Jueces 20:1-48
-
La yakʼbeyik guerra te stsʼumbal Benjamín (1-48)
20 Ta swenta te bin kʼot ta pasel, la stsob sbaik tal spisil te winiketik yuʼun Israel te jajch tal ta skʼinal Dan kʼalalto ta Beer-Seba soknix te machʼatik ayik ta skʼinal Galaad. Spisil te lume jun-nax la schap skʼopik yuʼun ya stejkʼan sbaik ta stojol te Jehová ta Mizpá.
2 Te jolaletik yuʼun te lum sok spisil te stsʼumbal Israel la stejkʼan sbaik ta slugarik te banti ya stsob sba te lum yuʼun te Diose. Ay 400 mil ta tul soldadoetik te chapalik sok yespadaik.
3 (Te stsʼumbal Benjamín la yaʼiyik stojol te moik bael ta Mizpá te winiketik yuʼun Israel).
Jich yuʼun, te winiketik yuʼun Israel jich la yalik: «Ala kaʼiykotik bin-utʼil kʼot ta pasel te bin kʼax chopol* ini».
4 Te levita-winik, te smamalal te ants te la yichʼ milele, jich la yal: «Kʼoon sok te kinam* ta Guibeá te ay ta skʼinal Benjamín swenta tey la jkʼasestik ajkʼabal-a.
5 Te machʼatik nainemik* ta Guibeá tal sjoytay te na ta ajkʼabal yuʼun ya skontrainonik, kʼan smilonik, pero jaʼ la stsak yutsʼinik te kiname,* jich laj.
6 Jaʼ yuʼun la jbojtiklan ta xejtʼelxejtʼ te sbakʼetal te kiname.* Tey-abi la jtikun bael jujunxejtʼ ta spamal skʼinal te lum Israel, melel kʼax chopol* sok kʼax kʼexlaltik sba te bin la yichʼ pasel ta Israel.
7 Jaʼ yuʼun, lum Israel, alaik kaʼiytik te bin ya anopik ta swenta ini sok te bin ya xjuʼ ta pasele».
8 Jun-nax la schap skʼopik spisil te lume sok jich la yalik: «Mame ayuk jtuluk te ya sujt bael ta snailpakʼ ni jaʼuk ta sna.
9 Jich yuʼun akʼa jpastik suerte* swenta ya jnaʼtik machʼatik-a te ya xmoik bael ta yakʼbeyel guerra te Guibeá.
10 Jich yuʼun, spisil te stsʼumbal Israel yame yichʼ tsael 10 ta tul winiketik ta banti jujuntsojb ta 100 ta tul winiketik; yame yichʼ tsael 100 ta tul winiketik ta banti jujuntsojb ta mil ta tul winiketik; yame yichʼ tsael jmil ta tul winiketik ta banti jujuntsojb ta 10 mil ta tul winiketik swenta ya slebeyik bael sweʼel te soldadoetik; jich te soldadoetik ya xbajt yakʼbeyik stoj te machʼatik nainemik ta Guibeá te ay ta skʼinal Benjamín ta swenta te bin kʼexlaltik sba la spasik ta lum Israel».
11 Jaʼ yuʼun, jun-nax la stsob sbaik spisilik te winiketik yuʼun Israel swenta ya yakʼbeyik guerra te mukʼul lume.
12 Jich yuʼun, te stsʼumbal Israel jich la stikunbeyik ta albeyel spisil te winiketik yuʼun te stsʼumbal Benjamín: «¿Bin-utʼil ay-a te kʼot ta pasel ta awolilik te bin kʼax chopole?*
13 Jich yuʼun akʼbotik ta jkʼabtik te chopol winiketik* yuʼun Guibeá yuʼun ya jmilkotik, jichme ya jlokʼestik te bin chopol* ta lum Israel». Pero, te stsʼumbal Benjamín maba la schʼuunbeyik skʼop te yermanotakike, jaʼ te israeletike.
14 Jich yuʼun, te stsʼumbal Benjamín lokʼik tal ta mukʼul lumetik yuʼunik swenta ya stsob sbaik ta Guibeá yuʼun jich ya yakʼbeyik guerra te winiketik yuʼun Israel.
15 Ta kʼajkʼal-abi, te stsʼumbal Benjamín la stsob sbaik tal 26 mil ta tul winiketik te chapalik sok yespadaik sok ayxan 700 ta tul soldadoetik te pʼijubenik ta lek ta yakʼel guerra te jaʼ slumalik te Guibeá.
16 Ta spisil te soldadoetik ini ay 700 ta tul te pʼijubenik ta lek ta yakʼel guerra, jaʼ ya x-aʼtejik sok te skʼexam skʼabike.* Te winiketik ini ya snaʼik schʼojel ta lek ton sok te sjimochʼik soknix ya xjuʼ ya yakʼbeyik ta mero jlijkʼ stsotsel jolal.
17 Te winiketik yuʼun Israel la stsobik 400 mil ta tul winiketik te chapalik sok yespadaik, ta spisil te soldadoetik ini ya snaʼik yakʼel ta lek guerra; maba tey ajtaybil-a te stsʼumbal Benjamín.
