Jueces 4:1-24
4 Pero, te kʼalal laj te Ehúd, te israeletik jajch spasikxan te bintik ma lek ya yil te Jehová.
2 Jaʼ yuʼun, te Jehová la yakʼtiklan* jilel ta skʼab te Jabín, te ajwalil yuʼun Canaán te wentainwan ta Hazor. Sísara sbiil te capitán yuʼun te soldadoetik yuʼune, nain ta Haróset-Ha-Goyim.
3 Te Jabín ay yuʼun 900 carretaetik yuʼun guerra te chʼixajtik lokʼel espadaetik ta yokik* sok ayix 20 jaʼbil te yak ta yakʼbeyel tulan swokol te israeletike. Jich yuʼun, te israeletik la skʼanbeyik koltayel te Jehová.
4 Ta yorail-abi, te Débora, te j-alwanej ants, te yinam te Lapidot, jaʼ ya schajpan-a te lum Israel.
5 Kʼayem-a te ya xnajkaj ta yeʼtal spalmera te ay ta yolil yuʼun Ramá sok Betel ta witstikil yuʼun Efraín. Te israeletik ya xbajtik ta stojol swenta ya xchajpanotik yuʼun.
6 Te Débora la stikun tal ta ikʼel te Barac snichʼan Abinoam te ay ta Quedes ta skʼinal Neftalí sok jich la yalbey: «Te Jehová te Dios yuʼun Israel jich ya yalbat ta mantal: ‹Baan ta wits Tabor sok ikʼa bael 10 mil ta tul winiketik yuʼun te stsʼumbal Neftalí sok te stsʼumbal Zabulón.
7 Joʼon ya kikʼ tal ta atojol te Sísara ta be jaʼ yuʼun Cisón, jaʼ te capitán yuʼun te soldadoetik yuʼun Jabín sok yame kikʼ tal te carretaetik yuʼun guerra soknix te soldadoetik yuʼune, yame kakʼtiklanbat ta akʼab›».
8 Te kʼalal jich la yaʼiy stojol te Barac, jich la yal: «Teme ya ajokinon bael, yame xboon; pero teme maba ya ajokinon bael, maba ya xboon».
9 Te Débora jich la yal: «Yak, ya jokinat bael. Pero te yakʼel te guerra ini, mame jaʼukat ya awichʼ awutsilal, melel te Jehová jaʼme ya yakʼbey ta skʼab jtul ants te Sísara». Jich te Débora la sjokin bael te Barac ta Quedes.
10 Jich yuʼun, te Barac la stsob tal te stsʼumbal Zabulón sok te stsʼumbal Neftalí ta Quedes, jokinot bael yuʼun 10 mil ta tul winiketik. Jaʼnix jich jokinot bael yuʼun te Débora.
11 Jich yuʼun, te Héber te quenita-winik xatoj sba ta stojol-a te yantik quenitaetik te talemik ta stsʼumbal Hobab, jaʼ te snial mamal* te Moisés. Spasoj snailpakʼ ta stsʼeel te mukʼul teʼ te ay ta Zaananim ta nopol* Quedes.
12 La yichʼ albeyel te Sísara te mo bael ta wits Tabor te Barac snichʼan Abinoam.
13 Te Sísara oranax la stsob tal spisil te carretaetik yuʼun guerra —900 carretaetik yuʼun guerra te chʼixajtik lokʼel espadaetik ta yokik—* sok spisil te soldadoetik te jokinbil tal yuʼun, te jajch tal ta Haróset-Ha-Goyim yuʼun bajtik ta be jaʼ yuʼun Cisón.
14 Te Débora jich la yalbey te Barac: «Baan, jaʼme skʼajkʼalel ini te ya yakʼbat ta akʼab Jehová te Sísara. ¿Yuʼunbal ma jaʼuk nailajem awuʼun te Jehová?». Jaʼ yuʼun, te Barac ko tal ta wits Tabor, jokinbil yuʼun te 10 mil ta tul winiketik.
15 Ta swenta te espada yuʼun Barac, te Jehová la yakʼ te ma snaʼix bin ya spas te Sísara sok spisil te carretaetik yuʼun guerra soknix spisil te soldadoetik yuʼune. Ta patil ko ta scarreta te Sísara sok an bael ta yok.
16 Te Barac la snuts bael te soldadoetik sok te carretaetik yuʼun guerra, jaʼto ta Haróset-Ha-Goyim. Jich lajik ta espada spisil te soldadoetik yuʼun Sísara. Maʼyuk ni jtuluk kuxul jil.
17 Pero, te Sísara an bael ta snailpakʼ te Jael, te yinam te Héber te quenita-winik, melel te machʼatik ay yuʼun te Héber ay lamalkʼinal yuʼunik sok te Jabín, te ajwalil yuʼun Hazor.
18 Te Jael lokʼ ta stael te Sísara sok jich la yalbey: «Kajwal, la liʼi, ochan. Mame xiwat». Jich och bael ta nailpakʼ te Sísara sok mukot ta pakʼ yuʼun te Jael.
19 Te Sísara jich la yal: «Awokoluk, akʼbon kuchʼ jtebuk jaʼ, takin koʼtan». Te Jael la sjambey stiʼil jun nujkul te ay leche ta yutil sok la yakʼbey yuchʼ. Ta patil la schaʼmuk.
20 Te Sísara jich la yal: «Jilan ta stiʼil te nailpakʼ, teme ay machʼa tal sjojkʼoybat ‹¿Aybal tal jtul winik liʼi?›, maʼyuk, xchiatme».
21 Pero, te Jael te yinam Héber la stsak jchʼix teʼ yuʼun nailpakʼ sok jun martillo. Te kʼalal kʼuben swayel-a te Sísara ta skaj te lujbene, te Jael muken noptsaj* bael ta stojol jich la sbajbey ochel te teʼ ta xujk stiʼba, jaʼto te kʼalal sol kʼaxel ta lum, jich laj te Sísara.
22 Kʼalal kʼot te Barac ta sleel te Sísara, te Jael lokʼ ta stael sok jich la yalbey: «Laʼ, ya kakʼbat awil te winik te yakat ta sleele». Te Barac och bael sok te Jael ta nailpakʼ, tey la yil-a te lajemix te Sísara, tsʼapal ochel ta xujk stiʼba te teʼe.
23 Ta kʼajkʼal-abi, te Dios la yakʼbey ta skʼab te israeletik te Jabín, te ajwalil yuʼun Canaán.
24 Te israeletik la yakʼbeyik guerra te Jabín, te ajwalil yuʼun Canaán, tulanxan la yakʼbeyik guerra, jaʼto te kʼalal la smilik te ajwalile.
Notaetik
^ Ta hebreo: «chonotik».
^ Ta hebreo: «carretaetik te pasbilik ta hierro».
^ Ta yantik variante «smamal nial».
^ Ta yantik variante «tijil».
^ Ta hebreo: «carretaetik te pasbilik ta hierro».
^ Ta yantik variante «jijtsʼaj», «tijtsaj».