Jueces 3:1-31
3 Jaʼik ini te nacionetik te la yakʼ jiluk te Jehová swenta ya spasik ta prueba-a te israeletik te maʼyuk bin-ora yakʼojik guerra ta Canaán
2 (jichme ya snaʼik te bin-utʼil ta akʼel guerra te israeletik te ayinik* ta patile, jaʼik te machʼatik maba yilojik te guerrae):
3 jaʼik te joʼtul ajwaliletik yuʼun te filisteoetik sok spisil te cananeoetik, sidonioetik sok te heveoetik te nainik ta wits Líbano, te jajch tal ta wits Baal-Hermón, kʼot kʼalal ta Lebó-Hamat.*
4 Te nacionetik-abi jaʼ la yichʼik tuuntesel swenta la yichʼik akʼel ta prueba te israeletik teme yuʼun-nix ya schʼuunik-a te mantaliletik te la yichʼik akʼbeyel yuʼun Jehová te antiguo smeʼ statik ta swenta te Moisés.
5 Jich te israeletik nainik ta yolil te cananeoetik, hititaetik, amorreoetik, perizitaetik, heveoetik sok te jebuseoetik.
6 La yikʼ yinaminik te yantsil nichʼnab te lumetik-abi. Te yantsil nichʼnabik la yakʼbey yinaminik te skerem nichʼnabik te lumetik-abi sok jajch yichʼik ta mukʼ te diosetik yuʼunike.
7 Te israeletik jaʼ la spasik te bintik ma lek ya yil te Jehová; chʼay ta yoʼtanik te Jehová te Dios yuʼunik sok jaʼ la yichʼik ta mukʼ te Baaletik soknix te chʼul teʼetik yuʼun Aserá.*
8 Jich yuʼun, te Jehová bayal ilin ta stojol te lum Israel sok la yakʼtiklan* jilel ta skʼab te Cusán-Risataim, te ajwalil yuʼun Mesopotamia.* Te israeletik waxakeb jaʼbil abatinik ta stojol te Cusán-Risataim.
9 Kʼalal te israeletik la skʼanbeyik te Jehová te yakuk xkoltayotik yuʼune, akʼbotik yuʼun Jehová jtul jkoltaywanej swenta ya xkoltayotik lokʼel yuʼun: jaʼ te Otniel snichʼan Quenaz, te yijtsʼin Caleb.
10 Te espíritu yuʼun te Jehová jul ta stojol te Otniel sok jaʼ och ta juez ta stojol te lum Israel. Kʼalal bajt yakʼ guerra te Otniel, la stsal te Cusán-Risataim, te ajwalil yuʼun Mesopotamia,* melel jaʼ akʼbot ta skʼab yuʼun te Jehová.
11 Ta patil, jich ayin lamalkʼinal 40 jaʼbil ta skʼinalik. Ta patil laj te Otniel snichʼan Quenaz.
12 Te israeletik jajch schaʼpasik te bintik ma lek ya yil te Jehová. Te Jehová la yakʼ te tsalotuk te israeletik yuʼun te Eglón, te ajwalil yuʼun Moab, melel te israeletik jaʼ yakik ta spasel-a te bintik ma lek ya yil te Jehová.
13 Te Eglón la stsob tal te ammonitaetik sok te amalequitaetik yuʼun la skontrainik te lum Israel sok la yuʼuninik te mukʼul lum Jericó.*
14 Te israeletik 18 jaʼbil abatinik ta stojol te Eglón, te ajwalil yuʼun Moab.
15 Jich yuʼun, te israeletik la skʼanbeyik te Jehová te yakuk xkoltayotik yuʼune, jich akʼbotik yuʼun Jehová jtul jkoltaywanej: jaʼ te Ehúd snichʼan Guerá, te talem ta stsʼumbal Benjamín te jaʼ jkʼexam kʼab* winik. Ta patil, te israeletik la stikunik bael te Ehúd ta stojol te Eglón, te ajwalil yuʼun Moab, ta stojel te spatanik.
16 Te Ehúd la spas jun espada te schaʼjejchel ay ye te ayniwan jun xujkʼubil* snajtil, ta patil la schuk ta swaʼel yaʼ ta yutil skʼuʼ.
