Te lek yachʼil kʼop ya yal te Mateo 21:1-46
-
Te kʼalal och ta Jerusalén te Jesús jich bitʼil ajwalil (1-11)
-
La snuts lokʼel te jchonbajeletik sok te jmanbajeletik ta templo (12-17)
-
La yakʼ takijuk te higuera (18-22)
-
La sjojkʼoybeyik te Jesús te machʼa akʼbot yaʼtel (23-27)
-
Lokʼombakʼop yuʼun te chaʼtul alnichʼanetik (28-32)
-
Lokʼombakʼop yuʼun te j-aʼteletik te ya xmilawanik (33-46)
-
La spʼajik te ton te ya yakʼbey yiptajib te sjol na (42)
-
21 Te kʼalal noptsajik* ta Jerusalén sok kʼotik ta Betfagué te ay ta wits yuʼun Olivoetik, te Jesús la stikun chaʼtul jnopojeletik yuʼun,
2 jich la yaltiklanbey bael: «Baanik ta chʼin lum te chikan ta ilele. Te kʼalal ya xkʼoex tey-ae, yame awilik jkojt burra te chukul sok te yale. Tilaik* sok ikʼaik tal liʼi.
3 Teme ay machʼa ay bin ya yalbeyexe, jichme xa awalbeyik: ‹Jaʼ ya xtuun yuʼun te Kajwaltike›. Jichme ora ya yalbeyex te ya xjuʼ ya awikʼik tale».
4 Jich la spas te Jesús yuʼun jich ya xkʼot ta pasel-a te bin la yal jilel te j-alwaneje:
5 «Albeyaik te yantsil nichʼan Sion: ‹¡Ilawil! Yakme ta talel te ajwalil awuʼune. Manso yoʼtan sok kajalme ta burro ya xtal, jich, ta chʼin burro, te jaʼ yal jkojt chambalam te ya skuch ijkatsile›», te xchie.
6 Jich bajtik te jnopojeletik sok jich la spasik te bitʼil albotik yuʼun te Jesuse.
7 La yikʼik tal te jkojt burrae sok te chʼin burroe, la slimik snajtil kʼuʼik ta sba, jich la skajtajibin te Jesuse.
8 Jteb ma spisiluk te ants winiketik la slimanik ta be te snajtil kʼuʼike; ay yantik te la sbojik yabinal teʼ sok la slimanik ta be.
9 Jaʼnix jich, te ants winiketik te nailajemik ta stojol te Jesús soknix te machʼatik yakik ta talel ta spate, jich yakik ta aw: «¡Awokoluk, Dios, koltaya te sNichʼan David! ¡Bin-naxme yutsil te machʼa yak ta talel ta swenta sbiil te Jehová!* ¡Awokoluk, Dios te ayat ta chʼulchan, koltaya te sNichʼan David!».
10 Te kʼalal och bael ta Jerusalén te Jesuse, jajchik ta aw spisil te lume sok jich la yalik: «¿Machʼa-a ini?».
11 Jich la yalik te ants winiketik: «¡Jaʼ te Jesús te talem ta Nazaret ta skʼinal Galilea, jaʼ te j-alwanej te albil skʼoplal ya xtale!».
12 Te kʼalal och ta templo te Jesuse, jajch snutstiklan lokʼel te machʼatik ya xchonbajik sok ya xmanbajik tey-a. La sbuchtiklanbey bael smesaik te jeltakʼinetike soknix te snaktajibik te machʼatik ya schonik te stsumutetik.*
13 Jich la yaltiklanbey: «Jich tsʼibaybil ‹Te jnae ya sbiilin na yuʼun oración›, pero te jaʼexe la akʼatpʼunikix ta schʼen j-elekʼetik».
14 Tey ta templo talik te machʼatik ma xyilik kʼinal sok te koxoetik ta stojol te Jesuse, jich la slekubteslan.
15 Te jwolwanej sacerdoteetik sok te escribaetik ilinik yuʼun te kʼalal la yilik te milagroetik la spas te Jesuse sok te kʼalal la yaʼiyik te jich yakik ta aw te chʼin achʼix keremetike «¡Awokoluk Dios, koltaya te sNichʼan David!».
