Te lek yachʼil kʼop ya yal te Lucas 21:1-38
21 Te kʼalal la stoy sit te Jesuse, la yil te jkʼulejetik te yakik ta yotsesel stakʼinik ta cajaetik yuʼun smajtan Dios.
2 Tey-abi la yil jtul meʼba ants te maʼyuk bin ay yuʼun, la yotses chaʼsejp chʼin takʼin te maʼyuk bintik lek ya yichʼix manel-ae,*
3 jich la yal te Jesús: «Jamal ya kalbeyex, te meʼba ants ini te maʼyuk bin ay yuʼune, jaʼ kʼaxtoxan la yakʼ te bin-utʼil te yantike.
4 Melel te yantike jaʼ ya yakʼik ta majtan takʼin te bin sobrailix yuʼunike; yan stukel te meʼba ants te jkʼaxel maʼyuk bin ay yuʼune spisil la yakʼ te bin ay yuʼune».
5 Ta patil, ay machʼatik yakik ta yalbeyel skʼoplal te templo, jaʼ te bitʼil pasbil ta tʼujbil tonetik sok spisil te bintik akʼbil ta stojol te Diose,
6 ta swenta-abi, jich la yal te Jesús: «Spisil te bin yakex ta yilel ta ora ini yame sta yorail te maʼyuk jpʼijuk ton te kajal ya xjil ta sba yan ton. Spisil ya yichʼ jinel».
7 Jaʼ yuʼun, jich la sjojkʼoybeyik: «Maestro, ¿bin-nix-ora ya xkʼot ta pasel-abi sok bin señail ya xchiknaj te kʼalal nopol* ya xkʼotix ta pasele?».
8 Jich albotik yuʼun: «Tsajtayame* abaik. Mame xa awakʼ abaik ta loʼlayel, melel bayal machʼatik ya xtalik te ya yichʼbonik te jbiile sok jich ya yalik ‹Joʼon te Cristoon›, xchiik, o ‹Nopolix* yorail te tiempo te albil skʼoplale›, xchiikme. Pero mame xa atʼunik bael.
9 Jaʼnix jich, te kʼalal ya awaʼiyik te ay guerraetik sok te ay jachkʼopetik, mame xiwex. Melel puersa nail ya xkʼot ta pasel spisil ini, pero mame orauk ya xtal te slajibal kʼajkʼale».
10 Jich la yalxan: «Yame skontrain sbaik te nacionetik sok yame skontrain sbaik te ajwaliletike.
11 Yame xtal tulan nijkel, jaʼnix jich yame xtal tulan wiʼnal sok tulan chamel* ta bayuk. Yame xchiknaj bintik xiʼbantik sba sok mukʼul señailetik ta chʼulchan.
12 »Pero, te kʼalal mato xkʼot ta pasel spisil ini, yame awichʼik tsakel bael sok nutsel. Yame awichʼik ikʼel bael ta sinagogaetik sok yame awichʼik otsesel ta chukel. Jaʼnix jich yame yikʼex bael ta stojol ajwaliletik sok gobernadoretik ta swenta te jbiile.
13 Jichme testigo ya xkʼoex kuʼun ta stojolik.
14 Jaʼ yuʼun, mame nailuk ya x-och anopik te bin ya awalik te kʼalal ya akoltay abaike,
15 melel ya kakʼbeyex anaʼik te bin ya awalik sok ya kakʼbeyex apʼijilik. Manchukme ya stsob sba tal spisil te akontratakike, ma xjuʼ ya sutbeyex te akʼopike sok ma xjuʼ ya yalik te ma jichuk te bin ya awalike.
16 Jaʼnix jich yame yakʼex ta kʼabal te ameʼ atatik, abankiltakik, awixitakik, awijtsʼinabik, te machʼatik ay bin awutojik sok te awamigotakik. Ayme chaʼoxtul te ya awichʼik milele.
17 Ta swenta te jbiile yame spʼajex spisil te ants winiketike.
18 Manchukme jich ya xkʼot ta atojolik-abi, maba ya xchʼay jlijkʼuk te stsotsel ajolike.
19 Teme kujch awuʼunike, yame ata akolelik.
20 »Jich yuʼun, te kʼalal ya awilik te joytaybilix yuʼun soldadoetik te Jerusalén, naʼaikme te yuʼun nopol* ya yichʼix lajinele.
