Jueces 17:1-13
-
Te sacerdote Miqueas sok te lokʼombaetik (1-13)
17 Ta witstikil yuʼun Efraín ay nainem jtul winik tey-a, Miqueas sbiil.
2 Te Miqueas jich la yalbey te snane:* «¿Yatobal xjul ta awoʼtan te la awichʼ elkʼanbeyel te 1,100 ta sejp plata-takʼine sok te ay bin chopol* skʼoplal la awal yuʼune? Ilawil, joʼon kichʼoj. Joʼon la jtsakbat te plata-takʼin awuʼune». Te kʼalal jich la yaʼiy stojol-abi, jich la yal te snane: «Akʼa akʼbotuk bendición yuʼun Jehová te jkerem-ale».
3 Jich la sutbey te snan* te 1,100 ta sejp plata-takʼine. Pero, jich la yal te snane: «Ya kakʼbey ta stojol Jehová te plata-takʼine. Ya jkʼan te ya atuuntes te takʼin yuʼun ya apas jun lokʼomba te pasbil ta kʼabal sok jun lokʼomba te pasbil ta ultesbil takʼine. Jaʼ yuʼun, jaʼ awuʼunix te plata-takʼine».
4 Te kʼalal la sutbeyix-a te plata-takʼin te snane,* te snane la stsak jilel 200 ta sejp plata-takʼin sok jaʼ la yakʼbey te machʼa ya x-aʼtej sok te platae, jaʼ te machʼa la spas te lokʼomba te pasbil ta kʼabal sok te lokʼomba te pasbil ta ultesbil takʼin. Jich la yakʼik ta sna te Miqueas.
5 Te Miqueas ay jun snail yuʼun te banti ya yichʼ ta mukʼ te lokʼombaetik yuʼune. La spas jlijkʼ efod* sok cheʼoxeb lokʼombaetik swenta ya yichʼ ta mukʼ te sfamiliae.* Sok la yotses ta sacerdote jtul skerem nichʼan.
6 Ta skʼajkʼalel-abi, maʼyuk ajwalil ta lum Israel. Jich yuʼun, ta jujuntul jaʼ la spasik te bin lek la yilike.*
7 Tey-abi ay jtul kerem te talem ta Belén ta skʼinal Judá, talem ta familia yuʼun Judá.* Jaʼ jtul levita te ayix tiempo te yak ta nainel tey-ae.
8 Te winik ini la yijkitay jilel te mukʼul lum Belén te ay ta skʼinal Judá yuʼun yak ta sleel te banti ya xnaine. Te kʼalal yak ta beel-ae, kʼot ta sna te Miqueas te ay ta witstikil yuʼun Efraín.
9 Te Miqueas jich la sjojkʼoybey te levita-winike: «¿Banti talemat?». Jich la yal te winike: «Levitaon sok talemon ta Belén te ay ta skʼinal Judá. Yakon ta sleel te banti ya xnainone».
10 Te Miqueas jich la yalbey: «Jilan sok joʼon swenta tatil* ya xkʼoat kuʼun sok sacerdote ya xkʼoat kuʼun. Ya kakʼbat lajunsejp plata-takʼin ta jaʼbil, ya kakʼbat chaʼlijkʼ akʼuʼ apakʼ sok te aweʼele». Jich yuʼun, te levita och bael ta sna te Miqueas.
11 Ta patil, te levita-kerem la schʼuun te ya xjil ta nainel sok te Miqueas, jich kʼot te bitʼil jtul snichʼan.
12 Jich te Miqueas la yotses te levita-winik ta sacerdote yuʼun, jich jil ta nainel ta sna.
13 Jaʼ yuʼun, jich la yal te Miqueas: «Ta ora ini ya jnaʼix te ya xbajt yakʼ ta ilel slekil yoʼtan te Jehová ta jtojol, melel jaʼix sacerdote kuʼun te levitae».
Notaetik
^ Ta yantik variante «smeʼe», «smamae».
^ Ta yantik variante «ma lek».
^ Ta yantik variante «smeʼ», «smama».
^ Ta yantik variante «smeʼe», «smamae».
^ Ta hebreo: «terafim».
^ O «toj ta pasel ta skʼopike».
^ Jaʼniwan ya skʼan ya yal «te nain ta Belén ta skʼinal Judá».
^ O «jtojobteswanej».