Te lek yachʼil kʼop ya yal te Mateo 20:1-34
-
Spisil te machʼatik aʼtejik ta tsʼusubiltik pajal la yichʼik tojel (1-16)
-
Te Jesús la yal yan buelta te ya yichʼ milele (17-19)
-
La skʼanik te mukʼ yaʼtel ya xkʼotik ta Wentainel (20-28)
-
Te Jesús tal yak’ sba ta lajel yuʼun bayal machʼatik ya sta skolelik (28)
-
-
La slekubtes chaʼtul winiketik te ma xyilik kʼinal (29-34)
20 »Melel te Wentainel* yuʼun te chʼulchane jaʼ pajal kʼoem sok jtul yajwal kʼinal te sabto lokʼ bael ta sleel j-aʼteletik swenta ya x-aʼtejik ta tsʼusubiltik yuʼun.
2 Te kʼalal la schap sok te j-aʼteletik te ya stoj jun denario* ta jun kʼajkʼale, la stikunlan bael ta aʼtel ta tsʼusubiltik yuʼun.
3 Lokʼ bael yan buelta te yajwal tsʼusubiltik ta nopol* baluneb ora sakubel kʼinal, la yil te ay winiketik ta yolil mercado te maʼyuk yaʼtelike.
4 Jich la yalbey te winiketike: ‹Baanik ta aʼtel ta tsʼusubiltik kuʼun, jichme ya jtojex te bitʼil stojil ya skʼan pasele›.
5 Jich bajtik ta aʼtel. Chaʼlokʼ bael ta nopol* olil kʼajkʼal soknix ta nopol oxeb ora ta mal kʼajkʼal, jaʼnix jich la yikʼ ta aʼtel te machʼatik maʼyuk yaʼtelike.
6 Ta slajibal, lokʼxan bael ta nopol* joʼeb ora ta mal kʼajkʼal, la sta yantik winiketik te tekʼajtik tey-ae, jaʼ yuʼun jich la sjojkʼoylanbey: ‹¿Bin yuʼun te liʼ ayex ta sjunal kʼajkʼal te maba aʼtejemexe?›.
7 Jich la yal te winiketike: ‹Maʼyuk machʼa yikʼojonkotik ta aʼtel›. Jich albotik yuʼun te yajwal te tsʼusubiltike: ‹Baanik ta aʼtel-euk ta tsʼusubiltik kuʼun›.
8 »Te kʼalal yakix ta ijkʼubel-a te kʼinale, te yajwal te tsʼusubiltik jich la yalbey te machʼa ay ta swenta yilel te j-aʼteletike: ‹Ikʼa tal te j-aʼteletike sok akʼbeya te stojolike. Jaʼ nail xa atoj te machʼatik patil ochikix ta aʼtele, jaʼme patil te machʼatik nail jajchik ta aʼtele›.
9 Te kʼalal kʼotik te machʼatik jajchik ta aʼtel ta nopol* joʼeb ora ta mal kʼajkʼal, la yichʼik tojel jun denario* ta jujuntul.
10 Jaʼ yuʼun, te kʼalal kʼotik te machʼatik nail jajchik ta aʼtele, la skuyik te jaʼ bayalxan ya yichʼik tojele, pero jaʼnix jich la yichʼik tojel jun denario* ta jujuntul.
11 Te kʼalal la yichʼik te stojolike, jajchik ta wulajanel ta kʼop ta stojol te yajwal te kʼinale
12 sok jich la yalik: ‹Jaʼxanix jun ora aʼtejik te machʼatik patil ochik ta aʼtele, ¿bin yuʼun te pajal la atojonkotik soke? Te joʼonkotike sjunal kʼajkʼal tulan aʼtejotik sok kujch kuʼuntik te skʼuxul te kʼajkʼale›.
13 Pero, te yajwal te kʼinale ay jtul te jich la yalbeye: ‹Kamigo, maʼyuk bin ma lekuk jpasojbat. ¿Mabal lajuk jchaptik te jun-nax denario* ya jtojate?
14 Tsaka te atojole, baan. Te machʼatik patil ochik ta aʼtele, jich ya jkʼan ya jtoj-euk te bitʼil ya jtojate.
15 ¿Yuʼunbal ma xjuʼ ya jpas te bin ya skʼan koʼtan sok te bintik ay kuʼune? O ¿yuʼunbal ay sbikʼtal awoʼtan yuʼun te ya jkʼan ya kakʼbey yil slekil koʼtan te yantike?›.
16 Jaʼme jich nail ya xkʼotik te machʼatik patil ayike, te machʼatik nail ayike jaʼme patil ya xkʼotik».
17 Te kʼalal yakik ta moel bael ta Jerusalén-ae, te Jesús parte la yikʼ bael te 12 ta tul jnopojeletik sok jich la yaltiklanbey ta be:
18 «Yakotikme ta moel bael ta Jerusalén. Te sNichʼan te Winik* teyme ya yichʼ akʼel ta skʼab-a te jwolwanej sacerdoteetik sok te escribaetik. Yame yakʼik ta milel
19 sok yame yakʼbeyik ta skʼab te jyanlumetik swenta ya slabanik, yame yakʼbeyik nujkul* sok yame sjijpanik ta teʼ; pero ta yoxebal kʼajkʼal yame yichʼ chaʼkuxajtesel».
