Jueces 11:1-40
11 Te Jefté jaʼ jtul galaadita-winik te bayal yip ta yakʼel guerra. Jaʼ yal jtul j-antsinel* ants sok Galaad sbiil te state.
2 Pero, te yinam te Galaad jaʼnix jich ayin* yal snichʼnab sok. Te kʼalal chʼiik te snichʼnab, la stenik lokʼel te Jefté sok jich la yalbeyik: «Maʼyuk bin ya awichʼ akʼbeyel jilel liʼ ta sna te jtatike, melel yalat yan ants».
3 Jaʼ yuʼun, te Jefté lokʼ bael ta anel ta stojol te sbankil yijtsʼinab sok jil ta nainel ta skʼinal Tob. Chaʼoxtul chʼajil winiketik la stʼunik bael te Jefté.
4 Ta patil, te ammonitaetik jajch yakʼbeyik guerra te israeletik.
5 Kʼalal te ammonitaetik jajch yakʼbeyik guerra te lum Israel, te jwolwanejetik yuʼun te Galaad oranax bajt yikʼik sujtel tal te Jefté te ay ta skʼinal Tob.
6 Jich la yalbeyik te Jefté: «Laʼ, ya jkʼankotik te jaʼat ya x-ochat ta comandante kuʼunkotik yuʼun ya xjuʼ ya kakʼbeytik guerra te ammonitaetik».
7 Pero, te Jefté jich la yalbey te jwolwanejetik yuʼun Galaad: «¿Mabal jaʼukex te la apʼajonik te jich la atenonik lokʼel ta sna te jtate? ¿Bin yuʼun ya xtal aleonik ta ora ini te kʼalal ayex ta wokole?».
8 Tey-abi, te jwolwanejetik yuʼun te Galaad jich la yalbeyik te Jefté: «Jaʼ swentail te tal jleatkotik ta ora ini. Teme ya ajokinonkotik bael sok ya awakʼbey guerra te ammonitaetik, jaʼ ya x-ochat ta jwolwanej yuʼun spisil te machʼatik nainemik ta Galaad».
9 Jich la yalbey te jwolwanejetik yuʼun te Galaad: «Teme ya awikʼonik sujtel yuʼun ya kakʼbey guerra te ammonitaetik sok jaʼ ya skoltayon te Jehová ta stsalel, jich ya x-ochon ta jwolwanej awuʼunik».
10 Te jwolwanejetik yuʼun te Galaad jich la yalbeyik te Jefté: «Jaʼ testigo akʼa kʼotuk kuʼuntik te Jehová teme maba ya jpastik te bin la awale».
11 Jich bajt te Jefté sok te jwolwanejetik yuʼun te Galaad, te lume la yotsesik ta jwolwanej sok ta comandante yuʼunik. Te Jefté la schaʼyal ta stojol Jehová ta Mizpá spisil te bin yalojix-ae.
12 Jich yuʼun, te Jefté la stikun winiketik ta stojol te ajwalil yuʼun te ammonitaetik ta yalel jich ini: «¿Bin jpasojbat te ya xtal awakʼ guerra ta jkʼinale?».
13 Te ajwalil yuʼun te ammonitaetik jich la yalbeyik te winiketik yuʼun te Jefté: «Te kʼalal lokʼik tal te israeletik ta Egipto, la yuʼuninbonik te jkʼinal te jach tal ta Arnón jaʼto kʼalal ta Jaboc, kʼot kʼalal ta Jordán. Jaʼ yuʼun sutbon te jkʼinal ta slekilal».
14 Pero, te Jefté la schaʼtikun winiketik ta stojol te ajwalil yuʼun te ammonitaetik,
15 jich la yalbey ini:
«Jaʼ jich la yal tal te Jefté: ‹Te lum Israel maba la yichʼbey te skʼinal te moabitaetik ni jaʼuk te skʼinal te ammonitaetik.
16 Te kʼalal lokʼik tal ta Egipto te israeletik, beenik ta jochol takin kʼinal jaʼto kʼalal ta mar Rojo, kʼotik ta Cadés.
