Jueces 7:1-25
7 Jich yuʼun, te Jerubaal —jaʼ te Gedeón— sok spisil te winiketik te jokinbil yuʼune, sabto jajchik sok la spas scampamentoik ta stsʼeel te slokʼib jaʼ yuʼun Harod. Yan stukel te scampamento te Madián ay ta stojol norte, te banti ay-a te Gedeón ta stsʼeel te chʼin wits Moré te ay ta spamlej.
2 Te Jehová jich la yalbey te Gedeón: «Bayal winiketik sjokinojat. Jich yuʼun ma xjuʼ ya kakʼbeyex ta akʼabik te madianitaetike. Te jichuk ya jpase, te lum Israel yaniwan xjuʼ ya stoy sba ta jtojol sok jichniwan ya yal: ‹Joʼon-nix jtukel la jkoltay jba›.
3 Jich yuʼun, awokoluk, jich xa awalbey te awiniktake: ‹Te machʼa yak ta nijkel yuʼun xiwel, ya xjuʼ ya sujt bael ta sna›». Jich la yichʼik pasel ta prueba yuʼun te Gedeón. Jich sujtik bael 22 mil ta tul winiketik sok 10 mil ta tul jilik.
4 Pero, te Jehová jich la yalbey te Gedeón: «Bayalto winiketik sjokinojat. Altiklanbeya te akʼa koukik bael ta tiʼ jaʼ yuʼun ya jpastiklan ta prueba. Teme ya kalbat ‹Jaʼ ini ya sjokinat bael›, yuʼun-nanix ya sjokinat bael-a. Pero, teme ya kalbat ‹Jaʼ ini maba ya sjokinat bael›, yuʼun-nanix maba ya sjokinat bael-a».
5 Jich te Gedeón la yikʼtiklan koel ta tiʼ jaʼ te winiketike.
Ta patil, te Jehová jich la yalbey te Gedeón: «Te machʼatik ya yuchʼik jaʼ jich te bin-utʼil ya yuchʼik jaʼ te tsʼiʼetike, parteme xa awakʼ ta stojol te machʼatik ya skejan sbaik ta yuchʼel te jaʼe».
6 Te jayeb ta tul winiketik te la slochʼik moel jaʼ ta skʼabik yuʼun ya yuchʼik, jaʼ 300 ta tul. Te yantikxane la skejan sbaik sok la spajkan sbaik ta yuchʼel te jaʼe.
7 Te Jehová jich la yalbey te Gedeón: «Yame jkoltayex ta swenta te 300 ta tul winiketik te la slochʼik moel jaʼ ta skʼabik sok yame kakʼbat ta akʼab te Madián. Akʼa sujtukik bael ta snaik spisil te yantike».
8 Kʼalal te yantik winiketik la yakʼbeyikix jilel-a te sweʼelik sok te xulubiletik yuʼunik te 300 ta tul winiketik, te Gedeón la stikunlan sujtel ta snaik spisil te yantikxan winiketik yuʼun Israel. Jaʼnax jil sok te 300 ta tul winiketik. Te scampamento te Madián ay ta spamlej te ay ta alanxane.
9 Ta ajkʼabal-abi, te Jehová jich la yalbey te Gedeón: «Chajpana aba sok akʼbeya guerra te scampamento te Madián, melel yame kakʼbat ta akʼab.
10 Pero, teme ya xiwate, ikʼa koel te Purá, te j-abat awuʼun, tey ta campamento.
11 Te kʼalal ya awaʼiy stojol te bin yakik ta yalele, yame yichʼ yip awoʼtan* yuʼun ya awochintay te campamentoe». Jich te Gedeón sok te Purá, te j-abat yuʼune, noptsajik* bael kʼalalto ta stiʼil te campamentoe.
12 Te madianitaetik, te amalequitaetik sok te machʼatik talemik ta slokʼib kʼajkʼal spukoj sbaik jich te bin-utʼil kʼulubetik ta spamlej. Sok kʼax bayal ta kojt te scamelloik te ma xjuʼ ta ajtayel jich te bin-utʼil sjiʼal te stiʼil te mare.
13 Te kʼalal kʼot ta campamento te Gedeón, la yaʼiy stojol te jtul winik yak ta scholbeyel jtul sjoy te swayiche. Jich yak ta yalel: «Aʼiya awaʼiy te bin la jwayichine. La kil jpejch sepel pan te pasbil ta cebada stselet ochel tal ta scampamento te Madián, la smaj sba kʼoel ta jun nailpakʼ. Kʼax tulan kʼot smaj te jich jin koel yuʼune. La swalkʼun sok la slajin ta jkʼaxel te nailpakʼe».
