Jueces 13:1-25
13 Te israeletik jajch schaʼpasik te bintik ma lek ya yil te Jehová. Jaʼ yuʼun, te Jehová la yakʼtiklan jilel ta skʼab te filisteoetik 40 jaʼbil.
2 Ta yorail-abi ay jtul winik te Manóah sbiil, te nainem ta Zorá te talem ta stsʼumbal Dan. Te yiname ma x-alaj sok maʼyuk yalatak-a.
3 Ta jun buelta, te chʼul-abat yuʼun te Jehová la yakʼ sba ta ilel ta stojol te antse sok jich la yalbey: «Te jaʼate ma x-alajat sok maʼyuk ayinem* awalatak. Pero yame awikʼ awal ta achʼujt sok yame x-ayin jtul akerem-al.
4 Mame xa awuchʼ vino sok yantikxan uchʼbalil te ya xyakubteswan sok mame xa aweʼ te bin boloben skʼoplale.
5 Aʼiya awaʼiy stojol, yame awikʼ awal ta achʼujt sok yame x-ayin* jtul akerem-al, mame ayuk bin-ora ya yichʼ setʼbeyel lokʼel te stsotsel sjole, melel te kʼalal ya x-ayine nazareo* ya xkʼot ta stojol te Diose, yame xjajch skoltay lokʼel te lum Israel ta skʼab te filisteoetike».
6 Te antse bajt scholbey yaʼiy te smamalal te bin kʼot ta pasele. Jich la yalbey: «Ay jtul winik yuʼun te smelelil Dios* te tal yilone. Yan-nax ta ilel-a, jich yilel te bin-utʼil jtul chʼul-abat yuʼun te smelelil Diose. Maba la jojkʼoybey te banti taleme sok maba la yalbon te sbiile.
7 Pero jich la yalbon: ‹Aʼiya awaʼiy stojol, yame awikʼ awal ta achʼujt sok yame x-ayin* jtul akerem-al. Mame xa awuchʼ vino ni yantikxan uchʼbalil te ya xyakubteswan sok mame xa aweʼ te bin boloben skʼoplal, melel te chʼin kereme nazareo* ya xkʼot ta stojol Dios te kʼalal ya x-ayin jaʼto te kʼalal ya xlaje›».
8 Te Manóah jich la yalbey te Jehová: «Pasa perdón Jehová, awokoluk, tikuna tal yan buelta te j-abat awuʼun te atikunbeltonax tale, swenta ya scholbotik kaʼiytik te bin ya skʼan ya jpastik ta stojol te chʼin kerem te ya x-ayine».*
9 Te smelelil Diose* la yaʼiybey te skʼop te Manóah, jich yuʼun te kʼalal nakal ta fuera yuʼun-a te mukʼul lum te antse, te chʼul-abat yuʼun te smelelil Dios chaʼtal ta ilel yuʼun. Pero, te Manóah te smamalale maba tey ay-a.
10 Animalnax bajt te antse, bajt scholbey yaʼiy te smamalale. «¡Chaʼchiknaj ta jtojol te winik te tal yilon te yan tal kʼajkʼale!», xchi ta yalel.
11 Te Manóah oranax bajt sok te yinam te banti ay-a te winike, jich la sjojkʼoybey: «¿Jaʼatbal te winik te kʼopojat sok te kiname?». «Joʼon, joʼon-abi», xchi te winike.
12 Te Manóah jich la yalbey te winike: «¡Jichukme ak’a kʼotuk ta pasel te bin la awale! Pero ala kaʼiykotik, ¿bin yilel skuxlejal ya xkʼot te chʼin kereme? Sok ¿bin aʼtelil ya xbajt spas?».
13 Te chʼul-abat yuʼun te Jehová jich la yalbey te Manóah: «Te awiname mame xyuchʼ sok mame sweʼ spisil te bin la kalbeye.