18 Jich yuʼun, te israeletik moik bael ta Betel yuʼun ya sjojkʼoybeyik te Dios te bin ya xjuʼ ya spasike. Te lum Israel jich la sjojkʼoyik: «¿Machʼa tsʼumbalil te ya xnailaj bael ta jtojoltik yuʼun ya yakʼbey guerra te stsʼumbal Benjamín?». Jich albotik yuʼun te Jehová: «Jaʼ ya xnailaj bael ta atojolik te stsʼumbal Judá».
19 Tey-abi, te israeletik buen sab jajchik, la spas scampamentoik swenta ya yakʼbeyik guerra te Guibeá.
20 Jich te winiketik yuʼun Israel lokʼik bael ta yakʼbeyel guerra te stsʼumbal Benjamín. La schol sbaik ta stojol te lum Guibeá yuʼun ya yakʼbeyik guerra.
21 Ta kʼajkʼal-abi lokʼik bael ta Guibeá te stsʼumbal Benjamín, la smilik 22 mil ta tul israeletik.
22 Pero, te soldadoetik yuʼun Israel maba xiw yoʼtanik sok la schol sbaik yan buelta ta yakʼel guerra teynix ta lugar te banti la yakʼ sbaik ta sbabial kʼajkʼale.
23 Jaʼ yuʼun, te israeletik moik bael ta Betel sok la yokʼetay sbaik ta stojol Jehová jaʼto kʼalal ijkʼub te kʼinale sok jich la sjojkʼoybeyik te Jehová: «¿Yabal sujtotik ta yakʼbeyel guerra te kermanotaktike, jaʼ te stsʼumbal Benjamín?». Jich albotik yuʼun te Jehová: «Baanik, baan akʼbeyaik guerra».
24 Ta schebal kʼajkʼal, te israeletik noptsajik* bael ta stojol te stsʼumbal Benjamín.
25 Jaʼnix jich, te winiketik yuʼun te stsʼumbal Benjamín lokʼik tal kʼalalto ta Guibeá ta schebal kʼajkʼal swenta ya sta sbaik sok te israeletik, jich la smilik 18 mil ta tul israeletik te spisilik chapalik sok yespadaik.
26 Jich yuʼun, spisil te winiketik yuʼun Israel moik bael ta Betel te banti okʼik sok la snajkan sbaik ta stojol te Jehová. Ta kʼajkʼal-abi la skom sweʼelik jaʼto kʼalal ijkʼub te kʼinale. Sok la yakʼik chikʼbil majtaniletik ta stojol te Jehová soknix majtaniletik ta swenta lamalkʼinal.
27 Ta patil, te israeletik la sjojkʼoybeyik te Jehová te bin ya xjuʼ ya spasike, melel ta skʼajkʼalel-abi tey ay-a te skaxaul chapbilkʼop yuʼun te smelelil Diose.*
28 (Te Finehás, snichʼan Eleazar, snichʼan Aarón, jaʼ te machʼa yak ta aʼtel ta stojol-a te skaxaul chapbilkʼop ta skʼajkʼalel-abi). Jich la sjojkʼoyik: «¿Yabal sujtotik yan buelta ta yakʼbeyel guerra te kermanotaktik, jaʼ te winiketik yuʼun Benjamín, o maʼukix?». Jich albotik yuʼun te Jehová: «Baanik, pajel yame kakʼbeyex ta akʼabik».
29 Jich yuʼun, te lum Israel la yakʼ winiketik ta sjoyobal te Guibeá.
30 Ta yoxebal kʼajkʼal, chaʼmoik bael te israeletik ta yakʼbeyel guerra te stsʼumbal Benjamín, la schol sbaik ta yakʼbeyel guerra te Guibeá jich te bitʼil spasojik tale.
31 Te kʼalal lokʼ staik te soldadoetik yuʼun Israel te stsʼumbal Benjamín, te israeletik la yak’ namajukik* ta stojol te mukʼul lum te stsʼumbal Benjamín. Jich te bitʼil spasojik tal te stsʼumbal Benjamín, jajchik ta yakʼel guerra sok jajch smilik chaʼoxtul winiketik ta mukʼul beetik (jun be ya xmo bael ta Betel, te yan bee ya xmo bael ta Guibeá). Ayniwan la smilik 30 ta tul israeletik ta kʼinal-abi.
32 Jaʼ yuʼun, jich yakik ta yalel te stsʼumbal Benjamín: «Yakotik ta tsalaw jich te bitʼil jpasojtik tale». Pero, jich la yalik te israeletik: «Yame x-anotik bael swenta jich ya xnamajik* ta stojol te mukʼul lume».
33 Jich yuʼun, te soldadoetik yuʼun Israel kʼotik ta Baal-Tamar sok la schol sbaik swenta ya yakʼik guerra. Ta yorailnix-abi, te yantik israeletik te snakʼoj sbaik ta nopol* Guibeá, lokʼik tal sok jach yakʼik guerra.