14 Jich la yal te sjoye: «Jamal chikan ta aʼiyel: jaʼ te espada yuʼun te Gedeón snichʼan Joás, te israel-winik. Te Diose yame yakʼbey ta skʼab te Gedeón te Madián sok spisil te campamento».
15 Jaʼnax te kʼalal la yaʼiy stojol te Gedeón te wayichil sok te bin swentaile, la snijan sba ta yichʼel ta mukʼ te Diose. Ta patil sujt bael ta campamento yuʼun Israel sok jich la yal: «¡Chajpana abaik! Melel te Jehová la yakʼbeyexix ta akʼabik te campamento yuʼun te Madián».
16 Jich la slokʼes ta oxtsojb te 300 ta tul winiketike, la yakʼtiklanbey xulubiletik ta spisilik sok kʼibetik te tuchajtik kʼajkʼ ta yutile.
17 Ta patil, jich la yaltiklanbey: «Ilawilik te bin ya jpase sok jichme ya apasik-euk. Te kʼalal ya xkʼoon ta stiʼil te campamentoe, jichme xa apasik-euk te bitʼil ya jpase.
18 Te kʼalal ya kokʼesin te xulubil sok ya yokʼesinik-euk spisil te machʼatik sjokinojone, jaʼnix jich te jaʼexe yame awokʼesinik te xulubiletik ta sjoyobal spisil te campamento sok jichme ya awalik ta aw: ‹¡Ta swenta te Jehová sok ta swenta te Gedeón!›».
19 Te Gedeón sok te 100 ta tul winiketik te jokinbil yuʼune, kʼotik ta stiʼil te campamento te kʼalal nopolix-a* te olil ajkʼabal,* jaʼ mero yorail-a te la sjel sbaik te sturno te jkananetike. La yokʼesinik te xulubiletik sok la swuyik te kʼibetik te yichʼoj ta skʼabike.
20 Jich te oxtsojb winiketik la yokʼesinik te xulubiletik sok la swuyik te kʼibetike. Ta skʼexam skʼabik* la stuchik te kʼajkʼe, ta swaʼel skʼabik la yokʼesinik te xulubiletike sok jich tulan awunik: «¡Te espada yuʼun te Jehová sok te espada yuʼun te Gedeón!».
21 Te winiketik yuʼun Gedeón tekʼajtik jilel ta sjoyobal te campamento, pero spisil te soldadoetik yuʼun te Madián, te jaʼ skontratakik, lokʼik ta anel sok yakik ta aw-a te kʼalal yakik ta anele.
22 Te 300 ta tul winiketike maba la skom sbaik ta yokʼesinel te xulubiletik, te Jehová la yakʼ te talel kʼaxel ya smil sbaik ta espada te winiketik te ayik ta campamento. Te soldadoetik yuʼun te Madián anik bael kʼalal ta Bet-Sitá, kʼotik kʼalal ta Zererá soknix kʼalal ta stiʼil te Abel-Meholá te ay ta nopol* Tabat.
23 Jich yuʼun la yichʼik tsobel tal spisil te winiketik yuʼun Israel: jaʼ te stsʼumbal Neftalí, te stsʼumbal Aser sok spisil te stsʼumbal Manasés. Jich bajt snutsik te madianitaetik.
24 Te Gedeón la stikun winiketik ta spisil te witstikil yuʼun Efraín ta yalel jich ini: «Koanik tal ta yakʼbeyel guerra te madianitaetik sok mame ayuk machʼa xa awakʼik kʼaxel ta be jaʼetik yuʼun Jordán te ya xkʼot kʼalal ta Bet-Bará». Jich spisil te winiketik yuʼun Efraín la stsob sbaik sok maʼyuk machʼa la yakʼik kʼaxel ta be jaʼetik yuʼun Jordán te ya xkʼot kʼalal ta Bet-Bará.
25 La stsakik te chaʼtul te machʼatik yichʼoj mukʼ yaʼtelik ta Madián: jaʼ te Oreb sok te Zeeb. La smilik te Oreb ta mukʼul ton yuʼun Oreb sok la smilik te Zeeb ta banti yawil spʼeojibal tsʼusub yuʼun Zeeb. Maba la skom sbaik ta snutsel te madianitaetike. Ta patil la yichʼbeyik bael te sjol te Oreb sok te Zeeb ta stojol te Gedeón te ay ta skʼinal Jordán.
Notaetik
^ Ta hebreo: «yame yichʼ yip te akʼabe».
^ Ta yantik variante «jijtsʼajik», «tijtsajik».
^ Ta yantik variante «tijilix-a».
^ Jaʼ smakojbey skʼoplal lajuneb ora yijkʼubel kʼinal jaʼto kʼalal ta las 2 ta sakubel kʼinal.
^ Ta yantik variante «xin kʼabik».
^ Ta yantik variante «tijil».