17 Jaʼ yuʼun, te lum Israel la stikun winiketik ta stojol te ajwalil yuʼun Edom ta yalbeyel jich ini «Awokoluk, akʼawonkotik kʼaxel ta akʼinal». Pero, te ajwalil yuʼun Edom maba la yakʼ kʼaxel. Jaʼnix jich la yalbeyik te ajwalil yuʼun Moab, pero maba akʼotik kʼaxel-euk. Jich yuʼun, te lum Israel jilik ta Cadés.
18 Te kʼalal beenik kʼaxel ta jochol takin kʼinal, maba kʼaxik ta skʼinal Edom sok ta skʼinal Moab. Beenik kʼaxel ta stiʼil skʼinal Moab ta stojol slokʼib kʼajkʼal sok la spas scampamentoik ta skʼinal Arnón, maba ochik bael ta skʼinal te Moab, melel te Arnón jaʼ stiʼil skʼinal te Moab.
19 »›Tey-abi, te lum Israel la stikun winiketik ta stojol te Sehón, te ajwalil yuʼun te amorreoetik, te swentainoj-a te Hesbón, jich la yalbey: «Awokoluk, akʼawonkotik kʼaxel ta akʼinal yuʼun jich ya xkʼootik ta jkʼinalkotik».
20 Pero, te Sehón la skuy te ma jaʼuknax ya skʼan ya xkʼaxik ta skʼinal te israeletike, jich yuʼun maba la yakʼ kʼaxel. Te bin la spase jaʼ te la stsob tal spisil te swiniktak, la spas scampamento ta Jáhaz sok la yakʼbey guerra te lum Israel.
21 Te kʼalal jich la yil te Jehová te Dios yuʼun Israel, la yakʼbey ta skʼab te israeletik te Sehón sok spisil te lum yuʼune. Te israeletik la stsalik te amorreoetik sok la yuʼuninbeyik spisil te skʼinal te banti smakojik-ae.
22 Jich la yuʼuninik spisil te skʼinal te amorreoetik te jach tal ta Arnón jaʼto kʼalal ta Jaboc soknix te jach tal ta jochol takin kʼinal te kʼot kʼalal ta Jordán.
23 »›Te Jehová te Dios yuʼun Israel jaʼ te machʼa la stentiklan lokʼel te amorreoetik ta stojol te lum yuʼune. Jich yuʼun, ¿jaʼatbal ya xtal apojbey skʼinal te israeletike?
24 ¿Mabal jaʼuk ya awichʼ jilel spisil te bin ya yakʼbat te Kemós te dios awuʼune? Jaʼnix jich, te joʼonkotik ya jtentik lokʼel machʼauk-a te la sten lokʼel ta jtojoltik te Jehová te Dios kuʼuntike.
25 ¿Jaʼatbal ya xjuʼ awuʼunxan tsalaw-a te bitʼil te Balac snichʼan Zipor, te ajwalil yuʼun Moab? ¿Labal sten sba ta kʼop sok te israeletik, o labal yakʼbey guerra?
26 Te lum Israel ayix 300 jaʼbil te yak ta nainel ta Hesbón sok ta lumetik yuʼun te nopol* ayik, ta Aroer sok ta lumetik yuʼun te nopol ayik soknix ta spisil te mukʼul lumetik te ay ta stiʼiltiʼil te Arnón. Te jayeb tiempo kʼaxix tale, ¿bin yuʼun ma la apasik tulan yuʼun ya achaʼwichʼik te lumetik-abi?
27 Te joʼone maʼyuk jtaoj jmul ta atojol, pero te jaʼate ma lek te bin ya apas te bitʼil ya akʼan ya awakʼbon guerrae. Te Jehová, te jaʼ Juez stukel, jaʼ akʼa schajpan te israeletik sok te ammonitaetik›».
