleb la stentiklan lokʼel te oxtul snichʼnab te Anac.
21 Pero, te stsʼumbal Benjamín maba la stentiklanik lokʼel te jebuseoetik te nainemik ta Jerusalén. Jaʼ yuʼun, te jebuseoetik yakikto ta nainel ta Jerusalén sok te stsʼumbal Benjamín jaʼto ta ora ini.
22 Ta yorailnix-abi, te stsʼumbal José moik bael ta yakʼbeyel guerra te Betel, jokinbilik yuʼun te Jehová.
23 Te stsʼumbal José la stikunik bael jtsajtaywanejetik ta Betel. (Te sbiil ta nailal te mukʼul lum jaʼ Luz).
24 Te jtsajtaywanejetik la yilik jtul winik te yak ta lokʼel tal ta mukʼul lum sok jich la yalbeyik: «Awokoluk, ala kaʼiykotik te banti ya xjuʼ ya x-ochotik ta mukʼul lum, jichme ya kakʼtik ta ilel slekil koʼtantik* ta atojol».
25 Jich yuʼun, te winike la yaltiklanbey te jtsajtaywanejetik te banti ya xjuʼ ya x-ochik ta mukʼul lume. Jich la slajinbeyik skʼoplal ta espada te mukʼul lum, pero la yakʼ anukik bael te winik sok spisil te sfamiliae.
26 Te winike bajt ta skʼinal te hititaetik sok la sjach jun mukʼul lum te Luz la yakʼbey sbiilin, jich sbiil jaʼto ta ora ini.
27 Te stsʼumbal Manasés maba la stentiklan lokʼel te yajwalul Bet-Seán sok te lumetik yuʼun te nopol* ayik ni jaʼuk te yajwalul Taanac sok te lumetik yuʼun te nopol ayik ni jaʼuk te yajwalul Dor sok te lumetik yuʼun te nopol ayik ni jaʼuk te yajwalul Ibleam sok te lumetik yuʼun te nopol ayik ni jaʼuk te yajwalul Meguidó sok te lumetik yuʼun te nopol ayik. Pero, te cananeoetik mananix la skʼan lokʼik bael-a ta kʼinal te banti ayik ta nainele.
28 Te kʼalal la yichʼxan yipik te israeletik, la sujik ta spasel tulan aʼtelil te cananeoetik, pero maba la stentiklanik lokʼel ta spisilik.
29 Jaʼnix jich, te stsʼumbal Efraín maba la stentiklan lokʼel te cananeoetik te nainemik ta Guézer. Jich te cananeoetik tey jilik ta nainel ta Guézer ta yolil te stsʼumbal Efraín.
30 Te stsʼumbal Zabulón maba la stentiklan lokʼel te yajwalul Quitrón ni jaʼuk te yajwalul Nahalol. Te cananeoetik tey jilik ta nainel ta yolil te stsʼumbal Zabulón sok la yichʼik sujel ta spasel tulan aʼtelil.
31 Te stsʼumbal Aser maba la stentiklan lokʼel te yajwalul Akkó ni jaʼuk te yajwalul Sidón, Ahlab, Aczib, Helbá, Afic sok te Rehob.
32 Jich bitʼil te maba la stentiklan lokʼel te cananeoetik te nainemik ta kʼinal-abi, te stsʼumbal Aser jilik ta nainel ta yolil te cananeoetik.
33 Te stsʼumbal Neftalí maba la stentiklan lokʼel te yajwalul Bet-Semes ni jaʼuk te yajwalul Bet-Anat. Tey jilik ta nainel ta yolil te cananeoetik te nainemik ta kʼinal-abi sok la sujik ta spasel tulan aʼtelil te yajwalul Bet-Semes sok te yajwalul Bet-Anat.
34 Te amorreoetik la sujik te stsʼumbal Dan yuʼun ya xjilik tey ta witstikil, melel maba akʼotik koel tey ta spamlej.
35 Te amorreoetik maba la skʼanik lokʼik bael tey-a te banti ayik ta nainel ta wits Heres, ta Ayalón sok ta Saalbim. Pero, te kʼalal la yichʼxan yipik te stsʼumbal José, la sujik ta spasel tulan aʼtelil te amorreoetik.
36 Te skʼinal te amorreoetik jajch bael ta moel kʼinal yuʼun Acrabim, kʼax bael k’alal ta Sela, mo bael ta wits.
Notaetik
^ Ta yantik variante «skʼokbeyik».
^ Ta yantik variante «kʼokbeyel».
^ O jaʼniwan ya skʼan ya yal «te la spakʼ skʼab te kʼalal kajalto ta sburro-ae».
^ O «ta Négueb».
^ Te ya skʼan ya yal «te banti ya schʼam sba jaʼ».
^ Ta yantik variante «smamal nial».
^ Ta hebreo: «mukʼul lum yuʼun palmeraetik».
^ Te ya skʼan ya yal «te la yichʼ akʼel ta lajinel».
^ Ta hebreo: «carretaetik te pasbilik ta hierro».
^ Ta hebreo: «ya kakʼtik ta ilel te skʼuxul koʼtantik te ma x-ijkitaywan».
^ Ta yantik variante «tijil».
