Jueces 8:1-35
8 Te winiketik yuʼun Efraín jich la sjojkʼoybeyik te Gedeón: «¿Bin yuʼun te jich la apasbonkotike? ¿Bin yuʼun maba la awalbonkotik te kʼalal baat ta yakʼbeyel guerra te Madián?». Jichme tulan la skʼoponik te Gedeón.
2 Jich la yal te Gedeón: «¿Bin jpasoj joʼon te pajal sok te bin apasojik te jaʼexe? ¿Mabal jaʼuk lekxan te stamel te sit awal tsʼunubil* te ya yichʼ tamel ta skʼinal Efraín te ma spaj te bitʼil ya stsobey sit te stsʼusub te Abí-Ézer?
3 Te Dios la yakʼbeyex ta akʼabik te Oreb sok te Zeeb te machʼatik yichʼoj mukʼ yaʼtelik ta Madián. ¿Bin jpasoj joʼon te ya xjuʼ ya spaj te bin apasojik te jaʼexe?». Te kʼalal jich kʼopoj te Gedeón, lamaj yilinbaik ta stojol.
4 Tey-abi, te Gedeón kʼot ta Jordán sok kʼax bael. Manchukme lujbenix-a te Gedeón sok te 300 ta tul winiketik te jokinbil yuʼune, maba la skom sbaik ta snutsel te skontratakike.
5 Jich yuʼun, te Gedeón jich la yalbey te winiketik yuʼun Sucot: «Awokoluk, akʼbeyaik pan te winiketik te sjokinojonike, melel lujbenikix. Te joʼone yakon ta snutsel te Zébah sok te Zalmuná, jaʼ te ajwaliletik yuʼun te Madián».
6 Pero, te machʼatik yichʼoj mukʼ yaʼtelik ta Sucot, jich la yalik: «¿Bin yuʼun ya kakʼbeykotik pan te soldadoetik awuʼune? ¿Yuʼunbal la atsakix te Zébah sok te Zalmuná?».
7 Jich la yal te Gedeón: «Te kʼalal yakʼojbonix ta jkʼab-a te Jehová te Zébah sok te Zalmuná, ya xtal jlombeyex abakʼetalik ta chʼix te ya xchʼi ta jochol takin kʼinal ta swenta te bin la awalike».
8 Tey-abi mo bael ta Penuel, jaʼnix jich la skʼanbey te winiketik yuʼun Penuel te bin la skʼanbey te winiketik yuʼun Sucot, pero jaʼnix jich la yalik te bin la yalik te winiketik yuʼun Sucot.
9 Te Gedeón jaʼnix jich la yalbey-euk te winiketik yuʼun Penuel: «Te kʼalal kaʼiyojix tsalaw-ae, yame jin te toyol tsʼajkʼ ini».
10 Te Zébah sok te Zalmuná ayik ta Carcor sok te soldadoetik yuʼunik, te ayniwan 15 mil ta tul winiketik. Jaʼikxanix te machʼatik jilemik ta spisil te soldadoetik te talemik ta stojol slokʼib kʼajkʼal, melel lajik 120 mil ta tul winiketik te chapalik sok yespadaik-a.
11 Te Gedeón moxan bael ta be yuʼun te machʼatik nainemik ta nailpakʼetik —te ay ta stojol slokʼib kʼajkʼal yuʼun Nóbah sok Jogbehá—, chʼayem yoʼtanik-a te skontratak te kʼalal la yakʼbey guerrae.
12 Anik bael te chaʼtul ajwaliletik yuʼun Madián, jaʼ te Zébah sok te Zalmuná. Pero, te Gedeón la snutstiklan sok la stsaktiklan, jich la yakʼ ochuk xiwel ta yoʼtanik ta spisil te campamentoe.
13 Te kʼalal sujt tal ta yakʼel guerra te Gedeón snichʼan Joás, sujt tal ta be te ya xmo bael ta Heres.
14 Te kʼalal yak ta talel ta be-ae, la stsak jtul kerem te talem ta Sucot sok ay bintik la sjojkʼoybey. Te kerem ini la stsʼibaybey sbiil te machʼatik yichʼoj mukʼ yaʼtelik sok te jwolwanejetik yuʼun Sucot: ta spisil jaʼ 77 ta tul winiketik.
15 Jich te Gedeón bajt yil te winiketik yuʼun Sucot sok jich la yaltiklanbey: «Liʼ kikʼoj tal ta atojolik te Zébah sok te Zalmuná te jaʼ ta swentaik te la alabanonike. Jichme la awalbonik: ‹¿Bin yuʼun ya kakʼbeykotik pan te soldadoetik awuʼun te lujbenike? ¿Yuʼunbal la atsakix te Zébah sok te Zalmuná?›».
16 Tey-abi, te Gedeón la stsaktiklan te jwolwanejetik yuʼun te mukʼul lum Sucot sok la smajtiklan ta chʼixetik te ya xchʼi ta jochol takin kʼinal.
