Te lek yachʼil kʼop ya yal te Lucas 18:1-43
-
Lokʼombakʼop yuʼun te meʼba ants te ma xkom ta skʼanel koltayel (1-8)
-
Te fariseo sok te jkʼanpatan (9-14)
-
Te Jesús sok te chʼin achʼix keremetik (15-17)
-
Te bin la sjojkʼoy jtul jkʼulej winik te yichʼoj mukʼ yaʼtel (18-30)
-
Te Jesús la yal yan buelta te ya yichʼ milele (31-34)
-
La yichʼ jambeyel sit jtul jkʼanbajel winik te ma xyil kʼinal (35-43)
18 Jich yuʼun la yaltiklanbey jun lokʼombakʼop ta swenta te ya skʼan ya skʼoponik Dios sok te manchuk ya skom sbaike.
2 Jich la yal: «Ay jtul juez ta jpam lum te maba xiʼoj te Dios sok te ma xyichʼ ta mukʼ te ants winiketike.
3 Teynix ta lum-abi ay jtul meʼba ants te bayal buelta ya xbajt yilulan te juez ta yalbeyel jich ini: ‹Chajpanbon ta stojil te kʼop jajchem kuʼun sok te jkontrae›.
4 Ay bayal kʼajkʼal te ma la skʼan schajpanbey te kʼop jajchem yuʼune, pero patil jich la yal ta yoʼtan: ‹Manchukme ma jxiʼoj te Dios sok ma xkichʼ ta mukʼ te ants winiketik,
5 te bitʼil ma xkom ta wulwunel te meʼba ants ini, ya jchajpanbey ta stojil te kʼop jajchem yuʼune jich maba ya xtalix-a, melel ma xkujchix kuʼun›».
6 Jich la yalxan te Kajwaltike: «¿Labal awaʼiyik te bin la yal te juez manchukme ma lekuk yoʼtan?
7 Jaxan te Diose, ¿mabal yakuk skoltay te machʼatik tsabil yuʼun te ya xkʼanbot wokol yuʼun ta kʼajkʼal ajkʼabale, sok mabal lamaluknax yoʼtan ya skoltaylan?
8 Ya kalbeyex te oranax ya skoltaylane. Pero, te kʼalal ya xtal te sNichʼan te Winike,* ¿aybal machʼa jich schʼuunel yoʼtan liʼ ta balumilal?».
9 Jaʼnix jich la yal yan lokʼombakʼop ta stojol te machʼatik toj ya skuy sbaik sok te ya skuyik te maʼyuk skʼoplal te yantike.
10 «Ay chaʼtul winiketik te moik bael ta templo ta skʼoponel Dios: te jtule jaʼ fariseo, te yane jaʼ jkʼanpatan.
11 Te fariseo la stejkʼan sba, jich la yal ta skʼoponel Dios ta yoʼtan: ‹Dios kuʼun, ya kalbat wokol yuʼun te bitʼil ma jichukon te bitʼil te yantike: j-elekʼetik, ma tojuk yoʼtanik, j-antsiwejetik, j-antsineletik...,* sok te ma jichukon te bitʼil te jkʼanpatan ini.
12 Cheb buelta ya jkom jweʼel ta jujun semana sok ya kakʼ ta diezmo spisil te bintik ya jtae›.
13 Yan stukel te jkʼanpatane kʼejelto tekʼel, jkʼaxel ma la skʼan la stoy moel sit ta chʼulchan, la smajulan yoʼtan, jich la yal: ‹Dios kuʼun, naʼbon yoʼbolil jba te bitʼil jmulawilone›.
14 Ya kalbeyex te winik ini jaʼ tojxan kʼot-a te bitʼil te fariseo te kʼalal sujt ta snae. Melel spisil te machʼa mukʼ skʼoplal ya skuy sbae yame yichʼ pejkʼanbeyel skʼoplal. Pero, te machʼa ya yakʼ ta ilel pekʼel oʼtanile yame yichʼ mukʼubtesbeyel skʼoplal».
15 Te ants winiketik la yikʼik tal te chʼin achʼix keremetik yuʼunik ta stojol te Jesús yuʼun ya skajan skʼab ta stojolik.* Pero, te jnopojeletik la skomik.
16 Yan stukel te Jesús la skʼan te yakuk yikʼik tal ta stojol te chʼin achʼix keremetik sok jich la yal: «Akʼa talukik ta jtojol te chʼin achʼix keremetik. Mame xa akomik, melel te Wentainel* yuʼun te Diose jaʼ yuʼunik te machʼatik jich stalelik te bin-utʼil te chʼin achʼix keremetik ini.
17 Jamal ya kalbeyex te machʼa ma schʼuun te Wentainel* yuʼun Dios jich te bin-utʼil jtul chʼin achʼix kerem maʼyuk bin-ora ya x-och tey-a».
18 Ay jtul te machʼa yichʼoj mukʼ yaʼtel ta stojol te judioetik jich la sjojkʼoybey te Jesuse: «Lekil Maestro, ¿bin ya skʼan ya jpas yuʼun ya xkuxinon ta sbajtelkʼinal?».