14 Mame xjuʼ ya stuuntes spisil te bintik ya yichʼ pasel ta sit tsʼusub, mame yuchʼ vino ni yantikxan uchʼbalil te ya xyakubteswan sok mame sweʼ te bin boloben skʼoplal. Jaʼme akʼa spas spisil te bin la kalbey ta mantale».
15 Te Manóah jich la yalbey te chʼul-abat yuʼun te Jehová: «Awokoluk, mato xbaat. Yame jmiltik jkojtuk jkolel* tat tentsun yuʼun ya aweʼ».
16 Pero, te chʼul-abat yuʼun te Jehová jich la yalbey te Manóah: «Teme ya xjilone, maba ya jweʼbat te aweʼele. Pero, teme ya akʼane ya xjuʼ ya awakʼbey chikʼbil majtanil te Jehová». Ta melel, te Manóah ma snaʼoj-a te jaʼ te chʼul-abat yuʼun te Jehová te machʼa yak ta kʼoponel yuʼune.
17 Te Manóah jich la yalbey te chʼul-abat yuʼun te Jehová: «¿Bin abiil?, melel ya jkʼan ya kichʼatkotik ta mukʼ te kʼalal ya xkʼot ta pasel te bin la awale».
18 Pero, te chʼul-abat yuʼun te Jehová jich la yalbey te Manóah: «¿Bin yuʼun te ya akʼan ya anaʼbon te jbiile? Te jbiile jelawen yutsilal», xchi te chʼul-abate.
19 Te Manóah la stsak te jkolel* tat tentsun sok te majtanil yuʼun te sit awal tsʼunubil, sok la yakʼik ta stojol te Jehová ta sba mukʼul ton. Te kʼalal yak ta yilel-a te Manóah sok te yinam te majtanil la yakʼike, ay bin chajpnax la spas-a te Diose.
20 Te kʼalal yak ta tilel moel te kʼajkʼ ta stojol chʼulchan ta skajtajib te chikʼbil majtanil, te Manóah sok te yinam la yilik te chʼul-abat yuʼun te Jehová te yak ta moel bael ta yolil te kʼajkʼ te yak ta tilele. Te kʼalal jich la yilike, oranax la spajkan sbaik ta lum.
21 Jich la snaʼ stojol te Manóah te jaʼ jtul chʼul-abat yuʼun te Jehová te winike. Jich te chʼul-abat yuʼun te Jehová maʼyuk bin-ora la yakʼxan sba ta ilel ta stojol te Manóah sok te yiname.
22 Te Manóah jich la yalbey te yiname: «¡Yame xlajotik! Melel jaʼ Dios te machʼa la kiltike».
23 Pero, jich albot yuʼun te yiname: «Te yuʼunuk ya skʼan ya smilotik te Jehová, maba la stsak te chikʼbil majtanil te jichuke ni jaʼuk te majtanil yuʼun te sit awal tsʼunubil te la kakʼbeytike. Maba la yakʼbotik kiltik spisil ini sok maʼyuk bin la yalbotik te jichuke».
24 Ta patil, te antse ayin* jtul skerem-al, Sansón la yakʼbey sbiilin. Te kʼalal yak ta chʼiel-a te chʼin kereme akʼbot bendición yuʼun te Jehová.
25 La sta yorail te jajch ta aʼtel te espíritu yuʼun te Jehová ta stojol te Sansón ta Mahané-Dan te ay ta yolil Zorá sok ta Estaol.
Notaetik
^ Ta yantik variante «pʼejkajem», «tojkem».
^ Ta yantik variante «xpʼejkaj», «xtojk».
^ Ta hebreo kʼop jaʼ nazír, te ya skʼan ya yal «parte akʼbil» o «yakʼoj skuxlejal ta stojol Dios».
^ Ta yantik variante «xpʼejkaj», «xtojk».
^ Ta hebreo kʼop jaʼ nazír, te ya skʼan ya yal «parte akʼbil» o «yakʼoj skuxlejal ta stojol Dios».
^ Ta yantik variante «xpʼejkaje», «xtojke».
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «pʼejkaj», «tojk».
