Te lek yachʼil kʼop ya yal te Lucas 14:1-35
-
Jtul winik te sijtʼem sbakʼetal la yichʼ lekubtesel ta skʼajkʼalel sábado (1-6)
-
Pekʼeluk koʼtantik te kʼalal ay banti ya kichʼtik ikʼel (7-11)
-
Jaʼuk ya kikʼtik ta weʼel te machʼa maʼyuk bin-utʼil ya sjeltaybotike (12-14)
-
Lokʼombakʼop yuʼun te machʼatik ikʼbilik te ya smak sbaik ta kʼop (15-24)
-
Te bin ya yijkitay te machʼa ya x-och ta jnopojel (25-33)
-
Te atsʼam te ya xchʼay te schiʼile (34, 35)
14 Ta jun buelta, te Jesús bajt ta weʼel ta sna jtul jwolwanej yuʼun te fariseoetik ta skʼajkʼalel sábado. Te machʼatik tey ayik-a baemnax yoʼtanik ta yilel te Jesuse.
2 Ay jtul winik tey-a te ay ta stojol te Jesús te sijtʼem sbakʼetal.*
3 Jaʼ yuʼun, te Jesús jich la sjojkʼoybey te machʼatik ya snaʼik ta lek te bin ya yal te Ley sok te fariseoetik: «¿Lekbal teme ay machʼa ya yichʼ lekubtesel ta skʼajkʼalel sábado, o maʼuk?».
4 Maʼyuk bin la yalik yuʼun. Jich te Jesús la yikʼ tal ta stojol te winike, la slekubtes sok la stikun bael.
5 Jich albotik yuʼun te Jesús: «Teme ay chʼay koel ta pozo jtul anichʼan o jkojt atoro ta skʼajkʼalel sábado, ¿mabal yakuk xbajt alokʼesik tal ta oranax?».
6 Ma la snaʼik bin ya yalik.
7 Kʼalal te Jesús la yil te machʼatik ikʼbilik ta weʼel te jaʼ ya smakik te lugaretik te banti ya xnajkajik te machʼatik ichʼbilik ta mukʼe, ay bin la yakʼ ta nopel yuʼun:
8 «Te kʼalal ya awichʼ ikʼel ta ilnujpunel, mame xnajkajat ta lugaretik te banti ya xnajkajik te machʼatik ichʼbilik ta mukʼe. Melel ayniwan yan te machʼa ikʼbil te jaʼ ichʼbilxan ta mukʼ yuʼun te bitʼil te jaʼate.
9 Jich yuʼun, te machʼa la yikʼex ta kʼine jichme ya xtal yalbat: ‹Jajchan, yuʼun jaʼ ya xnajkaj tey-a te winik ini›. Jichme kʼexawen ya xbaat ta slajibal lugar.
10 Te kʼalal ya awichʼ ikʼel ta kʼine, najkajan ta slajibal lugar yuʼun jich te kʼalal ya xtal te winik te la yikʼat ta kʼin, jich ya yalbat: ‹Kamigo, laʼ, najkajan liʼi te banti ya xnajkajik te machʼatik ichʼbilik ta mukʼe›. Jichme ya awichʼ ichʼel ta mukʼ ta stojol te machʼatik ikʼbilik ta kʼine.
11 Melel spisil te machʼa mukʼ skʼoplal ya skuy sbae yame yichʼ pejkʼanbeyel skʼoplal, pero te machʼa ya yakʼ ta ilel pekʼel oʼtanile yame yichʼ mukʼubtesbeyel skʼoplal».
12 Patil, jich la yalbey te winik te ikʼot ta weʼel yuʼune: «Te kʼalal ya x-ikʼawanat ta weʼel ta olil kʼajkʼal o ta mal kʼajkʼal, mame jaʼuk xa awikʼ tal te awamigotak, te machʼa jun ameʼ atat sok, te machʼatik ay bin awutoj o te apatxujk te jkʼulejike. Teme jich ya apase, yame yikʼatik ta weʼel-euk, jichme ya sjeltaybat te bin la awakʼbeye.
13 Jich yuʼun, te kʼalal ya x-ikʼawanat ta weʼel, jaʼ xa awikʼ te pobreetik, te machʼatik ma lekuk yok skʼabik, te koxoetik sok te machʼatik ma xyilik kʼinal,
14 jichme tseʼelnax awoʼtan yuʼun, melel maʼyuk bin-utʼil ya xjuʼ ya sjeltaybatik stukel. Jichme ya awichʼ tojel ta yorail chaʼkuxajel yuʼun te machʼatik toj yoʼtanike».
15 Te kʼalal jich la yal te Jesús, ay jtul te machʼa ikʼbil ta weʼel te jich la yale: «¡Bin-nax yutsil te machʼa ya xweʼ* ta banti te Wentainel* yuʼun te Diose!».
