Te lek yachʼil kʼop ya yal te Mateo 3:1-17
3 Ta skʼajkʼalel-abi, jajch ta scholel skʼop Dios te Juan J-akʼ-ichʼjaʼ ta jochol takin kʼinal yuʼun Judea.
2 Jich jajch ta yalel: «Sujtesa awoʼtanik, melel nopol* ayix te Wentainel* yuʼun te chʼulchane».
3 Jaʼme te machʼa la yalbey jilel skʼoplal te j-alwanej Isaías: «Te machʼa ay ta aw ta jochol takin kʼinal: ‹¡Chajpanbeyaik te be yuʼun te Jehová!* Tojobtesaik te beetik yuʼune›», te xchie.
4 Te Juan slapoj skʼuʼ te pasbil ta stsotsel camello sok schukoj schʼujt ta nujkul. La sweʼelin kʼulubetik sok chab.
5 Te ants winiketik ta Jerusalén, ta spamal skʼinal Judea sok ta spamal skʼinal Jordán bajt yilik te Juane.
6 Te Juan la yakʼbey yichʼ jaʼ* te ants winiketik ta mukʼul jaʼ Jordán, tey la yalik ta jamal ta komonsitil te smulike.
7 Kʼalal la yil te Juan te kʼotik bayal ta tul fariseoetik sok saduceoetik te banti yak ta yakʼel ichʼjaʼ,* jich la yaltiklanbey: «Stsʼumbalex jtiʼawal chanetik, ¿machʼa la yalbeyex te ya xjuʼ ya x-anex lokʼel ta stojol yilinba te Diose?
8 Nail akʼaik ta ilel ta awaʼtelik te sujtemix awoʼtanike.
9 Mame jichuk xa awalik ‹Jaʼ jtatik te Abrahán›. Melel te Diose ya xjuʼ ya schiknajtes yal snichʼnab Abrahán ta tonetik ini.
10 Chapalix te echej yuʼun ya sbojbey slojpʼ o yisim* te teʼetike. Jaʼ yuʼun, spisil te teʼetik te ma xyakʼ lek site yame yichʼ tsʼetel sok yame yichʼ otsesel ta kʼajkʼ.
11 Te joʼone jaʼnax ya kakʼbeyex awichʼik jaʼ* ta swenta sujtesel oʼtanil. Pero, te machʼa yak ta talel ta jpate jaʼ mukʼxan yaʼtel stukel sok jkʼaxel ma snujpʼuk te ya jlokʼesbey te step o xanab. Jaʼme ya yakʼbeyex awichʼik jaʼ ta swenta chʼul espíritu* sok kʼajkʼ.
12 Yichʼojix ta skʼab te swelojibal trigo sok yame slokʼesbey ta jkʼaxel te stsʼubil te trigoe. Jaʼnax ya stsobey te sit sok ya skʼej ta yawil, pero te stsʼubile yame yotses ta kʼajkʼ te maʼyuk bin-ora ya xtupʼe».
13 Te Jesús jajch tal ta Galilea, bajt ta Jordán yuʼun ya x-akʼbot yichʼ jaʼ* yuʼun te Juane.
14 Pero, te Juan ma la skʼan la yakʼbey yichʼ jaʼ* te Jesuse. Jich la yalbey: «Ya skʼan te joʼon ya awakʼbon kichʼ jaʼe, ¿bitʼil ay-a te jaʼat ya xtalat ta jtojole?».
15 Jich la yal te Jesús: «Jich akʼa kʼotuk ta pasel ta ora ini, melel jich ya jkʼotestik ta pasel te bin toj ta pasele». Jich la schʼuun spasel te Juane.
16 Te kʼalal la yichʼix jaʼ-a* te Jesús lokʼ tal ta jaʼ, ta yorail-abi jam te chʼulchan sok la yil* ko tal te chʼul espíritu* yuʼun Dios jich bin-utʼil stsumut* ta stojol te Jesuse.
17 Ay machʼa kʼopoj tal kʼalalto ta chʼulchan te jich la yale: «Jaʼ jNichʼan ini te mero kʼux ta koʼtane; kʼax lek koʼtan yuʼun te bin ya spase».
