Te lek yachʼil kʼop ya yal te Mateo 15:1-39
15 Jich yuʼun talik ta stojol Jesús chaʼoxtul fariseoetik sok escribaetik te talemik ta Jerusalén, jich la yalbeyik:
2 «¿Bin yuʼun te jnopojeletik awuʼun ya skʼaxuntaybeyik te costumbre yuʼun te antiguo jmeʼ jtatike? Ya kiltik te ma spok* skʼabik te kʼalal ya x-ochik ta weʼele».
3 Jich la yal te Jesús: «¿Bin yuʼun te ya akʼaxuntaybeyik smantal te Dios ta skajnax te ya atʼunik te costumbreetik awuʼunike?
4 Melel jich yaloj te Diose: ‹Ichʼa ta mukʼ te atat sok te anan›,* ‹Te machʼa ya sbolkʼoptay te stat o te snane yame yichʼ milel›.
5 Yan te jaʼexe jich ya awalik: ‹Te machʼa jich ya yalbey te stat o te snan* «Spisil te bin ay kuʼun te ya xjuʼ ya kakʼbate la kakʼbeyix ta smajtan te Diose»,
6 jich yuʼun ma puersaukix te ya yichʼ ta mukʼ te smeʼ state›. Jaʼ jich ya alajinbeyik skʼoplal te skʼop Dios ta skaj te ya atʼunik te costumbreetik awuʼunike.
7 Jchaʼlam-oʼtanex,* jaʼ swentail te jich la yal jilel ta atojolik te j-alwanej Isaiase:
8 ‹Te ants winiketik ini ta sbanax ye ya yichʼonik ta mukʼ, pero te yoʼtanike namal* ay ta jtojol.
9 Tojolnax te ya awichʼonik ta mukʼe, melel skʼopnax winiketik te bin ya awakʼik ta nopele›».
10 Tey-abi la skʼanbey te ants winiketik te akʼa talukik ta stojol, sok jich la yalbey: «Chʼama awaʼiyik sok kʼotuk ta awoʼtanik te bin ya kalbeyexe:
11 Te bin ya xbolobtesot yuʼun te ants winike ma jaʼuk te bin ya x-och ta yee; jaʼ ya xbolobtesot yuʼun te bin ya xlokʼ ta yee».
12 Talik te jnopojeletik ta stojol te Jesuse, sok jich la yalbeyik: «¿Labal awil te ma lek la yaʼiyik te fariseoetik te bin la awale?».
13 Jich la yal te Jesuse: «Spisil te bin ma jaʼuk la stsʼun te jTat te ay ta chʼulchane, yame yichʼ bulel lokʼel kʼalalto ta slojpʼ o yisim.*
14 Akʼa yil sbaik. Jaʼik te machʼatik ma xyilik kʼinal te ya skʼan ya yakʼbeyik yil te yantik te banti ay te bee. Teme ay machʼa ma xyil kʼinal te ya skʼan ya snit yan te ma xyil kʼinal, pajal ya xchʼayik koel ta chʼen».
15 Te Pedro jich la yal: «Chola kaʼiykotik te bin swentail te lokʼombakʼop la awale».
16 Te Jesús jich la yal: «¿Yuʼunbal mato xkʼot ta awoʼtanik-euk te bin la kale?
17 ¿Yuʼunbal ma xa anaʼik te spisil te bin ya x-och ta ye te ants winike ya xkʼot ta schʼujt, patil ya xbajt schʼay jilel ta letrina?
18 Yan stukel te bin ya xlokʼ ta ye te ants winike ya xjajch tal ta yoʼtan, jaʼme te bin ya xbolobtesot yuʼune.
19 Melel ta oʼtanil ya xjajch tal te bintik ma lekuk ta pasele: milaw, antsiwej, antsinel, mulwej,* elekʼ, sleel mulil sok bolkʼoptaywanej.
20 Spisil ini jaʼ te bin ya xbolobtesot yuʼun te ants winike, yan stukel te machʼa ma spok* skʼab te kʼalal ya x-och ta weʼele maba ya xbolobtesot yuʼun».
21 Lokʼ bael tey-a te Jesús, bajt ta skʼinal Tiro sok Sidón.
22 Tey-abi kʼot jtul ants te talem ta skʼinal Fenicia,* jich la yalbey ta aw te Jesús: «¡Kajwal, sNichʼan David, naʼbon yoʼbolil jba! Ochem pukuj ta yoʼtan te achʼix kuʼune sok bayal ya x-utsʼinot yuʼun».
