Jueces 21:1-25
-
Maba la yichʼ lajinel te stsʼumbal Benjamín (1-25)
21 Te winiketik yuʼun Israel jich la yalik ta jamal ta Mizpá: «Mame kakʼbeytik te kantsil nichʼnabtik te winiketik yuʼun Benjamín yuʼun ya xnujpunik sok».
2 Jich yuʼun bajtik ta Betel te israeletik sok tey la snajkan sbaik ta stojol te smelelil Dios,* yakik ta aw sok ta tulan okʼel jaʼto kʼalal ijkʼub te kʼinale.
3 Jich la yalbeyik te Diose: «Kajwal, Jehová, jaʼat te Diosat yuʼun Israel, ¿bin yuʼun jich kʼot ta pasel ini ta stojol te lum Israel? ¿Bin yuʼun te la yichʼ lajinel jun tsʼumbalil ta Israel?».
4 Ta yan kʼajkʼal buen sab jajchik te lum Israel sok tey la spasik jun skajtajib chikʼbil majtanil swenta la yakʼik chikʼbil majtaniletik sok majtaniletik ta swenta lamalkʼinal.
5 Jaʼ yuʼun, jich la yalik te israeletik: «Ta spisil te stsʼumbal Israel, ¿machʼatik-a te maba moik bael te kʼalal la jtsob jbatik ta stojol te Jehová?». Melel jamal la yalik te ya yichʼ milel machʼauk-a te maba mo bael ta Mizpá te kʼalal la stsob sbaik ta stojol te Jehová.
6 Te israeletik bayal la smel yoʼtanik ta swenta te bin kʼot ta stojol te Benjamín, te yermanoike. Jich la yalik: «Yoʼtik la yichʼ lajinel jun tsʼumbalil ta Israel.
7 ¿Banti ya xbajt jlebeytik yinamik te winiketik yuʼun Benjamín te kuxul jilike? Melel la kaltik ta jamal ta stojol Jehová te maba ya kakʼbeytik te kantsil nichʼnabtik yuʼun ya xnujpunik sok».
8 Jich la sjojkʼoyik: «Ta spisil te stsʼumbal Israel, ¿machʼatik-a te maba la stejkʼan sbaik ta stojol Jehová ta Mizpá?». La snaʼik stojol te maʼyuk jtuluk yuʼun te Jabés-Galaad te kʼot ta campamento te banti la stsob sbaik spisilike.
9 Melel te kʼalal la yichʼ ajtayel te winiketike, tey la snaʼik stojol-a te maʼyuk kʼot ni jtuluk te yajwalul te Jabés-Galaad.
10 Jich yuʼun, te lum Israel la stikunik bael 12 mil ta tul winiketik te bayal yipik ta Jabés-Galaad. Jich la yichʼik albeyel bael ta mantal: «Baanik sok milaik ta espada te yajwalul te Jabés-Galaad sok spisil te antsetik soknix te alaletike.
11 Jaʼ ini, jaʼ te bin ya skʼan ya apasike: yame amilik spisil te winiketik sok spisil te antsetik te tabilik ta winik».
12 Ta yolil te machʼatik nainemik ta Jabés-Galaad ay la staik 400 ta tul achʼixetik te maba tabilik ta winik, maʼyuk sjokinojik ta wayel ni jtuluk winik. Jich yuʼun la yikʼik bael te achʼixetik ta Siló te banti ay te scampamentoik ta skʼinal Canaán.
13 Tey-abi, te lum Israel la stikunik bael kʼop ta stojol te winiketik yuʼun Benjamín te ayik ta mukʼul ton yuʼun Rimón. Sok la yalbeyik te ayix lamalkʼinal yuʼunik soke.
14 Jich yuʼun sujtik bael ta skʼinalik te winiketik yuʼun Benjamín, te israeletik la yakʼbey yinaminik te achʼixetik te la yikʼik tal ta Jabés-Galaad te maba la smiltiklanike. Maba tsʼakajik-a te achʼixetike.
15 Jich te lum Israel bayal la smel yoʼtanik yuʼun te bin kʼot ta stojol te stsʼumbal Benjamín, melel te Jehová la xat te stsʼumbal Benjamín sok te yantikxan stsʼumbal Israel.
16 Jaʼ yuʼun, jich la sjojkʼoyik te jwolwanejetik yuʼun te lume: «¿Banti ya jlebeytik yinamik te winiketik te mato ayuk yinamike? Melel la yichʼik milel te antsetik yuʼun te stsʼumbal Benjamín».
17 Jich la yalik: «Swenta maba ya xchʼay junuk te stsʼumbal Israel, te machʼatik kuxul jilik ta stsʼumbal Benjamín akʼa yichʼik te skʼinalik te yichʼojik akʼbeyele.
18 Te joʼotike maba ya kakʼbeytik te kantsil nichʼnabtik yuʼun ya xnujpunik sok, melel jich jamal la yal te lum Israel: ‹Bolobenukme skʼoplal ya xkʼot te machʼa ya yakʼbey yinam te winiketik yuʼun Benjamín›».
19 Jich la yalik: «¡Aʼiya awaʼiyik stojol! Jujun jaʼbil ya spasik kʼin ta stojol Jehová ta Siló te ay ta stojol norte yuʼun Betel ta stojol slokʼib kʼajkʼal yuʼun te mukʼul be te ya xmo bael ta Betel kʼalal ta Siquem soknix ta stojol sur yuʼun te Leboná».
20 Jaʼ yuʼun, jich la yalbeyik ta mantal te winiketik yuʼun Benjamín: «Baanik sok nakʼa abaik ta tsʼusubiltik.
21 Te kʼalal ya awilik te ya sep sbaik ta ajkʼot te achʼixetik ta Siló, lokʼanik tal ta banti te tsʼusubiltik, tsakaik bael jujuntul achʼixetik yuʼun ya awinaminik. Tey-abi sujtanik bael ta skʼinal Benjamín.
22 Teme ay ya xtal ta kʼop te smeʼ statik o te sbankil* yijtsʼinab, jichme ya kalbeytik: ‹Awokoluk, ta swenta slekilal te winiketik yuʼun Benjamín, akʼaik ta ilel slekil awoʼtanik ta jtojolkotik, melel maba juʼ kuʼuntik slebeyel yinamik ta spisilik ta skaj te guerrae sok ma jaʼukex te la awakʼik sok spisil awoʼtanik te awantsil nichʼnabik, jich yuʼun maʼyuk amulik›».
23 Jich yuʼun, te winiketik yuʼun Benjamín jich la spasik te bitʼil la yichʼik albeyele. Jich yuʼun, ta jujuntul la yikʼ bael jtul achʼix te yakik ta ajkʼot yuʼun ya yinaminik. Ta patil sujtik bael ta skʼinalik te banti yichʼojik akʼbeyele, la schaʼpasik te mukʼul lumetik sok tey nainik-a.
24 Ta kʼajkʼal-abi, jich sujtik bael te israeletik sok te sfamiliaik soknix te banti ay te stsʼumbalike. Jich bajtik te jujunchajp stsʼumbal Israel ta skʼinalik te banti yichʼojik akʼbeyele.
25 Ta skʼajkʼalel-abi, maʼyuk ajwalil ta lum Israel. Jich yuʼun, ta jujuntul jaʼ la spasik te bin lek la yilike.*
