Te lek yachʼil kʼop ya yal te Marcos 11:1-33
11 Te kʼalal nopol* ya xkʼotikix ta Jerusalén-ae, la staik te wits yuʼun Olivoetik te ay ta yolil cheb chʼin lumetik te Betfagué sok Betania sbiile, te Jesús la stikun chaʼtul jnopojeletik yuʼun
2 sok jich la yaltiklanbey bael: «Baanik ta chʼin lum te chikan ta ilele. Te kʼalal ya xkʼoex tey-ae, yame awilik jkojt chʼin burro te chukul te mato ayuk machʼa moem-ae. Tilaik* sok ikʼbonik tal.
3 Teme ay machʼa ya sjojkʼoybeyex: ‹¿Bin-a te yakex ta spasele?›, jichme xa awalbeyik: ‹Jaʼ ya xtuun yuʼun te Kajwaltike, pero yame sujtes tal ta ora›».
4 Jich bajtik te jnopojeletik sok chukul kʼot staik ta tiʼ calle te chʼin burro te ay ta xujk tiʼnaile, jich la snitik tal.
5 Pero, ay chaʼoxtul te machʼatik tekʼajtik tey-ae, jich la sjojkʼoybeyik te jnopojeletike: «¿Bistuk awuʼunik te chʼin burroe?».
6 Jich la yalik te bin-utʼil albotik yuʼun te Jesuse, jich akʼbotik tal.
7 Jich la yikʼik tal ta stojol Jesús te chʼin burroe, la slimik snajtil kʼuʼik ta sba, jich la skajtajibin te Jesuse.
8 Bayal machʼatik la slimanik ta be te snajtil kʼuʼike sok ay yantik te la sbojik tal yabinal teʼetik.
9 Te ants winiketik te nailajemik ta stojol te Jesús sok te machʼatik yakik ta talel ta spate, jich yakik ta aw: «¡Awokoluk, Dios, koltaya!* ¡Bin-naxme yutsil te machʼa yak ta talel ta swenta sbiil te Jehová!*
10 ¡Bin-nax yutsil te Wentainel* te yak ta talele, te Wentainel yuʼun te jtatik David! ¡Awokoluk, Dios te ayat ta chʼulchan, koltaya te sNichʼan David!».
11 Te kʼalal och bael ta Jerusalén te Jesuse, bajt ta templo, sok la yil spisil te bintik ay tey-ae. Te bitʼil malix-a te kʼajkʼale, bajt ta Betania sok te 12 ta tul jnopojeletik yuʼune.
12 Te kʼalal lokʼik tal ta Betania ta yan kʼajkʼal, tal swiʼnal te Jesuse.
13 Namalto* la yil jpejt* higuera te ay yabinale, bajt yil teme ay site, pero te kʼalal noptsaj* baele, maʼyuk bin la sta, jaʼnax puro yabinal, melel mato yorailuk te ya yakʼ sit te higuera.
14 Jaʼ yuʼun, jich la yalbey te higuera: «Mame ayuk bin-ora ay machʼa ya sloʼbat asit». La yaʼiyik stojol te jnopojeletik yuʼune.
15 Te kʼalal kʼot ta Jerusalén te Jesuse, och ta templo, jajch snutstiklan lokʼel te machʼatik ya xchonbajik sok ya xmanbajik tey-ae. La sbuchtiklanbey bael smesaik te jeltakʼinetik soknix te snaktajibik te machʼatik ya schonik te stsumutetik.*
16 Jaʼnix jich maba la yakʼ te ay machʼa ya sol kʼaxel ta templo ta skuchel te bintik ay yuʼunike.
17 Ta patil, jich la yalbey te ants winiketik ta nojpteswanej: «¿Yuʼunbal ma jichuk tsʼibaybil ‹Te jnae ya sbiilin na yuʼun oración ta swenta spisil nacionetik›, te xchie? Pero, te jaʼexe akʼatpʼunojikix ta schʼen j-elekʼetik».