28 Pero, te ajwalil yuʼun te ammonitaetik ma la yichʼ ta wenta te bin la yal te Jefté.
29 Jich yuʼun, te espíritu yuʼun te Jehová jul ta stojol te Jefté, jich kʼax bael ta skʼinal Galaad sok ta skʼinal Manasés yuʼun bajt ta Mizpé te ay ta skʼinal Galaad. Teyto jajch yakʼbey tal guerra-a te ammonitaetike.
30 Te Jefté jich jamal la yalbey te Jehová: «Teme ya akoltayon ta stsalel* te ammonitaetik,
31 te machʼa ya xlokʼ staon ta stiʼ jna te kʼalal ya sujton tal ta stsalel te ammonitaetik, jaʼ awuʼun ya xkʼot, Jehová. Yame kakʼbat ta atojol jich te bin-utʼil chikʼbil majtanil».*
32 Te Jefté bajt yakʼbey guerra te ammonitaetik, jich te Jehová la yakʼtiklanbey ta skʼab.
33 Te Jefté la smiltiklan te ammonitaetik ta Aroer jaʼto kʼalal ta Minit —la yuʼunin 20 ta pam mukʼul lumetik— sok kʼot kʼalal ta Abel-Keramim. Kʼax bayal machʼatik lajik. Jich te ammonitaetik la yichʼik uʼuninel yuʼun te israeletike.
34 Te kʼalal sujt tal ta sna te Jefté ta Mizpá, ¡jaʼ lokʼ tal ta tael yuʼun te yantsil nichʼan te yak ta ajkʼot sok yak ta stijel te pandereta! Jip jtul yantsil nichʼan-a. Maʼyuk skerem nichʼan ni maʼyuk yan yantsil nichʼan.
35 Te kʼalal la yil te yantsil nichʼan, la schʼiʼ* te skʼuʼe sok jich la yalbey: «¡Aay, kantsil nichʼan! Jkʼaxel ya spichʼ sba koʼtan awuʼun, melel jaʼat te machʼa namal* la jtikune. Ay bin jamal la kalbey ta stojol te Jehová te ya jpase* sok ma xjuʼ ya jsutix te jkʼope».
36 Pero, jich albot yuʼun te yantsil nichʼane: «Jtat, teme ay bin jamal la awalbey te Jehová te ya apase, kʼotesa ta pasel te bin jamal la awal te ya apas ta jtojole, melel te Jehová la yakʼbat ta akʼab te akontratak, jaʼ te ammonitaetike».
37 Jaʼnix jich la yalbey te state: «Jun-nax te bin ya jkʼanbate: akʼawon bael cheb u ta witstikil, akʼawon bael sok te kamigatak ta yokʼetayel te bitʼil maʼyuk bin-ora ya xnujpunone».
38 Te Jefté jich la yal: «Jichuk, baan». Jich la yakʼ bajtuk cheb u ta witstikil, bajt sok te yamigatak ta witstikil ta yokʼetayel te bitʼil maʼyuk bin-ora ya xnujpune.
39 Te kʼalal kʼaxix-a te cheb ue, sujt tal ta sna te state, jich te Jefté la skʼotes ta pasel te bin jamal la yal ta stojol Dios te ya spase. Te yantsil nichʼan te Jefté maʼyuk bin-ora la sjokin ta wayel jtul winik. Jich te lum Israel kʼayik ta spasel ini:
40 te achʼixetik yuʼun te lum Israel, chaneb kʼajkʼal ta jujun jaʼbil ya xbajt yutsilkʼoptayik te yantsil nichʼan te Jefté te galaadita-winik.
Notaetik
^ Ta yantik variante «jmulawil».
^ Ta yantik variante «pʼejkaj», «tojk».
^ Ta yantik variante «tijil».
^ O «ya awakʼbon ta jkʼab».
^ Jich yilel te jaʼ ya skʼan ya yal te jaʼnax la yakʼ ta abatinel ta stojol te Diose.
^ Ta yantik variante «xetʼ».
^ Ta yantik variante «jakal», «kʼubul».
^ Ta hebreo: «la jam ke».
