Jueces 10:1-18
10 Te kʼalal lajemix-a te Abimélec, te Tolá snichʼan Pua, snichʼan Dodó, te talem ta stsʼumbal Isacar, jaʼ och ta juez yuʼun ya skoltay te lum Israel. Ta Samir yak ta nainel-a te ay ta witstikil yuʼun Efraín.
2 Te Tolá och ta juez ta lum Israel 23 jaʼbil. Tey-abi laj sok la yichʼ mukel ta Samir.
3 Jich yuʼun, te Jaír te galaadita-winik och ta juez ta lum Israel 22 jaʼbil.
4 Te Jaír ayin* 30 ta tul snichʼnab te ya xmoik ta 30 ta kojt burroetik sok ay 30 ta pam mukʼul lumetik yuʼunik. Te mukʼul lumetik-abi, Havot-Jaír sbiil jaʼto ta ora ini sok ayik ta skʼinal Galaad.
5 Tey-abi laj te Jaír, la yichʼ mukel ta Camón.
6 Te israeletik jajch spasikxan te bintik ma lek ya yil te Jehová sok jajch yichʼik ta mukʼ te Baaletik, te lokʼombaetik yuʼun Astoret, te diosetik yuʼun te Aram,* te diosetik yuʼun te Sidón, te diosetik yuʼun te Moab, te diosetik yuʼun te ammonitaetik sok te diosetik yuʼun te filisteoetik. La yijkitayik te Jehová sok te abatinel ta stojole.
7 Jich yuʼun, te Jehová bayal ilin ta stojol te israeletik sok la yakʼtiklan* jilel ta skʼab te filisteoetik sok te ammonitaetik.
8 Jich te filisteoetik sok te ammonitaetik bayal la yutsʼinik* te israeletik sok la yakʼbeyik swokol ta jaʼbil-abi. La yakʼbeyik swokol 18 jaʼbil spisil te israeletik te nainik ta jejch Jordán te jaʼ skʼinalik-a te amorreoetik ta Galaad.
9 Jich te ammonitaetik kʼaxik bael ta mukʼul jaʼ Jordán yuʼun ya yakʼbeyik guerra te stsʼumbal Judá, te stsʼumbal Benjamín sok te stsʼumbal Efraín. Jich yuʼun, bayal la yil swokol te lum Israel.
10 Jaʼ yuʼun, te israeletik la skʼanbeyik te Jehová te yakuk xkoltayotik yuʼune. Jich la yalik: «La jta jmulkotik ta atojol, melel la kijkitayatkotik jilel, jaʼat te Diosat kuʼuntike, jaʼ la kichʼtik ta mukʼ te Baaletik».
11 Pero, te Jehová jich la yalbey te israeletik: «¿Mabal joʼukon la jkoltayex lokʼel ta stojol te egipcioetik, amorreoetik, ammonitaetik, filisteoetik,
12 sidonioetik, amalequitaetik sok te madianitaetik te kʼalal la yakʼbeyex awokolike? Te kʼalal la akʼanbonik koltayel, joʼon la jkoltayex lokʼel tal ta skʼabik.
13 Pero, te jaʼexe la awijkitayonik sok la awichʼik ta mukʼ yantik diosetik. Jaʼ yuʼun, maba ya jkoltayexix.
14 Baan, kʼanbeyaik koltayel te diosetik te la atʼunike; jaʼ akʼa skoltayex ta yorail awokolik».
15 Pero, te israeletik jich la yalbeyik te Jehová: «Jtaoj jmulkotik ta atojol. Pasa ta jtojolkotik te bin lek ya awil atukele. Pero, awokoluk, koltayawotik ta ora ini».
16 Jich la slokʼesik bael ta stojolik te diosetik yuʼun te jyanlumetik sok jajch yichʼik ta mukʼ yan buelta te Jehová. Jich te Diose ma kujchix yuʼun te jaʼnax la yilbey swokol te lum Israel.
17 Ta patil, te ammonitaetik la yichʼik tsobel tal sok la spas scampamentoik ta Galaad. Te israeletik jaʼnix jich la stsob sbaik-euk sok la spas scampamentoik ta Mizpá.
18 Te machʼatik nainemik ta Galaad sok te machʼatik yichʼoj mukʼ yaʼtelik talel kʼaxel jich la yalbey sbaik: «¿Machʼa ya xjuʼ ya stojobtesotik ta yakʼbeyel guerra te ammonitaetik? Jaʼ akʼa ochuk ta jwolwanej yuʼun spisil te machʼatik nainemik ta Galaad».
Notaetik
^ Ta yantik variante «pʼejkaj», «tojk».
^ O «Siria».
^ Ta hebreo: «chonotik».
^ Ta yantik variante «yilbajinik».