17 Jich te Ehúd kʼot yakʼ te patanil ta stojol te Eglón, te ajwalil yuʼun Moab, te jaʼ jtul winik te kʼax jujpʼene.
18 Te kʼalal yakʼojix-a te patanil te Ehúd, la stikun bael te machʼatik la yichʼik tal te patanile.
19 Te kʼalal kʼot te banti ay te lokʼombaetik* te ay ta Guilgal, te Ehúd sujt tal sok jich la yalbey te ajwalile: «Ajwalil, ay kʼop kichʼoj tal te jaʼatnax awuʼune». Jich la yal te ajwalil: «¡Chʼabanik!». Jich lokʼik bael spisil te j-abatetik yuʼune.
20 Te kʼalal stukel nakal-a te ajwalil ta scuarto te siketnax yutil te ay ta sba sna, te Ehúd noptsaj* bael ta stojol sok jich la yalbey: «Ay kichʼoj tal kʼop ta atojol te talem ta stojol Dios». Te kʼalal la yaʼiy stojol-abi, te ajwalil la stejkʼan sba jajchel ta smukʼul naktajib.
21 Jich te Ehúd la slokʼes ta skʼexam skʼab* te espada te schukoj ta swaʼel yaʼ, la slowbey ochel ta schʼujt te Eglón.
22 Ta skaj te jujpʼen te Eglón, xchʼixil och bael sok yok te espadae, melel te Ehúd maba la slokʼesbey te espada ta schʼujte, jich lokʼ stsaʼ te ajwalil.
23 Te Ehúd lokʼ ta cuarto te ay ta ba na, la smak jilel sok llave te tiʼnae.
24 Te kʼalal lokʼemix bael-a te Ehúd, sujtik tal te j-abatetik yuʼun te ajwalil, la yilik te makal sok llave te tiʼna te ay ta ba na. Jaʼ yuʼun, jich la yalik: «Yuʼun-niwan ay ta tsaʼnel ta scuarto te siketnax yutile».
25 Te bitʼil jalajikix ta smaliyel, jajch smel yoʼtanik yuʼun. Te kʼalal la yilik te maba ya sjam te ajwalil te scuarto te ay ta ba na, la stsakik te llave sok la sjamik te tiʼnaile. ¡Jich la yilik te metsel ta lum te yajwalik te lajemix-ae!
26 Te kʼalal yakikto ta snopel-a te bin ya spasike, te Ehúd lokʼ bael ta anel, kʼax bael te banti ay te lokʼombaetik.* Lek kʼot ta Seirá.
27 Te kʼalal kʼote, la yokʼesin te xulubil ta witstikil yuʼun Efraín, jich te israeletik la sjokinik koel tal te Ehúd; jaʼ nailajem yuʼunik.
28 Jich albotik yuʼun: «Laʼik, tʼunawonik, melel te Jehová la yakʼbeyexix ta akʼabik te moabitaetik, jaʼ te akontratakik». Jich la stʼunik bael te Ehúd, bajtik ta sbelal Jordán ta be jaʼetik swenta jich ma x-anik bael-a te moabitaetik. Maʼyuk machʼa la yakʼik te ya xkʼaxik baele.
29 Ta yorail-abi la smilik 10 mil ta tul moabitaetik, jaʼik winiketik te ay yipik sok te ma xiwike. Maʼyuk ni jtuluk te lokʼ bael ta anel yuʼunike.
30 Ta kʼajkʼal-abi, jaʼ jich och ta skʼab te israeletik te moabitaetik. Jich ayin lamalkʼinal 80 jaʼbil ta skʼinalik.
31 Te Samgar snichʼan Anat, jaʼ la sjelolin jilel ta juez te Ehúd. Te Samgar la smil 600 ta tul filisteoetik sok jchʼix teʼ te ay sniʼil te ya xtuun ta stijel wakaxetik; jaʼnix jich la skoltay te lum Israel.
Notaetik
^ Ta yantik variante «pʼejkajik», «tojkik».
^ O «yochibal Hamat».
^ Ta hebreo: «chonotik».
^ Ta hebreo: «Aram-Naharaim».
^ Ta hebreo: «Aram».
^ Ta hebreo: «mukʼul lum yuʼun palmeraetik».
^ Ta yantik variante «jxin kʼab».
^ Jaʼniwan ya skʼan ya yal jun xujkʼubil te komnax, jaʼniwan 38 centímetro. Ilawil ta apéndice, B14.
^ O jaʼniwan ya skʼan ya yal «te banti ya slokʼesik tonetik».
^ Ta yantik variante «jijtsʼaj», «tijtsaj».
^ Ta yantik variante «xin kʼab».
^ O jaʼniwan ya skʼan ya yal «te banti ya slokʼesik tonetik».
