Te lek yachʼil kʼop ya yal te Lucas 24:1-53
24 Ta sbabial kʼajkʼal yuʼun te semanae, te antsetik buen sab bajtik ta mukenal. La yichʼik bael te bintik sumet* yikʼ te la schajpanike.
2 Pero la yilik te tselkʼunbilix lokʼel te ton te makbil-a te mukenale.
3 Te kʼalal ochik ta yutil te mukenale, maba tey ayix-a te sbakʼetal te Kajwaltik Jesuse.
4 Te kʼalal ma snaʼik-a te bin ya spasik ta swenta-abi, ta repentenax chiknaj ta stsʼeelik chaʼtul winiketik te xlemetnax te skʼuʼike.
5 Bayal xiwik yuʼun te antsetike sok la snijan sbaik koel ta lum. Jaʼ yuʼun, jich albotik yuʼun te winiketike: «¿Bin yuʼun yakex la sleel ta yolil te machʼatik lajemik te machʼa kuxule?
6 Maba liʼ ayix: la yichʼix chaʼkuxajtesel. Julukme ta awoʼtanik te bin la yalbeyex te kʼalal ayto ta Galilea-ae.
7 La yalbeyex te ya yichʼ akʼel ta skʼab jmulawiletik sok te ya yichʼ jijpanel ta teʼ te sNichʼan te Winike,* pero te ya xchaʼkuxaj ta yoxebal kʼajkʼal».
8 Jich jul ta yoʼtanik te bin albotik yuʼun-a te Jesuse.
9 Jich lokʼik bael ta mukenal, bajt scholbeyik yaʼiy spisil te bintik kʼot ta pasel te 11 ta tul jpuk-kʼopetik soknix te yantike.
10 Jaʼik te María Magdalena, Juana sok te María te snan* te Santiago. Jaʼnix jich, te yantik antsetik te jokinbilik yuʼune la scholbeyik yaʼiy-euk te jpuk-kʼopetike.
11 Pero maba la schʼuunik te jpuk-kʼopetike, la skuyik te ayiknax ta jowilkʼop te antsetike.
12 Pero, te Pedro animalnax bajt ta mukenal. Kʼalal la snijan sba ta yilel ochele, jaʼnax la yil te lino-pakʼe. Te kʼalal sujt baele, yak ta snopilanel bael ta yoʼtan binwan-a te kʼot ta pasele.
13 Ta kʼajkʼalnix-abi, ay chaʼtul jnopojeletik te yakik ta bael ta chʼin lum te Emaús sbiil, ayniwan 11 kilómetro yiloj sba sok te Jerusalene.
14 Yakik ta yalbeyel skʼoplal spisil te bin kʼot ta pasele.
15 Te kʼalal yakik ta kʼop-ae* sok ta yalbeyel skʼoplal spisil ini, noptsaj* tal te Jesús sok la sjokinlan ta beel,
16 pero makbot sitik, jich ma la snaʼbeyik sba teme jaʼ te Jesuse.
17 Jich jojkʼoybotik yuʼun: «¿Bin-a te yakex ta yalbeyel skʼoplal ta beele?». Jich la stejkʼan sbaik sok chikan ta sit yelawik te ayik ta mel-oʼtane.
18 Jich la sjakʼ te jtule, te Cleopas sbiile: «¿Bin-utʼil ay-a te ma xa anaʼ te bintik kʼot ta pasel ta Jerusalén te wojey chaʼjey tale? ¿Yuʼunbal jyanlumat te atukel ayat ta nainele?».
19 Jich jojkʼoybotik yuʼun: «¿Bintik-a te kʼot ta pasele?». Jich la yalik: «Jaʼ te bin kʼot ta stojol te Jesús te Nazarenoe, jaʼ jtul j-alwanej te la yakʼ ta ilel yuʼel ta stojol te Dios sok ta stojol te ants winiketik ta swenta te bintik la spas sok te bintik la yale.
20 Te jwolwanej sacerdoteetik kuʼuntik sok te machʼatik yichʼoj mukʼ yaʼtelik la yakʼik ta kʼabal yuʼun ya smilik, jich la sjijpanik ta teʼ.
21 Te joʼonkotik jmaliyojkotik-a te jaʼ ya yakʼ ta libre te lum Israel. Ma jaʼuknax-abi, yoxebalix kʼajkʼal te jich kʼot ta pasel spisil ini.
22 Jaʼnix jich ay chaʼoxtul antsetik te jaʼ joʼtak-kotik te ay bin la yalbotik kaʼiytik te chamnax koʼtantik* yuʼune. Te antsetik sabto-a te bajtik ta mukenal.
23 Te kʼalal ma la stabeyik te sbakʼetale, sujtik tal ta yalel te la yilik chaʼoxtul chʼul-abatetik ta najalsitil* te albotik yuʼun te kuxul te Jesuse.
24 Jaʼnix jich ay chaʼoxtul joʼtak-kotik te bajtik ta mukenal-euke, jich kʼot staik te bin-utʼil la yalik te antsetike. Pero maba la yilik te Jesuse».
25 Jich albotik yuʼun te Jesús: «¡Maʼyuk apʼijilik sok wokol ya xkʼot ta awoʼtanik schʼuunel spisil te bintik la yalik jilel te j-alwanejetike!
26 ¿Mabal jichuk la skʼan te puersa ya xkʼax swokol te Cristo yuʼun ya x-och ta yutsilal?».
