Te lek yachʼil kʼop ya yal te Lucas 15:1-32
15 Tey-abi talik ta stojol spisil te jkʼanpatanetik sok te jmulawiletik yuʼun ya yaʼiyik stojol te bin ya yale.
2 Pero, te fariseoetik sok te escribaetik jich jajchik ta wulwulkʼop: «Te winik ini leknax ya yil sba sok te jmulawiletik sok ya sjokinlan ta weʼel».
3 Jich yuʼun, te Jesús la yaltiklanbey yaʼiy te lokʼombakʼop ini:
4 «Teme ay jtulex te ay 100 ta kojt stuminchij, pero ya xchʼay jkojtuk, ¿mabal yakuk yijkitay jilel te 99 ta kojt ta akiltik sok ya xbajt sle tal te jkojt chʼayem jaʼto teme la stae?
5 Te kʼalal ya stae, tseʼelnax yoʼtan ya skajan tal ta snejkʼel.
6 Te kʼalal ya xkʼot ta snae, ya yikʼ tal te yamigotak sok te spatxujk, sok jich ya yaltiklanbey: ‹¡Tseʼelukme koʼtantik, melel la jtaix te tuminchij kuʼun te chʼayem-ae!›.
7 Jamal ya kalbeyex te jaʼnix jich kʼax bayal tseʼel oʼtanil ta chʼulchan te kʼalal jtul jmulawil ya sujtes yoʼtan te bin-utʼil 99 ta tul te toj yoʼtanik te ma puersauk ya sujtes yoʼtanike.
8 »O teme ay jtul ants te ay lajunsejp dracma-takʼin* yuʼun, pero ya xchʼay jsejpuk, ¿mabal yakuk stsum skʼajkʼ sok ya smes te sna yuʼun ya sle ta lek jaʼto teme la stae?
9 Te kʼalal ya stae, ya yikʼ tal te yamigatak sok te spatxujk, jich ya yaltiklanbey: ‹¡Tseʼelukme koʼtantik, melel la jtaix te jsejp dracma-takʼin* te chʼayem kuʼun-ae!›.
10 Jamal ya kalbeyex te jaʼnix jich te chʼul-abatetik yuʼun Dios tseʼelnax yoʼtanik te kʼalal ya sujtes yoʼtan jtul jmulawil».
11 Tey-abi, jich la yal: «Ay jtul winik te ay chaʼtul snichʼnab.
12 Te ijtsʼinal jich la yalbey te state: ‹Jtat, akʼbon te bin ay ta jwenta yichʼele›. Jich te tatil la spuktiklanbey ta schebalik te bin ay ta swentaik yichʼele.
13 Cheʼoxeb kʼajkʼal ta patil, te ijtsʼinal la stsob spisil te bintik ay yuʼune, bajt ta yan lum te namal* aye, tey bajt stojol lajin-a te bintik ay yuʼune, maʼyuk swentail te bitʼil la slajine.
14 Te kʼalal slajinojix spisil-a, tal tulan wiʼnal ta lum-abi, jajch ta tulan wokol ta skaj te maʼyuk bin ayix yuʼune.
15 Bajt sle yaʼtel ta stojol jtul winik te tey slumal-ae, tikunot ta smakʼlinel chitametik.
16 Yoʼtanuk ya skʼan ya snojes schʼujt-a te bin ya sweʼ te chitametik, pero maʼyuk machʼa ay bin ya x-akʼbot yuʼun.
17 »Te kʼalal la snaʼ kʼinale, jich la yal ta yoʼtan: ‹¡Bayal ta tul j-aʼteletik yuʼun te jtat te kʼax bayal sweʼelike, yan te joʼone yakon ta lajel ta wiʼnal liʼi!
18 Ya sujton bael ta sna te jtate, jich ya xkʼot kalbey: «Jtat, jtaoj jmul ta stojol Dios te ay ta chʼulchan sok ta atojol.
19 Ma snujpʼukix te ya akuyon ta anichʼan, jichuk ya awilonix te bin-utʼil jtul j-aʼtel awuʼune»›.
20 Jich sut bael ta sna te state. Te kʼalal namalto* aye, ilot yuʼun te stat, kʼaxto naʼbot yoʼbolil sba yuʼun, jich animalnax bajt sta talel te snichʼane, la spet* sok la yujtsʼuy* sok skʼuxul yoʼtan.
21 Jich la yalbey te state: ‹Jtat, jtaoj jmul ta stojol Dios te ay ta chʼulchan sok ta atojol, ma snujpʼukix te ya akuyon ta anichʼane›.
22 Te tatil jich la yalbey ta mantal te j-abatetik yuʼune: ‹¡Ta oranax! Lokʼesaik tal te najtil kʼuʼul te mero leke sok akʼbeyaik slap. Jaʼnix jich akʼbeyaik chʼokow* ta yal skʼab sok akʼbeyaik slap step o xanab.
23 Jaʼnix jich milaik te jujpʼen wakax yuʼun ya jweʼtik, akʼa jpastik kʼin yuʼun te sujtix tal te jnichʼane,
24 melel lajem-a te jnichʼan ini, pero chaʼkuxajix; chʼayem-a, pero la jtaix›. Jich och spasik kʼin yuʼun sbujtsʼ kʼinal.
25 »Te bankilal baem ta aʼtel ta skʼinal-a. Te kʼalal sujt tal sok te kʼalal nopol* ya xkʼotix ta snae, la yaʼiy te ay kʼin sok ajkʼote.
26 Jaʼ yuʼun la yikʼ tal jtul j-abat sok la sjojkʼoybey te bin yakik ta spasele.
27 Jich albot yuʼun: ‹Yuʼun sujtix tal te awijtsʼine, jich yuʼun te atat yakʼojix ta milel te jujpʼen wakax, melel lek sujt talel›.
28 Pero, te bankilale ilin yuʼun sok maba la skʼan och bael. Jich yuʼun, te state lokʼ tal sok la skʼanbey wokol te yakuk x-och baele.
29 Jich la yalbey te state: ‹Ayix bayal jaʼbil te aʼtejemon ta atojol jich bitʼil j-abat sok maʼyuk bin-ora jkʼaxuntayojbat amantal; pero maʼyuk bin-ora awakʼojbon jkojtuk chʼin tentsun yuʼun ya jweʼ sok te kamigotake.
30 Pero, te kʼalal sujt tal te anichʼan te la stojol lajinbat te bintik ay awuʼun sok te jmulawil antsetik, la amilbey jujpʼen wakax›.
31 Jich albot yuʼun te state: ‹Jnichʼan, spisil-ora ajokinojon sok jaʼ awuʼun spisil te bintik ay kuʼune.
32 Pero ya skʼan ya jpastik kʼin sok te tseʼeluk koʼtantik yuʼun te bitʼil sujtix tal te awijtsʼine, melel lajem-a, pero chaʼkuxajix; chʼayem-a, pero la jtaix›».
Notaetik
^ O «jakal».
^ O «jakalto».
^ Ta griego: «sjojkʼan sba ta snukʼ».
^ O «sbujtsʼi».
^ O «anillo».
^ O «tijil».