19 Te Jesús jich la yalbey: «¿Bin yuʼun ya awal te lekone? Maʼyuk machʼa lek, jaʼnax lek stukel te Diose.
20 Anaʼoj te bintik ya yal te mantaliletike: mame xa awaʼiy antsiwej sok mame xa awakʼ aba ta antsinel, mame xa awaʼiy milaw, mame xa awaʼiy elekʼ, mame xa awakʼ aba ta lotil testigo, ichʼa ta mukʼ te atat sok te anane».*
21 Jich la yal te winike: «Ta jkeremilto yakon ta spasel spisil ini».
22 Te kʼalal jich la yaʼiy stojol te Jesuse, jich la yalbey: «Ay junxan te bin ya skʼan ya apase: baan, chona te bintik ay awuʼun, te takʼin ya atae pukbeya te pobreetik; jichme ya ata akʼulejal ta chʼulchan. Tey-abi laʼ, tʼunawon».
23 Te kʼalal jich la yaʼiy stojol te winike, bayal la smel yoʼtan yuʼun, melel bayal te skʼulejale.
24 Te Jesús la yilbey sit te winike sok jich la yalbey: «¡Wokol ya yaʼiyik te ya x-ochik ta Wentainel* yuʼun Dios te jkʼulejetike!
25 Ta melel, jaʼ oraxan ya xkʼax jkojt camello ta sit te aguja te bitʼil jtul jkʼulej ya x-och ta Wentainel* yuʼun te Diose».
26 Te machʼatik la yaʼiyik stojol ini jich la yalik: «¿Machʼa ya xjuʼ ya xkolix-a?».
27 Jich la yal te Jesús: «Te bin ma xjuʼ yuʼunik spasel te ants winiketik, ya xjuʼ yuʼun spasel stukel te Diose».
28 Jich la yal te Pedro: «Te joʼonkotike la kijkitaytik jilel spisil te bin ay kuʼuntik swenta ya jtʼunatkotik».
29 Te Jesús jich la yaltiklanbey: «Jamal ya kalbeyex, spisil te machʼa ya yijkitay sna, yinam, sbankiltak, swixitak, yijtsʼinab, smeʼ stat o yal snichʼnab ta swenta te Wentainel* yuʼun te Diose
30 bayalme ya yichʼxan akʼbeyel ta ora ini sok yame sta skuxlejal sbajtelkʼinal ta achʼ balumilal».
31 Te Jesús parte la yikʼ bael te 12 ta tul jnopojeletike sok jich la yaltiklanbey: «Ilawilik, yakotikme ta moel bael ta Jerusalén, spisil te bin la stsʼibayik jilel te j-alwanejetik ta swenta te sNichʼan te Winike* yame xkʼot ta pasel.
32 Jich bitʼil te ya yichʼ akʼel ta skʼab te jyanlumetik, ya slabanik, ya sbolkʼoptayik sok yame stubatayik.
33 Te kʼalal yakʼojbeyikix nujkul-a,* yame smilik, pero ta yoxebal kʼajkʼal yame xchaʼkuxaj».
34 Pero, te jnopojeletike ma la snaʼbeyik swentail spisil-abi, melel la yichʼ mukel ta stojolik te bin ya skʼan ya yal te kʼopetik-abi, maba kʼot ta yoʼtanik te bin la yichʼik albeyele.
35 Te kʼalal yak ta kʼoel ta Jericó te Jesús, ay jtul winik te ma xyil kʼinal te nakal ta tiʼbe te yak ta kʼanbajel.
36 Te kʼalal la yaʼiy stojol te yak ta kʼaxel bayal ants winiketik tey-a, la sjojkʼoy te bin yak ta kʼoel ta pasele.
37 Jich la yalbeyik: «¡Jaʼ yak ta kʼaxel te Jesús te Nazarenoe!».
38 Te kʼalal jich la yaʼiy stojole, jich jajch ta aw: «¡Jesús, sNichʼan David, naʼbon yoʼbolil jba!».
39 Te machʼatik nail yakik ta kʼaxele la skomik sok la yalbeyik te manchuk ya x-awunixe. Pero, tulanxan awun: «¡Snichʼan David, naʼbon yoʼbolil jba!».
40 Jich yuʼun, te Jesús la stejkʼan sba, la stikun ta ikʼel te winike. Te kʼalal ayix ta stojol-a, jich la sjojkʼoybey:
41 «¿Bin ya akʼan te ya jpas ta atojole?». Jich la yal: «Kajwal, ya jkʼan te ya ajambon te jsite».
42 Jich albot yuʼun te Jesús: «Jamuk te asite; lekubatix ta swenta te schʼuunel awoʼtane».
43 Ta oranax la yil kʼinal te winike, tey-abi la stʼun te Jesuse sok yak ta yalbeyel yutsil skʼoplal te Diose. Spisil te ants winiketik te la yilike jajch yalbeyik yutsil skʼoplal-euk te Diose.
Notaetik
^ Jaʼ skʼoplal te ants te ya sloʼlay te smamalale.
^ Jaʼ ya skʼan ya yal te ya yakʼbey bendicione.
^ O «ameʼe», «amamae».