21 Jich yuʼun, te machʼatik ayik ta Judea, akʼa anukik bael ta witstikil; te machʼatik ayik ta yolil te Jerusalén, akʼa lokʼukik bael tey-a, jaʼnix jich te machʼatik baem ta skʼinalik mame sujtikix ochel tey-a.
22 Melel jaʼ yorail lajinel, yuʼun jich ya xkʼot ta pasel spisil te bintik tsʼibaybil jilele.
23 ¡Ayme swokolik te antsetik te yikʼojik alal ta schʼujtik o te ayik ta schuʼuntesel alal ta yorail-abi! Melel yame xtal tulan wokolil ta stojol te lum ini sok yame xtal castigo ta stojol te ants winiketike.
24 Yame yichʼik milel ta espada sok yame yichʼik chukel bael ta spisil nacionetik. Te Jerusalén yame yichʼ tsʼoʼel* ta tekʼel yuʼun te jyanlumetik jaʼto teme tsʼakaj te tiempo akʼbil te jyanlumetike.
25 »Yame xchiknaj señailetik ta kʼajkʼal, ta u sok ta ekʼetik, jaʼnix jich yame yil swokolik te nacionetik ta balumilal te ma snaʼ bin ya spasikix yuʼun te tulan skʼop te mar sok te ya syukʼilan sbae.
26 Te ants winiketik yame xchʼay kʼinal yaʼiyik yuʼun xiwel ta snaʼel te bintik ya xkʼot ta pasel ta balumilale, melel yame yichʼ yukʼilanel te bintik ay ta chʼulchane.
27 Jich yuʼun yame yilik te sNichʼan te Winik* te yak ta talel ta tokal sok yuʼel sok bayal yutsilal.
28 Te kʼalal ya xjajch ta kʼoel ta pasel spisil ini, tejkʼana abaik sok toya ajolik, melel nopolix* te akolelike».
29 Jich yuʼun la yaltiklanbey jun lokʼombakʼop: «Ilawilik te higuera sok te yantik teʼetike.
30 Te kʼalal ya x-achʼub te yabinale, jaʼexnix ya awilik sok ya anaʼik te nopolix* yorail te jaʼale.
31 Jaʼnix jichex-euk, te kʼalal ya awilik te ya xkʼot ta pasel spisil ini, naʼaikme te nopol* ayix te Wentainel* yuʼun te Diose.
32 Jamal ya kalbeyex te maba ya xlaj skʼoplal te jkaj tsʼumbalil ini jaʼto teme kʼot ta pasel spisil ini.
33 Te chʼulchan sok te balumilal yame xlaj, pero te jkʼope maʼyuk bin-ora ya xlaj skʼoplal stukel.
34 »Tsajtayame* abaik te manchuk jaʼ ya xbajt ta awoʼtanik weʼel uchʼel soknix ta snaʼulanel te bin-utʼil ya xkuxinex ta jujun kʼajkʼale, yuʼun maba chʼayem awoʼtanik-a te kʼalal ya xjul staex te kʼajkʼal-abi ta repentenax jich bitʼil pejtsʼ.
35 Melel jich ya xtal ta stojol spisil te ants winiketik te ayik ta balumilale.
36 Jich yuʼun wikʼilukme asitik sok kʼoponaik Dios ta spisil-ora yuʼun jich ya xkolex lokʼel ta swenta te bintik albil skʼoplal te puersa ya xkʼot ta pasele sok jich tekʼel ya xjul staex te sNichʼan te Winike».*
37 Ta kʼajkʼaleltik ya xnojpteswan ta templo, pero ta ajkʼabal ya xbajt ta wayel* ta wits yuʼun Olivoetik.
38 Ta jujun sab ya xkʼot spisil te ants winiketik ta templo ta yaʼiybeyel skʼop te Jesuse.
Notaetik
^ Ta griego: «chaʼsejp leptón».
^ O «tijil».
^ O «Ilame».
^ O «Tijilix».
^ Jaʼ chamel te oranax ya xpujk.
^ O «tijil».
^ O «pechʼel».
^ O «tijilix».
^ O «tijilix».
^ O «tijil».
^ O «Ilame».
^ Jaʼ ya skʼan ya yal te ya xbajt ta wayel ta chʼin lumetik te ay ta wits-abi.