17 Jaʼnix jich la sjin te toyol tsʼajkʼ yuʼun Penuel sok la smiltiklan te winiketik yuʼun te mukʼul lume.
18 Te Gedeón jich la sjojkʼoybey te Zébah sok te Zalmuná: «¿Bin yilel te winiketik te la amilik ta wits Tabor?». Jich la sjakʼik: «Jich yilelik te bitʼil jaʼate. Ta jujuntul jich yilelik-a te bin-utʼil snichʼan ajwalil».
19 Jich la yal: «Jaʼ jbankil kijtsʼinab, jaʼ yalatak te jnane.* Jamal ya kalbeyex ta stojol Jehová te kuxul Dios te maba ya jmilex te manchuk la amilik te jbankil kijtsʼinab».
20 Jich la yalbey ta mantal te Jéter, te sba snichʼane: «¡Miltiklana!». Pero, te kereme maba la slokʼes te yespadae. Yato xiw-a, melel keremto-a.
21 Jich yuʼun, te Zébah sok te Zalmuná jich la yalbeyik te Gedeón: «Teme yuʼun-nix winikat-ae, jaʼat xa amilonkotik». Jich te Gedeón la smil te Zébah sok te Zalmuná, jaʼnix jich la yichʼbey te schʼalil snukʼ te camelloetik yuʼunik te jichik yilel te bin-utʼil yuninal u.
22 Ta patil, te winiketik yuʼun Israel jich la yalbeyik te Gedeón: «Ta swenta te la akoltayotik lokʼel ta skʼab te Madián ochan ta ajwalil kuʼunkotik sok ochuk ta ajwalil te anichʼan sok te amame».*
23 Pero, jich albotik yuʼun te Gedeón: «Maba joʼon ya x-ochon ta ajwalil awuʼunik ni jaʼuk te jnichʼane. Jaʼ ajwalil ya xkʼot awuʼunik te Jehová».
24 Jich la yalxan te Gedeón: «Ay bin ya jkʼan ya jkʼanbeyex: jujuntulex akʼbonik jujun chʼokowil niʼil te la apojike». (Melel te machʼatik la yichʼik tsalel jaʼ ismaelitaetik, ay stakʼinal sniʼik te pasbilik ta oro).
25 Jich la sjakʼik: «Jichuk, ya kakʼbatkotik». Jich la slimik jlijkʼ najtil kʼuʼul sok ta jujuntul tey la yakʼik jun chʼokowil niʼil te la spojik tale.
26 Te chʼokowil niʼil te pasbilik ta oro te la skʼane, jaʼ 1,700 siclo* yalal. Maba tey ajtaybil-a te chʼalilal te jichik yilel te bin-utʼil yuninal u, te stakʼinal chikiniletik, te kuxul morado pakʼetik te pasbilik ta stsotsel tuminchij te jaʼ skʼuʼik-a te ajwaliletik yuʼun te Madián ni jaʼuk te yualik te camelloetik.
27 Te Gedeón la stuuntes te oro-abi yuʼun la spas jlijkʼ efod,* ta patil la yakʼ ta slumal, ta Ofrá, yuʼun ya yilik spisilik. Spisil te lum Israel la yichʼik ta mukʼ te efod, jich kʼot te bin-utʼil pejtsʼ ta stojol te Gedeón sok te machʼatik ay yuʼun ta snae.
28 Jich te Madián la yichʼik uʼuntayel yuʼun te israeletike. Te madianitaetik maʼyuk bin-ora kʼan yakʼbeyikxan guerra te israeletik. Te jayeb kʼajkʼal kuxul te Gedeón ayin lamalkʼinal 40 jaʼbil ta skʼinalik.
29 Sujt bael ta sna te Jerubaal* snichʼan Joás sok tey jil-a.
30 Te Gedeón ayin* 70 ta tul snichʼnab, melel la sle bayal yinam.
31 Te yan yinam* te ay ta Siquem jaʼnix jich la yakʼbey jtul skerem-al-euk te la yakʼbey sbiilin Abimélec.
32 Te kʼalal mamalix-a te Gedeón snichʼan Joás, jun yoʼtan laj bael. La yichʼ mukel ta smukenal te state, jaʼ te Joás, tey ta Ofrá ta skʼinalik te abí-ezritaetik.
33 Jaʼnax te kʼalal laj te Gedeón, te israeletik la schaʼyichʼik ta mukʼ te Baaletik sok jaʼ la sdiosinik te Baal-Berit.
34 Te israeletik chʼay ta yoʼtanik te Jehová te Dios yuʼunike, jaʼ te machʼa koltayotik lokʼel ta skʼab yuʼun spisil te skontratakik te ayik ta sjoyobalik-ae.
35 Jaʼnix jich maba la yakʼbeyik yil te kʼuxul oʼtanil te ma x-ijkitaywan spisil te machʼatik ay yuʼun te Jerubaal —jaʼ te Gedeón—, manchukme bayal bintik lek la spas ta stojol te lum Israel.
Notaetik
^ Ta yantik variante «jmeʼe», «jmamae».
^ Ta yantik variante «awil-al kereme».
^ Jaʼ 19.38 kilo. Ilawil ta apéndice, B14.
^ Jaʼ skʼoplal te Gedeón. Ilawil ta Jueces 6:32.
^ Ta yantik variante «pʼejkaj», «tojk».
