Jueces 12:1-15
12 Jich yuʼun la yichʼik ikʼel tal te winiketik yuʼun te stsʼumbal Efraín. Kʼaxik tal ta Zafón* sok jich la yalbeyik te Jefté: «¿Bin yuʼun maba la awalbonkotik te kʼalal kʼaxex liʼi yuʼun bajt awakʼbeyik guerra te ammonitaetike? Ya jchikʼtik te ana sok ya jchikʼatkotik ta yutil».
2 Pero, jich albotik yuʼun te Jefté: «Te joʼon sok te jlumale jajch tulan kʼop kuʼuntik sok te ammonitaetike. La jkʼanbeyex koltayel, pero maba la akoltayonkotik lokʼel ta skʼabik.
3 Te kʼalal la kil te maba tal akoltayonike, la jlokʼes jba ta koʼtan, jich bajt kakʼbey guerra te ammonitaetike, te Jehová la yakʼtiklanbon ta jkʼab. Jaʼ yuʼun, ¿bin yuʼun te ya xtal awakʼbon guerrae?».
4 Tey-abi, te Jefté la stsob tal spisil te winiketik yuʼun Galaad sok la yakʼbey guerra te stsʼumbal Efraín. Te winiketik yuʼun Galaad la stsalik te Efraín te jich yalojik-ae: «Jaʼex, te lokʼex tal ta anel ta stsʼumbal Efraín, te galaadita-winikex, te ayex ta nainel ta skʼinal te stsʼumbal Efraín sok te Manasés».
5 Te winiketik yuʼun Galaad kʼotik ta sbelal Jordán ta be jaʼetik te kʼalal mato xkʼotik-a te winiketik yuʼun Efraín. Te kʼalal ya skʼan ya x-anik bael te winiketik yuʼun Efraín, jich ya yalik «Akʼawon kʼaxel». Jaʼ yuʼun, te winiketik yuʼun Galaad jich ya sjojkʼoybeyik ta jujuntul «¿Talematbal ta stsʼumbal Efraín?». Te kʼalal «Maʼuk», xchie,
6 jich ya yalbeyik «Ala kaʼiykotik shibolet». Pero, teme «Sibolet», xchie, ya stsakik sok ya smilik tey ta sbelal be jaʼetik yuʼun te Jordán ta skaj te ma xlokʼ ta alel yuʼunik te kʼopil-abi. Ta yorail-abi la smilik 42 mil ta tul winiketik yuʼun Efraín.
7 Te Jefté te galaadita-winik wakeb jaʼbil och ta juez ta lum Israel. Te kʼalal laj te Jefté, la yichʼ mukel ta Galaad te jaʼ slumale.
8 Te kʼalal lajemix-a te Jefté, jaʼ och ta juez ta lum Israel te Ibzán te talem ta Belén.
9 Ayin* 30 ta tul skerem nichʼnab sok 30 ta tul yantsil nichʼnab. La yakʼ nujpunuk te yantsil nichʼnab sok winiketik te talemik ta yan familia sok la yikʼ tal 30 ta tul achʼixetik te talemik ta yan familia yuʼun la yakʼ nujpun sok te skerem nichʼnab. Jukeb jaʼbil ayin ta juez ta lum Israel.
10 Ta patil laj te Ibzán sok la yichʼ mukel ta Belén.
11 Te kʼalal lajemix-a te Ibzán, jaʼ och ta juez ta lum Israel te Elón te zabulonita-winik. Lajuneb jaʼbil ayin ta juez ta lum Israel.
12 Tey-abi laj te Elón te zabulonita-winik sok la yichʼ mukel ta Ayalón te ay ta skʼinal Zabulón.
13 Te kʼalal lajemix-a te Elón, jaʼ och ta juez ta lum Israel te Abdón snichʼan Hilel te piratonita-winik.
14 Ayin* 40 ta tul skerem nichʼnab sok 30 ta tul smamatak,* jujunkojt sburroik yuʼun ya skajtajibinik. Waxakeb jaʼbil ayin ta juez ta lum Israel.
15 Tey-abi laj te Abdón snichʼan Hilel te piratonita-winik, la yichʼ mukel ta Piratón te ay ta skʼinal Efraín ta witstikil te jaʼ yuʼun te amalequitaetik.
Notaetik
^ O jaʼniwan ya skʼan ya yal «te kʼaxik bael ta stojol norte».
^ Ta yantik variante «Pʼejkaj», «Tojk».
^ Ta yantik variante «Pʼejkaj», «Tojk».
^ Ta yantik variante «yil-al keremetik».