20 Tey-abi tal ta stojol Jesús te yinam Zebedeo sok te chaʼtul skerem-ale, la snijan sba ta stojol yuʼun ay bin ya skʼanbey.
21 Jich jojkʼoybot yuʼun te Jesús: «¿Bin-a te ya akʼane?». Jich la yal te antse: «Ala ta mantal te yakuk sjokinat ta naklej te chaʼtul jkerem-al ta banti te Wentainel* awuʼune, jtul ta awaʼel sok jtul ta akʼexam».
22 Jich la yal te Jesús: «Te jaʼexe ma xa anaʼik te bin yakex ta skʼanele. ¿Yuʼunbal ya xjuʼ awuʼunik yuchʼel te bin ay ta copa* te nopol* ya xbajt kuchʼixe?». «Yak, ya xjuʼ kuʼunkotik», xchiik.
23 Jich albotik yuʼun te Jesús: «Melelnix-a, ya xbajt awuchʼik-euk te bin ay ta copa* kuʼun, pero ma jaʼuk ay ta jwenta yalel te machʼa ya xnajkaj ta jwaʼel sok ta jkʼexame. Jaʼnax ay ta swenta te jTat te ya yal ta mantal te machʼatik ya xnajkajik tey ta lugaretik-abi».
24 Te kʼalal la yaʼiyik stojol te yantikxan lajuntule, la yilintayik te chaʼtul jnopojeletik te jun smeʼ statike.
25 Pero, te Jesús la stsob tal te jnopojeletik yuʼune sok jich la yaltiklanbey: «Anaʼojik te ajwaliletik ta balumilal ya yakʼ sbaik ta ichʼel ta mukʼ ta stojol te lume sok te machʼatik yichʼoj mukʼ yaʼtelik ya spasik ta mantal te ants winiketike.
26 Pero, te jaʼexe mame skʼan te jich ya apasike. Te machʼa ya skʼan te mukʼ skʼoplal ya xkʼot ta awolilike ya skʼan te ya x-abatin ta stojol te yantike,
27 te machʼa nail ya skʼan ya xkʼot ta awolilike ya skʼan te ya yakʼ sba ta abatinel ta atojolik.
28 Jaʼ jich tal spas te sNichʼan te Winike.* Maba tal yabatin te yantike, jaʼ tal yak’ sba ta abatinel ta stojol te yantike sok tal yak’ sba ta lajel yuʼun jich ya sta skolelik bayal ta tul ants winiketik».
29 Te kʼalal lokʼik bael ta Jericó, kʼax bayal ta tul ants winiketik tʼunot yuʼun.
30 Ay chaʼtul te machʼatik ma xyilik kʼinal te nakalik ta tiʼbe, te kʼalal la yaʼiyik stojol te yak ta kʼaxel tey-a te Jesuse, jich la yawtayik: «¡Kajwal, sNichʼan David, naʼa yoʼbolil jbakotik!».
31 Te ants winiketik la skomik te machʼatik ma xyilik kʼinal sok la yalbeyik te manchuk ya x-awunike, pero tulantoxan awunik-a: «¡Kajwal, sNichʼan David! ¡Naʼa yoʼbolil jbakotik!».
32 Jich yuʼun, te Jesús la stejkʼan sba, la yikʼ tal te machʼatik ma xyilik kʼinale sok jich la sjojkʼoylanbey: «¿Bin ya akʼan te ya jpas ta atojolike?».
33 Jich la yalik: «Kajwal, ya jkʼankotik te ya ajambotik te jsitkotike».
34 Jich te Jesús bayal la snaʼtiklanbey yoʼbolil sba, jaʼ yuʼun la spikbey te sitike. Ta oranax la yilik te kʼinale, tey-abi la stʼunik te Jesuse.
Notaetik
^ Te jsejp denario jaʼ stojol jun kʼajkʼal aʼtel.
^ O «tijil».
^ O «tijil».
^ O «tijil».
^ O «tijil».
^ Te jsejp denario jaʼ stojol jun kʼajkʼal aʼtel.
^ Te jsejp denario jaʼ stojol jun kʼajkʼal aʼtel.
^ Te jsejp denario jaʼ stojol jun kʼajkʼal aʼtel.
^ Te copa jaʼ ya skʼan ya yal te jich la skʼan Dios te jich ya yichʼ milel te Jesús ta skaj te la slebeyik smul ta bolkʼoptaywanej.
^ O «tijil».
^ Te copa jaʼ ya skʼan ya yal te jich la skʼan Dios te jich ya yichʼ milel te Jesús ta skaj te la slebeyik smul ta bolkʼoptaywanej.