16 Jaʼ yuʼun, jich la yalbeyik te Jesús: «¿Yuʼunbal ma xa awaʼiy te bin yakik ta yalel te chʼin achʼix keremetike?». Jich la yal te Jesús: «Yak, ya kaʼiy stojol. ¿Yuʼunbal maba akʼoponojik te jich ya yal te sJun Dios: ‹Ya awakʼ xlokʼ tʼujbil kʼopetik ta ye te chʼin achʼix keremetik sok te alaletik te yato xchuʼunik›, te xchie?».
17 La yijkitay jilel te lum-abi, bajt ta Betania, tey kʼax yuʼun-a te ajkʼabale.
18 Ta sab te kʼalal chaʼsujt ta Jerusalén te Jesuse, tal swiʼnal.
19 Tey-abi la yil jpejt* higuera ta tiʼbe, bajt yil, pero maba la stabey sit, jaʼnax puro yabinal. Jich la yalbey: «Mame ayuk bin-ora ya awakʼxan asit». Ta oranax takij te higuerae.
20 Te kʼalal la yilik te jnopojeletik te jich kʼot ta pasele, chamnax yoʼtanik* yuʼun sok jich la yalik: «¿Bin-utʼil ay-a te oranax takij te higuerae?».
21 Jich albotik yuʼun te Jesús: «Jamal ya kalbeyex, teme ay schʼuunel awoʼtanik sok teme ma xchebetuk awoʼtanike, mame jaʼuknax ya xjuʼ ya apasik te bin la jpasbey te higuerae, yame xjuʼ ya awalbeyik te wits ini ‹Lokʼan bael liʼi, baan, chʼoja aba ochel ta mar›, jichme ya xkʼot ta pasel.
22 Spisil te bin ya akʼanik ta skʼoponel te Diose, teme ay schʼuunel awoʼtanike, yame awichʼik akʼbeyel».
23 Te kʼalal kʼot ta templo te Jesuse, och ta nojpteswanej, tey-abi talik ta stojol te jwolwanej sacerdoteetik sok te jwolwanejetik yuʼun te judioetik, jich la sjojkʼoybeyik: «¿Bin awaʼtel awichʼoj ta spasel ini? ¿Machʼa la yakʼbat awaʼtel ta spasel?».
24 Jich la yal te Jesús: «Ay bin ya jojkʼoybeyex-euk. Teme ya asutbonike, ya kalbeyex-euk te machʼa la yakʼbon kaʼtel ta spasel ini.
25 ¿Machʼa tikunot ta yakʼel ichʼjaʼ* te Juane? ¿Jaʼbal te Diose, o jaʼbal te ants winiketike?». Jich jajch yalbey sbaik: «Teme ya kalbeytik te jaʼ tikunot yuʼun te Diose, yame yalbotik: ‹¿Bin yuʼun ma la achʼuunbeyikix skʼop-a jiche?›.
26 Pero, teme ya kaltik te jaʼ tikunot yuʼun te ants winiketike, ya jxiʼtik te bin ya yal te lume, melel spisil schʼuunojik te jaʼ j-alwanej te Juane».
27 Jaʼ yuʼun, jich la yalbeyik: «Ma jnaʼkotik». Pero, jich albotik yuʼun te Jesús: «Jaʼnix jichon-euk maba ya kalbeyex te machʼa la yakʼbon kaʼtel ta spasel ini.
28 »¿Bin ya awalik yuʼun ini? Ay jtul winik te ay chaʼtul snichʼnab, jich la yalbey te bankilale: ‹Jnichʼan, baan ta aʼtel ta tsʼusubiltik kuʼuntik›, la yut.
29 Jich la yal te snichʼane: ‹Ma jkʼan ya xboon›, xchi. Pero, patil la sujtes yoʼtan, jich bajt.
30 Jaʼnix jich bajt yalbey-euk te ijtsʼinale. Jich albot yuʼun: ‹Jichuk, jtat, ya xboon›, xchi. Pero, patil maba bajt.
31 ¿Machʼa ta schebal la spasbey te skʼanojel yoʼtan te state?». Jich la yalik: «Jaʼ te bankilale». Jich albotik yuʼun te Jesús: «Jamal ya kalbeyex te jaʼ nailajem awuʼunik te jkʼanpatanetik sok te j-antsinel* antsetik ta banti te Wentainel* yuʼun te Diose.