23 Pero, te Jesús ma la sutbey jpʼaluk te skʼope. Jich te jnopojeletik talik ta stojol te Jesús sok jich la yalbeyik ta wokol: «Albeya te akʼa bajtuke, melel ma skom sba ta aw ta jpatik».
24 Jich la yal te Jesús: «Jaʼnax la kichʼ tikunel tal ta stojol te tuminchijetik yuʼun Israel te chʼayemike».
25 Pero tal te ants ta stojol te Jesuse, la snijan sba ta stojol sok jich la yalbey wokol: «¡Kajwal, koltayawon!».
26 Jich la yal te Jesús: «Ma snujpʼuk te ya yichʼ pojbeyel span te alnichʼanetik yuʼun ya yichʼ akʼbeyel te alal tsʼiʼetike».
27 Jich la yal te antse: «Melelnix-a, Kajwal, pero te alal tsʼiʼetik ya sweʼik te xejtʼelul weʼelil ya xchʼay koel ta ye’tal smesa te yajwale».
28 Te Jesús jich la yalbey: «Ants, ¡bayal schʼuunel awoʼtan! Jich akʼa kʼotuk ta pasel te bin la akʼane». Ta yorail-abi lekub te achʼix yuʼune.
29 Te kʼalal lokʼ bael tey-a te Jesuse, kʼot ta jun lugar te nopol* ay ta mar yuʼun Galilea, sok mo bael ta wits. Te kʼalal nakal tey-a,
30 kʼax bayal ta tul ants winiketik tal ta stojol te yikʼojik tal koxoetik, te machʼatik ma lekuk yok skʼabik, te machʼatik ma xyilik kʼinal, umaʼetik sok bayal yantik jchameletik. La yikʼik tal ta stojol te Jesuse, jich la slekubteslan.
31 Chamnax yoʼtanik* yuʼun te ants winiketik kʼalal la yilik te ya xkʼopojik te umaʼetik, te lekubik te machʼatik ma lek yok skʼabik, te toj jajchik ta beel te koxoetik sok te jajch yilik kʼinal te machʼatik ma xyilik kʼinale, jich la yalbeyik yutsil skʼoplal te Dios yuʼun Israel.
32 Tey-abi la yikʼ tal te jnopojeletik yuʼune sok jich la yalbey: «Bayal ya jnaʼbey yoʼbolil sba te ants winiketik ini, melel ayix oxeb kʼajkʼal te sjokinojonike sok maʼyuk sweʼelik. Ma jkʼan ya jtikunlan bael sok swiʼnalik, yaniwan xlaj yipik ta be».
33 Jich la yal te jnopojeletike: «Namal* te banti ayotik sok kʼax bayal ta tul te ants winiketike, ¿banti ya xbajt jtakotik bayal pan yuʼun ya xjuʼ ya xnoj schʼujtik?»
34 Jich la sjojkʼoy te Jesús: «¿Jayeb ta pejch pan ay awuʼunik?». Jich la yalik te jnopojeletik: «Jukpejch pan sok chaʼoxkojt chayetik».
35 Tey-abi la yalbey te ants winiketik te akʼa snajkan sbaik ta lum,
36 la stsak te jukpejch pan sok te chayetike, la skʼopon te Diose, la xetʼtiklan sok la yakʼbey te jnopojeletik, jich te jnopojeletik la spukbeyik te ants winiketike.
37 Spisil weʼik sok noj schʼujtik. Jukeb mukʼul mochetik noj yuʼunik te kʼalal la stsobik te sobraile.
38 Ay 4 mil ta tul winiketik te weʼike, maba tey ajtaybil-a te antsetik sok te alaletike.
39 Te kʼalal la stikunix bael-a te ants winiketike, mo ta barco te Jesús, bajt ta skʼinal Magadán.
Notaetik
^ Jaʼ skʼoplal te bitʼil kʼayemik ta spokel skʼabik te fariseoetik sok te yantik judioetik.
^ O «ameʼ», «amama».
^ O «smeʼ», «smama».
^ O «Jcheb-oʼtanex».
^ O «jakal».
^ O «yejkʼach».
^ Te kʼopil pornéia ta griego kʼop te ya xchiknaj ta versículo ini, ay ta plural. Ilawil ta glosario, Mulwej.
^ Jaʼ skʼoplal te bitʼil kʼayemik ta spokel skʼabik te fariseoetik sok te yantik judioetik.
^ O «Canaán».
^ O «tijil».
^ O «Chajpnax la yilik».
^ O «Jakal».