34 Ay 10 mil ta tul soldadoetik yuʼun spisil te lum Israel te pʼijubenik ta lek ta yakʼel guerra, kʼotik ta stojol te Guibeá, tulanaj yuʼunik te guerrae. Pero, te stsʼumbal Benjamín maba la snaʼik te yak ta talel te lajinel ta stojolike.
35 Te Jehová la stsal te stsʼumbal Benjamín ta stojol te israeletik. Ta kʼajkʼal-abi, te israeletik la smilik 25,100 ta tul winiketik yuʼun Benjamín, ta spisilik chapalik ta lek sok yespadaik-a.
36 Kʼalal te stsʼumbal Benjamín la yilik te lokʼik bael ta anel te winiketik yuʼun Israel, la skuyik te yakik ta tsalaw yan bueltae. Pero, te israeletik lokʼik bael ta anel, melel jaʼ smukʼulinoj yoʼtanik te machʼatik snakʼoj sbaik jilel yuʼun ya yakʼbeyik guerra te Guibeá.
37 Te soldadoetik te snakʼoj sbaik jilel, oranax lokʼik tal sok ochik bael ta Guibeá. La spuk sbaik sok la smilik ta espada spisil te yajwalul te mukʼul lume.
38 Te soldadoetik yuʼun Israel sok te winiketik te snakʼoj sbaik jilele, la schapik te yakuk yakʼik moel chʼail te jaʼ ya skʼan ya yal te la schikʼikix te mukʼul lume.
39 Te kʼalal lokʼik bael ta anel yilel te israeletik ta guerra, te winiketik yuʼun Benjamín jajch yakʼik guerra, ayniwan la smilik 30 ta tul winiketik yuʼun Israel. Jich la yalik: «Chikan ta ilel te yakotik ta tsalawe jichnix te bitʼil te yan tal bueltae».
40 Tey-abi la yilik te xtomet yak ta moel chʼail ta yutil te mukʼul lum, jaʼ te bin señail yalojike. Te kʼalal la sut sitik ta spat te winiketik yuʼun Benjamín, la yilik te spamal yak ta kʼajkʼel te mukʼul lum sok te kʼalalto ta chʼulchan yak ta tilel skʼajkʼal.
41 Ta yorail-abi, te winiketik yuʼun Israel sujt ta spatik, jich och xiwel ta yoʼtanik te winiketik yuʼun Benjamín te kʼalal la yilik te lajinel tal ta stojolike.
42 Jich lokʼik bael ta anel ta stojol te israeletik, bajtik ta jochol takin kʼinal, pero maba juʼ yuʼunik skoltayel sbaik. Jaʼnix jich, te winiketik te lokʼik tal ta mukʼul lum, la yichʼik milel-euk.
43 La sjoytayik te stsʼumbal Benjamín sok maba la skom sbaik ta snutsel. Tey la smiltiklanik ta banti yelaw te mukʼul lum Guibeá te ay ta slokʼib kʼajkʼal.
44 Lajik 18 mil ta tul winiketik yuʼun Benjamín. Ta spisilik jaʼ soldadoetik te ay yipik ta yakʼel guerra.
45 Te winiketik yuʼun Benjamín sujt ta spatik, bajtik ta anel ta stojol jochol takin kʼinal ta mukʼul ton yuʼun Rimón. Te israeletik la smilik* 5 mil ta tul winiketik yuʼun Benjamín ta mukʼul beetik. La snutstiklanik bael jaʼto kʼalal ta Guidom; jich la smilikxan 2 mil ta tul winiketik.
46 Ta kʼajkʼal-abi lajik 25 mil ta tul winiketik yuʼun Benjamín te chapalik ta lek sok yespadaik. Ta spisilik jaʼ soldadoetik te ay yipik ta yakʼel guerra.
47 Pero ay 600 ta tul winiketik te bajtik ta jochol takin kʼinal ta mukʼul ton yuʼun Rimón. Tey jalajik chaneb u-a.
48 Jaʼnix jich, te winiketik yuʼun Israel sujtik ta yakʼbeyel guerra te stsʼumbal Benjamín, la smilik ta espada spisil te ants winiketik ta mukʼul lum, jich bitʼil winiketik sok chambalametik, spisil te bin jilemik tey-ae. Jaʼnix jich la stsumbeyik kʼajkʼ spisil te mukʼul lumetik te banti kʼaxike.
Notaetik
^ Ta yantik variante «ma lek».
^ O jaʼniwan ya skʼan ya yal «Te yajwalik te kʼinal».
^ Ta yantik variante «ma lek».
^ Ta yantik variante «ma leke».
^ Ta yantik variante «winiketik te ma lekuk stalelik».
^ Ta yantik variante «ma lek».
^ Ta yantik variante «xin kʼabike».
^ Ta yantik variante «jijtsʼajik», «tijtsajik».
^ Ta yantik variante «jakalajukik», «kʼubukik».
^ Ta yantik variante «xjakalajik», «xkʼubik».
^ Ta yantik variante «tijil».
^ Ta hebreo: «la sleik ta lek».