32 Melel te Juan tal yakʼbeyex awilik te tojil bee, pero maba la achʼuunik. Yan stukel te jkʼanpatanetik sok te j-antsinel* antsetik, la schʼuunik stukel. Manchukme la awilik-abi, manix jaʼuk la asujtes awoʼtanik yuʼun-a sok maba la achʼuunik te bin la yal te Juane.
33 »Chʼama awaʼiyik te yan lokʼombakʼop ini. Ay jtul winik te la stsʼun tsʼusub ta skʼinal sok la sjoy ta tsʼajkʼ. La sjokʼ te banti ya yichʼ pitsʼel te yaʼlel te tsʼusube sok la spas toyol yilojibal kʼinal. Ta patil la yakʼbey jilel skanantay te j-aʼteletike, jich bajt ta yan lum.
34 Te kʼalal kʼot yorail te ya yichʼ tulel* te tsʼusube, te yajwal te tsʼusubiltike la stikun te j-abatetik yuʼun ta stojol te j-aʼteletik swenta ya skʼanbeyik tal te sit ya yichʼ-euke.
35 Pero, te j-aʼteletik la stsakik te j-abatetike, ay jtul te bayal la smajike, te yane la smilik sok la schʼojik ta ton te yane.
36 Te yajwal te tsʼusubiltike la schaʼtikun j-abatetik yuʼun, bayalxan-a te bitʼil nailaltoe. Pero, jaʼnix jich la yichʼik pasbeyel.
37 Ta slajibal la stikun te snichʼane, melel jich la yal: ‹Ya yichʼbonik ta mukʼ stukel te jnichʼane›.
38 Pero, te kʼalal la yilik te jaʼ te nichʼanile, jich la yalbey sbaik te j-aʼteletike: ‹Jaʼ te machʼa ya yichʼ jilel spisil te kʼinale. ¡Akʼa jmiltik, jichme ya kichʼbeytik spisil te bin ay ta swentae!›.
39 Jich yuʼun la stsakik, la slokʼesik bael te banti ay te tsʼusubiltike sok la smilik.
40 Jich yuʼun, te kʼalal ya sujt tal te yajwal te tsʼusubiltike, ¿bin ya spasbey te j-aʼteletike?».
41 Jich la yalik te machʼatik yakik ta yaʼiyel stojole: «Ta skaj te kʼax ma lekuk stalelike, ya xbajt slajinlan ta jkʼaxel sok ya yakʼbey smajan yantik j-aʼteletik te tsʼusubiltik yuʼune, jaʼik te machʼatik ya yakʼbeyik te yajwal kʼinal te sit te tsʼusub te kʼalal ya xlokʼe».
42 Jich albotik yuʼun te Jesús: «Jich ya yal te sJun Dios: ‹Te ton te la spʼajik te jpasnaetike jaʼ te mukʼul ton te ya yakʼbey yiptajib te sjol nae. Jaʼ ini talem ta stojol te Jehová* sok bayal yutsil ya kiltik›. ¿Yuʼunbal jkʼaxel maʼyuk akʼoponojik-abi?
43 Jaʼ yuʼun ya kalbeyex te ya awichʼik pojbeyel te Wentainel* yuʼun te Dios, yame yichʼ akʼbeyel jpam nación te ya yakʼ sit stukele.
44 Jaʼnix jich, te machʼa ya xyal ta sba te ton ini yame sta tulan yejchen. Te machʼa ya xchʼay koel tal ta sba te ton ini, juchʼbil ya xjil ta jkʼaxel».
45 Te kʼalal la yaʼiyik stojol te jwolwanej sacerdoteetik sok te fariseoetik te lokʼombakʼopetik la yal te Jesuse, la snaʼik stojol te jaʼ skʼoplalike.
46 Kʼan stsakik, pero la xiʼik te lume, melel schʼuunojik te jaʼ j-alwanej te Jesuse.
Notaetik
^ O «jijtsʼik».
^ O «Tilpʼunaik», «Polaik».
^ O «palomaetik».
^ O «jtejkʼ».
^ O «chajpnax la yilik».
^ O «jmulawil».
^ O «jmulawil».
^ O «tuchʼel».
