Jueces 19:1-30
-
Winiketik yuʼun Benjamín la stsak yutsʼinik jtul ants ta Guibeá (1-30)
19 Ta yorail-abi, te kʼalal mato ayuk ajwalil ta lum Israel, ay jtul levita-winik te nainem ta stiʼil te witstikil yuʼun Efraín la sle yinam* te talem ta Belén ta skʼinal Judá.
2 Pero, te antse la sloʼlay te smamalal sok yan winik. La yijkitay te smamalal, bajt ta sna stat te ay ta Belén ta skʼinal Judá, tey jalaj chaneb u-a.
3 Jich yuʼun, te smamalal bajt slekubtesbey yoʼtan te yinam* yuʼun ya yikʼ sujtel (la yikʼ bael jtul j-abat yuʼun sok chaʼkojt burroetik). Te antse la yikʼ ochel ta sna te state, kʼax tseʼel yoʼtan yuʼun te stat te kʼalal la yil te winike.
4 Jich yuʼun, te snial mamal* te winik, jaʼ te stat te achʼixe, la skʼanbey te yakuk xjil oxebuk kʼajkʼal, jich jil te winike. Jich weʼ uchʼajik sok tey kʼax cheʼoxeb ajkʼabal yuʼun-a te levita-winike.
5 Ta schanebal kʼajkʼal sabto jajchik yuʼun ya xbajtikix-a, pero te stat te achʼixe jich la yalbey te sniale: «Weʼan jtebuk yuʼun jich ay awip-a,* teme laj awoʼtanike ya xjuʼ ya xbaex».
6 Jich yuʼun, ta schebalik najkajik sok weʼ uchʼajik. Ta patil, te stat te achʼix jich la yalbey te winike: «Awokoluk, jilan te ajkʼabal ini sok junuk awoʼtan ya akux awoʼtan».
7 Te kʼalal jajch te levita-winik yuʼun ya sujtix bael, bayal buelta kʼanbot yuʼun te snial mamal* te yakuk xjile, jich chaʼkʼax ajkʼabal yuʼun tey-a.
8 Ta yoʼebal kʼajkʼal sabto jajch te levita-winik yuʼun ya xbajtix-a, pero jich albot yuʼun te stat te achʼixe: «Awokoluk, weʼan jtebuk yuʼun jich ay awip-a».* Jich weʼik schebalik sok jalajik jaʼto te kʼalal mal bael te kʼajkʼale.
9 Te kʼalal jajch te levita-winik yuʼun ya xbajtix sok-a te yinam* sok te j-abat yuʼune, te snial mamal,* jaʼ te stat te achʼixe, jich albot yuʼun: «Ilawil, yakix ta ijkʼubel te kʼinale. Awokoluk, jilanikxan te ajkʼabal ini, melel malix te kʼajkʼale. Jilanxan te ajkʼabal ini sok junuk awoʼtan ya akux awoʼtan. Ya xjuʼ sabto ya xjajchex pajel yuʼun ya sujtat bael ta ana».
10 Pero, te levita-winik maba la skʼan wayix tey-a. Jich lokʼ bael, kʼot kʼalal ta Jebús, jaʼ te Jerusalén. Yikʼoj bael te chaʼkojt sburro te ayik yijkatse. Jaʼnix jokinbil yuʼun te yinam* sok te j-abat yuʼune.
11 Te kʼalal nopol* ya xkʼotikix ta Jebús-a, yakix ta ijkʼubel-a te kʼinale. Jich yuʼun, te j-abate jich la sjojkʼoybey te yajwale: «¿Bin yuʼun ma x-ochotik liʼ ta mukʼul lum yuʼun te Jebuseoetik sok tey ya xkʼax ajkʼabal kuʼuntik-a?».
12 Pero, jich albot yuʼun te yajwale: «Ma skʼan ya x-ochotik ta jun mukʼul lum yuʼun jyanlumetik, teme ma jaʼuk israeletike. Konik kʼalal ta Guibeá».
13 Te winik jich la yalbey te j-abat yuʼune: «Jaʼ lek ak’a kakʼtik puersa swenta ya kiltik banti ya jkʼasestik ajkʼabal, teme ta Guibeá o ta Ramá».
14 Jich la stsakxan bael sbeik sok yakix ta malel-a te kʼajkʼal te kʼalal nopol* ya xkʼotikix ta Guibeá ta skʼinal Benjamín.
15 Jich yuʼun kʼotik ta Guibeá sok ochik bael tey-a, tey kʼax yuʼunik-a te ajkʼabale. Te kʼalal ayikix ta yutil-a te mukʼul lume, la snajkan sbaik ta yolil te plaza,* pero maʼyuk machʼa ikʼotik ochel ta snaik.
16 Ta ajkʼabal-abi ay jtul mamal te yak ta sujtel tal ta aʼtel ta skʼinal, talem ta witstikil yuʼun Efraín sok jaʼnax cheʼoxeb kʼajkʼal yak ta nainel tey ta Guibeá. Te winiketik yuʼun te mukʼul lum-abi jaʼ stsʼumbalik te Benjamín.
