Jueces 14:1-20
14 Te Sansón ko bael ta Timná sok tey la yil jtul filistea-ants.*
2 Tey-abi mo bael te banti ay te smeʼ state sok jich la yaltiklanbey: «Ay la kil jtul filistea-ants ta Timná te la yikʼbon koʼtane. Ya jkʼan te yakuk akʼanbonik yuʼun ya xnujpunon sok».
3 Pero, jich jojkʼoybot yuʼun te smeʼ state: «¿Yuʼunbal maʼyuk jtuluk ants ta jfamiliatik o ta jlumaltik? ¿Bin yuʼun te ya akʼan ale awinam ta yolil te filisteoetik te maba yichʼojik circuncisione?».* Pero, te Sansón jich la yalbey te state: «Baan, kʼanbon tal, melel jaʼ te machʼa la yikʼbon ko’tane».
4 Te smeʼ state ma la snaʼik te talem ta stojol Jehová te bin la skʼane, melel te Diose yak ta sleel te bitʼil ya yakʼbey guerra te filisteoetik te jaʼ swentainojik-a te lum Israel.
5 Te Sansón ko bael ta Timná sok te smeʼ state. Te kʼalal kʼot ta banti tsʼusubiltik yuʼun te Timná, tal jkojt león-choj* ta stojol te yak tal ta awe.
6 Ta yorail-abi, te espíritu yuʼun te Jehová la yakʼbey bayal yip te Sansón, jich yuʼun ta skʼabnax la sjat ta olil te león-choj, la sjat ta olil jich te bin-utʼil ya yichʼ jatel jkojt jkolel* tat tentsun. Pero maba la scholbey yaʼiy te smeʼ stat te bin la spase.
7 Tey-abi ko bael ta Timná te Sansón yuʼun ya skʼopon te antse, melel jaʼnanix-a te machʼa ya x-ikʼbot yoʼtan yuʼune.
8 Ta patil, te k’alal bajt yilxan te ants yuʼun ya yikʼ bael ta sna, bajt yil te sbakʼetal te león-choj te lajemixe. Ta yutil te sbakʼetal te león-choj te lajemixe nojel ta schanul chab sok ayix schabul.
9 Jich te Sansón la sjotsʼ ta skʼab te chab sok la sloʼ bael ta be. Te kʼalal kʼot te banti ayik te smeʼ state, jaʼnix jich la yakʼbey-euk te chabe yuʼun ya sloʼik. Pero maba la yalbey te la sjotsʼ lokʼel tal ta sbakʼetal jkojt león-choj te lajemixe.
10 Te state ko bael te banti ay te antse. Te Sansón la spas jun mukʼul kʼin tey-a, jaʼ te bin kʼayemik ta spasel-a te keremetike.
11 Kʼalal te ants winiketik la yilik te Sansón, la yikʼik tal 30 ta tul winiketik ta stojol swenta ya xjokinot yuʼun.
12 Jich yuʼun, jich albotik yuʼun te Sansón: «Ay bin ya jkʼan ya kalbeyex te wokol ta naʼbeyel swentail. Teme la anaʼik sok ya awakʼbonik sujtib ta jukeb kʼajkʼal te ya xjalaj te mukʼul kʼine, ya kakʼbeyex 30 ta lijk’ kʼuʼul pakʼal te pasbil ta lino sok 30 ta lijk’xan kʼuʼul pakʼal.
13 Pero, teme maba la awakʼbonik sujtibe, jaʼexme ya awakʼbonik 30 ta lijk’ kʼuʼul pakʼal te pasbil ta lino sok 30 ta lijk’xan kʼuʼul pakʼal». Jich la sjakʼik te winiketike: «Ala kaʼiykotik te bin wokol ta naʼbeyel swentaile, ya jkʼan ya kaʼiykotik».
14 Te Sansón jich la yal:
«Te bin ya xtiʼawane lokʼ weʼelil tey-asok ay bin chiʼ lokʼ ta stojol te bin ay yipe».
Kʼax oxeb kʼajkʼal, pero mato snaʼojbeyik-a te sujtib te bin wokol ta naʼbeyel swentaile.
15 Pero, ta schanebal kʼajkʼal, jich la yalbeyik te yinam* te Sansón: «Loʼlaya te amamalal yuʼun jich ya yalbotik te bin wokol ta naʼbeyel sujtibe. Teme maba ya apase yame jchikʼatkotik sok spisil te machʼatik ay yuʼun te atate. O ¿jaʼnaxbal la awikʼotik tal yuʼun ya apojbotik te bin ay kuʼuntike?».
16 Jich te antse okʼ ta stojol te Sansón sok jich la yalbey: «Te jaʼate maba ya akʼanon; te jaʼate ya apʼajon. Ay bin la awalbey te jlumal te wokol ta naʼbeyel sujtib, pero ni joʼukon awalojbon te bin swentaile». Te kʼalal jich la yaʼiy stojol te Sansón, jich la yalbey: «Teme maba kalojbey te jtat sok maba kalojbey te jnan* te sujtibe, ¡¿jaʼuktobalix ya kalbat-a te jaʼate?!».
17 Pero, ta jujun kʼajkʼal maba kom ta okʼel te ants ta stojol te Sansón, jaʼto te kʼalal tsʼakaj te jukeb kʼajkʼal yuʼun te mukʼul kʼine. Ta skaj te bayal wulwultayot yuʼun te antse, ta sjukebal kʼajkʼal la yalbey te sujtibe. Jich te antse la yalbey te slumale.
18 Jich yuʼun, ta sjukebal kʼajkʼal, te kʼalal yakix ta malel bael-a te kʼajkʼale,* te winiketik yuʼun te mukʼul lume jich la yalbeyik te Sansón:
«¿Aybal yan bin kʼax chiʼ jich te bin-utʼil te chabesok aybal bin kʼax bayalxan yip jich te bin-utʼil te león-choje?».
Te Sansón jich la yal:
«Te manchuk la ajokʼik lum sok te jkolel* meʼ wakax kuʼune,maba la anaʼbeyik sujtib te bin wokol ta naʼbeyel swentail te jichuke».
19 Jich yuʼun, te espíritu yuʼun te Jehová la yakʼbey bayal yip te Sansón sok ko bael ta Asquelón, tey la smiltiklan 30 ta tul winiketik, la spojtiklanbey bael te skʼuʼ spakʼe sok jaʼ la yakʼtiklanbey te machʼatik la snaʼbeyik sujtib te bin wokol ta naʼbeyel swentaile. Ta patil, te Sansón kʼax ilinem mo bael ta sna te state.
20 Jich te yinam te Sansón la yakʼik ta nujpunel sok jtul kerem, jaʼ te machʼa jokinot ta mukʼul kʼin yuʼune.
Notaetik
^ Ta hebreo: «jaʼ yantsil nichʼnab te filisteoetike».
^ O «jkojt león-choj te bayal stsotsel sjol».
^ Ta yantik variante «jchʼiel».
^ Te hebreoetik yinam o smamalal ya yalbeyikix te machʼa ya slekolin sbaike.
^ Ta yantik variante «jmeʼ», «jmama».
^ O jaʼniwan ya skʼan ya yal «te kʼalal mato x-och ta yutil cuarto-ae».
^ Ta yantik variante «jchʼiel».