18 Te kʼalal la snaʼik stojol te jwolwanej sacerdoteetik sok te escribaetik, jajch schapik bin-utʼil ya smilik. Pero la xiʼik te Jesuse, melel te ants winiketike leknax la yaʼiyik te nojptesel yuʼune.
19 Te kʼalal yakix ta malel-a te kʼajkʼale, te Jesús sok te jnopojeletik yuʼune lokʼik bael ta mukʼul lum.
20 Ta sab ta yan kʼajkʼal, te kʼalal kʼaxik te banti ay te higuera, la yilik te takijemix kʼalalto ta slojpʼ o yisim.*
21 Te Pedro jul ta yoʼtan te bin kʼot ta pasele, jaʼ yuʼun jich la yalbey te Jesús: «Rabí,* ilawil te higuera te la abolobtesbey skʼoplale, takijemix».
22 Te kʼalal jich la yaʼiy stojol te Jesuse, jich la yaltiklanbey: «Ayukme schʼuunel awoʼtanik ta stojol Dios.
23 Jamal ya kalbeyex, teme ay machʼa jich ya yalbey te wits ini ‹Lokʼan bael liʼi, baan, chʼoja aba ochel ta mar› teme xchie, sok teme ma xchebetuk yoʼtan ya yale, teme ay schʼuunel yoʼtan te jich ya xkʼot ta pasel te bin la yale, jichnanix ya xkʼot ta pasel-a.
24 Jich yuʼun ya kalbeyex: spisil te bintik ya akʼanik ta skʼoponel te Diose, kʼanaik sok schʼuunel awoʼtanik sok jichukme xa awilik te awichʼojikixe, yananix x-akʼbotex-a.
25 Te kʼalal tekʼelex ta skʼoponel te Diose, pasbeya perdón te machʼa staoj biluk mulil ta atojole, jichme ya spasbeyex perdón yuʼun amulik te aTatik te ay ta chʼulchane».
26 *
27 Kʼotik yan buelta ta Jerusalén, te kʼalal yak ta beel ta templo-a te Jesuse, talik te jwolwanej sacerdoteetik, te escribaetik sok te jwolwanejetik yuʼun te judioetik,
28 jich la sjojkʼoybeyik: «¿Bin awaʼtel awichʼoj ta spasel ini? ¿Machʼa la yakʼbat awaʼtel ta spasel?».
29 Jich la yal te Jesús: «Ay bin ya jojkʼoybeyex-euk. Teme ya asutbonike, ya kalbeyex-euk te machʼa la yakʼbon kaʼtel ta spasel ini.
30 ¿Machʼa tikunot yuʼun ta yakʼel ichʼjaʼ* te Juane? ¿Jaʼbal te Diose, o jaʼbal te ants winiketike? Albonik kaʼiy».
31 Jaʼ yuʼun, jich jajch yalbey sbaik: «Teme ya kalbeytik te jaʼ tikunot yuʼun te Diose, yame yalbotik: ‹¿Bin yuʼun ma la achʼuunbeyikix skʼop-a jiche?›.
32 Pero, ¿machʼa ya xjuʼ ya yal te jaʼ tikunot yuʼun te ants winiketike?». La xiʼik te lume, melel spisil schʼuunojik te yuʼun-nix j-alwanej-a te Juane.
33 Jaʼ yuʼun, jich la yalbeyik te Jesús: «Ma jnaʼkotik». Jich albotik yuʼun te Jesús: «Jaʼnix jichon-euk maba ya kalbeyex te machʼa la yakʼbon kaʼtel ta spasel ini».
Notaetik
^ O «tijil».
^ O «Tilpʼunaik», «Polaik».
^ Yakik ta skʼanbeyel Dios te yakuk skoltay te Jesuse.
^ O «Jakalto».
^ O «jtejkʼ».
^ O «jijtsʼ».
^ O «palomaetik».
^ O «yejkʼach».
^ Jich ya yichʼ albeyel jtul maestro judío te ichʼbil ta mukʼ.
^ Manchukme ya xchiknaj ta cheʼoxeb Bibliaetik te versículo ini, maba ya xchiknaj ta antiguo junetik te ayik ta griego kʼop te naʼbilik sba ta leke.