17 Kʼalal te mamal la yil te jbeom-winik te ay ta plaza* yuʼun te mukʼul lume, jich la sjojkʼoybey: «¿Banti ya xbaat? ¿Banti talemat?».
18 Jich albot yuʼun te winike: «Talemonkotik ta Belén ta skʼinal Judá ta stiʼil te witstikil yuʼun Efraín, jaʼ te banti talemone. Kʼoon tal ta Belén ta skʼinal Judá, ta ora ini ya xboon ta sna te Jehová,* pero maʼyuk machʼa yikʼojon ochel ta sna.
19 Ay kichʼojtik bayal ak sok sweʼel te jburrokotike, jaʼnix jich ay kichʼoj vino sok pan yuʼun ya jweʼ sok te kinam soknix te j-abat kuʼunkotike. Maʼyuk bin ya spas falta kuʼunkotik».
20 «¡Kʼax lek te talemate!, xchi te mamale. Joʼon ya kakʼbat spisil te bin ya xtuun awuʼune, jaʼnax te manchuk ya xkʼax ajkʼabal awuʼun liʼ ta plazae».*
21 Jich yuʼun, te mamale la yikʼ bael ta sna te winike sok la yakʼbey sweʼel te burroetik yuʼune. Jich te jbeometike la spok te yokik sok ochik ta weʼ uchʼajel.
22 Te kʼalal tseʼel yoʼtanik-ae, ay chaʼoxtul chopol winiketik* yuʼun te mukʼul lum te la sjoytayik te na sok jajch smajik te tiʼnaile. Jich la yalbeyik te mamal, jaʼ te yajwal te nae: «Lokʼesa tal te winik te och ta anae yuʼun ya jokinkotik ta wayel».
23 Lokʼ tal te yajwal te nae sok jich la yaltiklanbey: «Awokoluk, kermanotak, ma xa apasik te bin kʼax chopole,* melel jaʼ kulaʼ ta jna te winik ini. Ma xa apasik te bin kʼax kʼexlaltik sbae.
24 Jaʼ ya kakʼbeyex te kantsil nichʼan te ma tabil ta winik sok te yinam* te kulaʼe. Ya jlokʼesbeyex tal, jaʼ xa atsak awutsʼinik sok pasbeyaik te bin ya skʼan awoʼtanike. Pero ma xa apasbeyik te bin kʼexlaltik sba te winik ini».
25 Te winiketik maba la yichʼik ta mukʼ te bin la yal te mamale. Jaʼ yuʼun, te levita-winike la stsak tal te yiname,* la slokʼes bael sok jaʼ la yakʼbey ta skʼab te winiketike. Jich la stsak yutsʼinik ta sjunal ajkʼabal jaʼto te kʼalal nopol* ya sakubix-a te kʼinale. Te kʼalal sakub te kʼinale, la stikunik sujtel.
26 Te antse buen sab kʼot ta sna te mamal te banti ay te smamalal, tey kʼot yaluk ta tiʼnail sok tey metsel jilel-a jaʼto kʼalal sakub ta lek te kʼinale.
27 Te kʼalal jajch ta sab te smamalal te antse sok la sjam te tiʼnail yuʼun ya xbajtix-a, la yil te metsel te yinam* ta tiʼna, kajajtik jilel skʼab ta smarcoil.
28 Te levita-winik jich la yalbey: «Jajchan, konikix». Pero maba la sjakʼ te antse. Jich yuʼun, te winike la skajan bael ta sburro te sbakʼetale, jich bajt ta sna.
29 Te kʼalal kʼot ta sna, la sle tal jun cuchillo, la yichʼbey tal te sbakʼetal te yiname* sok 12 ta xejtʼ la slokʼes-a. Tey-abi la stikun bael jujunxejtʼ ta spamal skʼinal Israel.
30 Spisil te machʼatik la yilik-abi, jich la yalik: «Maʼyuk jich kʼoem ta pasel sok maʼyuk jich kilojtik ini, jaʼto te bin kʼajkʼalil lokʼik tal te israeletik ta skʼinal Egipto. Ilbeyaik ta lek skʼoplal te bin kʼot ta pasele, yuʼun jich ya jnaʼtik te bin ya jpastike».
Notaetik
^ Ta yantik variante «smamal nial».
^ O «yip awoʼtan».
^ Ta yantik variante «smamal nial».
^ O «yip awoʼtan».
^ Ta yantik variante «smamal nial».
^ Ta yantik variante «tijil».
^ Ta yantik variante «tijil».
^ O jaʼniwan ya skʼan ya yal «ya x-abatinon ta sna te Jehová».
^ Ta yantik variante «winiketik te ma lekuk stalelik».
^ Ta yantik variante «ma leke».
^ Ta yantik variante «tijil».
