Jueces 15:1-20
-
Te Sansón la yakʼbey spakol te filisteoetik (1-20)
15 Ta patil, te kʼalal jaʼ yorail-a te ya yichʼ tsobel te sit te trigo, te Sansón bajt yil te yinam sok yikʼoj bael jkojt jkolel* tat tentsun. Jich la yal: «Ya jkʼan ya x-och kil ta scuarto te kiname». Pero, te stat te achʼixe maba la yak’ ochel.
2 Te stat te achʼixe jich la yalbey te Sansón: «La jkuy te apʼajoj ta jkʼaxel te achʼixe. Jaʼ yuʼun, jaʼ la kakʼbey te machʼa la sjokinat ta mukʼul kʼine. Pero, ¿mabal jaʼuk tʼujbilxan ya awil te ijtsʼinale? Awokoluk, jaʼ xa awikʼ te ijtsʼinale».
3 Pero, te Sansón jich la yal: «Ta ora ini, te filisteoetik ma xjuʼ ya yakʼbonik jmulin te bin ma lek ya jpastiklanbeye».
4 Jich yuʼun, te Sansón bajt stsak 300 ta kojt waxetik. Ta patil, ta chaʼchaʼkojt la schuktiklanbey te sne te waxetike sok la schuktiklanbey jujunsil teʼ ta sneik.
5 Tey-abi la stsumtiklanbey kʼajkʼ te jujunsil teʼe sok la skoltaylan* bael te waxetik ta yolil te awal tsʼunubiletik yuʼun te filisteoetik. Spisil la stsumbey skʼajkʼal: te bintik tomtiklanbilix,* te bintik tekʼajtikto, te tsʼusubiltik sok te olivoetik.
6 Jich la sjojkʼoyik te filisteoetike: «¿Machʼa la spas ini?». Jich jakʼbotik: «Jaʼ te Sansón, te snial te winik te talem ta Timná, melel te snial mamal* yan machʼa la yakʼbey yinamin te yinam te Sansón, jaʼ la yakʼbey te kerem te jokinot ta mukʼul kʼin yuʼun te Sansón». Te k’alal jich la yaʼiy stojol te filisteoetike moik bael sok la schikʼik te achʼix sok te state.
7 Jich albotik yuʼun te Sansón: «Ta skaj te jich la apasik ini, maba ya jkom jba jaʼto te k’alal ya kakʼbeyex spakole».
8 Jich jajch smiltiklan ta jujuntul. Kʼax bayal la smiltiklan. Tey-abi ko bael sok jil ta chʼen te ay ta mukʼul ton yuʼun Etam.
9 Ta patil moik bael ta Judá te filisteoetik sok tey la spas scampamentoik-a. Yakik ta beel ta skʼinal Lehí yuʼun chapalikix ta yakʼel guerra.
10 Jich yuʼun, te winiketik yuʼun Judá jich la sjojkʼoybeyik te filisteoetike: «¿Bin swentail te talexe? ¿Yuʼunbal ay bin jpasojbeyexkotik?». Jich la yalik te filisteoetik: «Mootik talel swenta ya jtsaktik bael te Sansón, yuʼun jich ya jpasbeytik-euk te bin la spasbonkotike».
11 Jich yuʼun koik bael 3 mil ta tul winiketik yuʼun Judá ta banti chʼen te ay ta mukʼul ton yuʼun Etam, jich la sjojkʼoybeyik te Sansón: «¿Yuʼunbal ma xa anaʼ te jaʼ swentainojotik te filisteoetike? ¿Bin yuʼun te jich la apasbonkotike?». Jich albotik yuʼun te Sansón: «Te joʼone jaʼnax la jpasbeyik-euk te bin la spasbonike».
12 Jich la yalbeyik te Sansón: «Te joʼotike kootik tal yuʼun ya jtsakatkotik bael sok yuʼun ya kakʼatkotik ta skʼab te filisteoetike». Jaʼ yuʼun jich la yal te Sansón: «Albonik ta jamal te maba ya amilonike».
13 Jich albotik yuʼun te winiketike: «Maʼuk, maba ya jmilatkotik jaʼnax ya jchukatkotik bael yuʼun ya kakʼatkotik ta skʼab te filisteoetike».
Jich yuʼun la schukik ta chaʼlijkʼ yachʼil lazo sok la slokʼesik tal ta yutil te chʼene, jich la yikʼik moel.
14 Kʼalal te filisteoetik la yilik te kʼot te Sansón ta Lehí, jajchik ta tulan aw yuʼun stseʼelil yoʼtanik. Ta yorail-abi, te espíritu yuʼun te Jehová la yakʼbey bayal yip te Sansón, jich te lazoetik te bechʼbil-ae, tuchʼik jich te bin-utʼil ya xtuchʼ te hilo te pasbil ta lino te k’alal ya yichʼ chikʼele; te cadenaetik te chukul ta skʼab-ae chʼay koel te jich yilel te ulub koele.
15 La yil jun sbakel yalan-e burro te lajelto-ae, jaʼ la stuuntes yuʼun la smiltiklan jmil ta tul winiketik.
16 Jaʼ yuʼun, jich la yal te Sansón:
«¡Ta swenta sbakel yalan-e jkojt burro..., jbus, chaʼbus!
Ta swenta sbakel yalan-e jkojt burro la jmiltiklan jmil ta tul winiketik».
17 Te kʼalal laj yoʼtan ta kʼope,* la schʼoj bael te sbakel yalan-e te burro sok Ramat-Lehí* la yakʼbey sbiil te lugar-abi.
18 Tey-abi akʼbot bayal takin tiʼil sok jich la yalbey te Jehová: «Jaʼat te la awakʼ te juʼ yuʼun tsalaw te j-abat awuʼun ini. Pero, ta ora ini ¿yabal xlajon ta takin tiʼil sok yabal x-ochon ta skʼab te machʼatik maba yichʼoj circuncisione?».*
19 Jaʼ yuʼun, te Diose la sjam te banti lomol lum te ay ta Lehí, jich lokʼ tal jaʼ tey-a. Te Sansón la yuchʼ te jaʼe, la yichʼxan yip sok kux kʼinal la yaʼiy. Jaʼ yuʼun, te slokʼib jaʼ te ay ta Lehí jaʼto ta ora ini, la yakʼbey sbiilin En-Hacore.*
20 Te Sansón aʼtej ta juez ta lum Israel 20 jaʼbil te kʼalal ayik ta wentainel yuʼun-a te filisteoetike.
Notaetik
^ Ta yantik variante «jchʼiel».
^ Ta yantik variante «skoleslan».
^ Ta yantik variante «yomtiklanbilix».
^ Ta yantik variante «smamal nial».
^ Ta yantik variante «aʼiyej».
^ Te ya skʼan ya yal «chʼin wits yuʼun sbakel yalan-e burro».
^ Te ya skʼan ya yal «slokʼib jaʼ yuʼun te machʼa ya x-awun».