16 Jich albot yuʼun te Jesús: «Ay jtul winik te la schajpan bayal weʼelil sok la yikʼ bayal ta tul ants winiketik.
17 Te kʼalal la sta yorail te weʼele, la stikun yabat swenta jich ya yalbey te machʼatik ikʼbilik ta weʼele: ‹Laʼikme, melel chapalix spisil›.
18 Pero, spisilik la sle bin ya smak sbaik-a. Te jtule jich la yal: ‹La jman jkʼinal, ya skʼan ya xbajt kil; pasa perdón, ma xjuʼ kuʼun›.
19 Te yane jich la yal: ‹Ay la jman lajunkojt j-aʼtel wakaxetik, jaʼ yuʼun ya xbajt kil te bin yilel ya x-aʼtejike; pasa perdón, ma xjuʼ kuʼun›.
20 Jich la yalxan te jtule: ‹Nujpunelonto, jich yuʼun ma xjuʼ ya xboon›.
21 Jaʼ yuʼun sujt tal te j-abate, jul scholbey yaʼiy te yajwal spisil te bin kʼot ta pasele. Jich yuʼun, te yajwal na ilin sok jich la yalbey ta mantal te yabate: ‹Baan ta oranax ta mukʼul calleetik sok ta chʼin calleetik yuʼun te lume. Ikʼa tal te pobreetik, te machʼatik ma lekuk yok skʼabik, te machʼatik ma xyilik kʼinal sok te koxoetike›.
22 Te kʼalal sujt tale, jich jul yalbey te yajwale: ‹Kajwal, la jpasix te bin la awal ta mantale, pero ayto jochol te lugaretike›.
23 Te yajwal na jich la yalbeyxan ta mantal te yabate: ‹Baan ta beetik sok ta chʼin beetik. Ikʼa tal ta puersa te ants winiketik yuʼun jich ya xnoj te jnae.
24 Jamal ya kalbeyex te maʼyuk jtuluk te machʼa ikʼbilik ya yaʼiybeyik sbujtsʼ te weʼelil la jchajpane›».
25 Kʼax bayal ta tul ants winiketik jokinbil ta beel yuʼun te Jesuse; tey-abi la sut sba ta stojolik sok jich la yaltiklanbey:
26 «Teme ay machʼa ya xtal ta jtojol, pero jaʼ kʼux-xan ya yaʼiy ta yoʼtan te stat, snan,* yinam, snichʼnab, sbankiltak, swixitak, yijtsʼinab soknix te skuxlejale, ma xjuʼ ya x-och ta jnopojel kuʼun.
27 Te machʼa ya stʼunon, pero maba ya skuch te steʼ yuʼun wokolil,* ma xjuʼ ya x-och ta jnopojel kuʼun.
28 Teme ay jtul ta awolilik te ya skʼan ya spas toyol tsʼajkʼ, ¿mabal nailuk ya snajkan sba ta yilel te jayeb takʼin ya slajin swenta jich ya yil teme ya xlokʼ-a te jayeb stsoboje?
29 Mame jaʼuk te jaʼnax ya sjachbey tal te yiptajibe, pero patil ma xjuʼ yuʼun sjuʼtesel. Jichme ya xjajch ta labanel yuʼun spisil te machʼatik ya x-ilot yuʼune:
30 ‹Te winik ini jajch spas te toyol tsʼajkʼe, pero maba juʼ yuʼun sjuʼtesel›.
31 O teme ay jtul ajwalil te ya skʼan ya xbajt yakʼbey guerra yan ajwalil, ¿mabal nailuk ya snajkan sba ta snopel teme ya xjuʼ yuʼun stsalel te 20 mil soldadoetik ya xtal ta stojol te bitʼil jaʼnax ay 10 mil soldadoetik yuʼune?
32 Teme ya yaʼiy te ma xjuʼ yuʼune, ya stikun jtsojb j-abatetik ta skʼanel lamalkʼinal jich bitʼil te namalto* yak ta talel te yan ajwalile.
33 Jaʼnix jich, jamal ya kalbeyex te ma xjuʼ ya x-ochex ta jnopojel kuʼun teme maba ya awijkitayik* spisil te bintik ay awuʼunike.
34 Kʼax lek te atsʼame. Pero, teme ya xchʼay te schiʼile, ¿bin-utʼil kʼan chiʼubukxan?
35 Jich maba ya xtuun yuʼun te lumkʼinal sok maba ya xtuun yuʼun te kʼaʼal lume; jich yuʼun ya yichʼ chʼojel bael. Te machʼa ay schikine, akʼame schʼam yaʼiy ta lek te kʼope».
Notaetik
^ Jaʼ te kʼalal ya xnoj ta jaʼ sbakʼetal jtul ants winik.
^ Ta griego: «sweʼ pan».
^ O «smeʼ», «smama».
^ O «jakalto».
^ O «ya alokʼes ta awoʼtanik».