27 Jich yuʼun la scholtiklanbey yaʼiy te bintik ya yal te sJun Dios ta swenta te Cristoe, jajch ta Moisés sok te bintik la yalik jilel spisil te J-alwanejetike.
28 Te kʼalal nopol* ya xkʼotikix ta chʼin lum te banti ya xbajtike, la yak’ ta ilel ta stojolik te jich yilel te namalto* ya xbajt stukele.
29 Pero la skʼanbeyik wokol te yakuk xjile. Jich la yalbeyik: «Jokinawotik jilel, malix te kʼajkʼale sok nopol* ya x-ijkʼubix te kʼinale». Jich la schʼuun, la sjokinlan ochel.
30 Te kʼalal ochik ta weʼele, la stsak te pan, la skʼopon Dios, tey-abi la xetʼ sok la yakʼtiklanbey.
31 Jich jambot te sitike, la snaʼbeyik sba; pero tupʼ ta sitik.
32 Jich jajch yalbey sbaik: «¿Mabal xtiltunuk koʼtantik-a te kʼalal yak skʼoponbelotik ta be sok te kʼalal la scholbotik kaʼiytik ta jamal te sJun Diose?».
33 Jich jajchik ta ora, sujtik bael ta Jerusalén, tey kʼotik-a te banti stsoboj sbaik te 11 ta tul jpuk-kʼopetik soknix te yantik te jokinbilik yuʼune.
34 Jich yakik ta yalel: «¡Melelnix-a te chaʼkuxajemix te Kajwaltike sok te la yakʼ sba ta ilel ta stojol te Simón!».
35 Jich kʼot scholbeyik yaʼiy te yantik te bin kʼot ta pasel ta bee sok te la snaʼbeyik sba te kʼalal la xetʼ te pane.
36 Te kʼalal jich yakikto ta yalbeyel skʼoplal-ae, chiknaj ta yolilik te Jesuse sok jich albotik yuʼun: «Lamalukme kʼinal ya awaʼiyik».
37 Pero xiwik sok nijk yoʼtanik yuʼun, melel la skuyik te jaʼ jtul chʼul-abat te yakik ta yilele.
38 Jich albotik yuʼun: «¿Bin yuʼun te yakex ta xiwele? ¿Bin yuʼun te xchebet awoʼtanike?
39 Ilawilik te jkʼab sok te koke: joʼon-nix. Pikawonik sok ilawonik, melel te jtul chʼul-abat maʼyuk sbakʼetal sok maʼyuk sbakel jich bitʼil te yak awilbelonike».
40 Te kʼalal jich la yale, la yakʼbey yilik te skʼab sok te yoke.
41 Te kʼalal mato schʼuun yoʼtanik-a ta skaj te tseʼelnax yoʼtanik sok te chamnax yoʼtanik* yuʼune, jich jojkʼoybotik yuʼun te Jesuse: «¿Aybal jtebuk weʼelil awuʼunik liʼi?».
42 Jich la yakʼbeyik jxejtʼuk wobil chay.
43 La stsak sok la sweʼ ta sitik.
44 Patil, jich la yalxan: «Jaʼ ini jaʼ te bintik la kakʼbeyex anaʼik te kʼalal jokinojexto-ae, te la skʼan te tsʼakal ya xkʼot ta pasel spisil te bin tsʼibaybil jilel ta jtojol ta Ley yuʼun Moisés, ta sjun J-alwanejetik sok ta Salmoetik».
45 Tey-abi la sjambey yoʼtanik swenta ya xkʼot ta yoʼtanik te bin ya skʼan ya yal te sJun Diose.
46 Jich albotikxan yuʼun: «Jich tsʼibaybil jilel ini: puersa ya xkʼax swokol te Cristo sok te ya xchaʼkuxaj ta yoxebal kʼajkʼal ta yolil te machʼatik lajemike
47 soknix te ya yichʼ pukel ta alel ta swenta sbiil ta spisil nacionetik te sujtesel oʼtanil swenta stael perdón yuʼun te mulile, nail ya xjajch bael ta Jerusalén.
48 Jaʼexme testigo ya xkʼoex yuʼun ta spisil-abi.
49 Naʼaikme te ya jtikun tal ta atojolik te bin la yalbon ta jamal te jTate. Pero jilanik liʼ ta lum ini jaʼto teme jul ta atojolik te bin ya xtal ta toyol, jaʼ te yuʼel te Diose».
50 Te Jesús la yikʼ bael te jnopojeletik kʼalal ta Betania, la stoy moel te skʼabe sok la yakʼtiklanbey bendición.
51 Te kʼalal yak ta yakʼbeyel bendición-ae, namaj* bael jtebuk ta stojolik, jich ikʼot moel ta chʼulchan.
52 La snijan sbaik ta stojol sok tseʼelnax yoʼtanik sujtik bael ta Jerusalén.
53 Spisil-ora ayik ta templo ta yalbeyel yutsil skʼoplal te Diose.
Notaetik
^ O «xjukʼet».
^ O «smeʼ», «smama».
^ O «aʼiyej-ae».
^ O «jijtsʼ».
^ O «chajpnax la kaʼiytik».
^ O «tijil».
^ O «jakalto».
^ O «tijil».
^ O «chajpnax la yaʼiyik».
^ O «jakaj».
