Te lek yachʼil kʼop ya yal te Mateo 4:1-25
4 Jich yuʼun, te chʼul espíritu* yuʼun te Diose la yikʼ bael ta jochol takin kʼinal te Jesús swenta ya xpasot ta prueba yuʼun te Pukuje.*
2 Te Jesús ayix 40 kʼajkʼal sok 40 ajkʼabal te maba weʼem, ayix bayal swiʼnal-a.
3 Noptsaj* tal te Pukuj* ta stojol te Jesuse, jich la yalbey: «Teme sNichʼanat Dios, kʼatpʼuna ta pan te tonetik ini».
4 Pero, jich la yal te Jesús: «Jich tsʼibaybil: ‹Mame jaʼuknax ta pan ya xkuxin te winike, jaʼ ya xkuxin ta swenta schʼuunbeyel skʼop te Jehovae›».*
5 Jich te Pukuje* la yikʼ bael te Jesús ta Jerusalén* te banti kʼax toyolxan te temploe
6 sok jich la yalbey: «Teme sNichʼanat Dios, chʼoja aba koel, melel jich tsʼibaybil: ‹Te Diose yame spas ta mantal te chʼul-abatetik yuʼune swenta ya xtal skoltayat› sok ‹Ya xtal stsakat yuʼun maba ya alajin awok ta tonetik›».
7 Jich la yal te Jesús: «Jaʼnix jich tsʼibaybil: ‹Mame xa apas ta prueba te Jehová* te Dios awuʼune›».
8 Ta patil, te Pukuje* la yikʼ bael te Jesús ta toyol wits sok la yakʼbey yil spisil te nacionetik soknix te skʼulejale.
9 Sok jich la yalbey: «Ya kakʼbat spisil ini, jaʼnax teme ya akejan aba ta jtojole sok teme ya awichʼon ta mukʼ junuknax bueltae».
10 Jich la yal te Jesús: «¡Baan, Satanás! Melel jich tsʼibaybil: ‹Jaʼnaxme xa awichʼ ta mukʼ te Jehová* te Dios awuʼune sok jaʼnaxme xa awakʼ aba ta abatinel ta stojol›».
11 Jich bajt te Pukuje,* tey-abi tal chʼul-abatetik ta skoltayel te Jesuse.
12 Kʼalal la yaʼiy stojol te Jesús te la yichʼ chukel te Juane, bajt ta Galilea.
13 Te kʼalal lokʼ bael ta Nazaret, bajt ta nainel ta Capernaúm te ay ta nopol* mar, ta skʼinal Zabulón sok Neftalí.
14 Jich la spas te Jesús yuʼun jich ya xkʼot ta pasel-a te bin la yal jilel te j-alwanej Isaías:
15 «¡Galilea te banti nainem jyanlumetik, skʼinal Zabulón sok skʼinal Neftalí te ayat ta sbelal mar, ta smalib kʼajkʼal yuʼun Jordán!
16 Te ants winiketik te ayik ta ijkʼal kʼinal la yilik sakal kʼinal; te ants winiketik te yak ta noptsajel* ta stojolik te lajele chiknaj sakal kʼinal ta stojolik», te xchie.
17 Teyto-abi, jich jajch ta yalel ta scholel skʼop Dios te Jesús: «Sujtesa awoʼtanik, melel nopol* ayix te Wentainel* yuʼun te chʼulchane».
18 Te kʼalal yak ta beel ta stiʼil mar yuʼun Galilea te Jesuse, la yil chaʼtul winiketik te jun smeʼ statik te yakik ta schʼojel ochel stsakojibal schayik ta mar, melel jaʼik jtsakchayetik. Te jtule Simón sbiil te naʼbil sba jich bitʼil Pedro, te yane jaʼ Andrés.
19 Jich la yaltiklanbey: «Laʼik, tʼunawonik, sok yame kakʼex ta stsobel ants winiketik».
20 Ta oranax la yijkitayik te stsakojibal schayike sok la stʼunik te Jesuse.
21 Te kʼalal beenxan baele, la yil chaʼtul winiketik te jun smeʼ statik-euke jaʼ te Santiago sok te Juan te snichʼnab Zebedeo. Ayik ta barco sok-a te statike, yakik ta stsʼisel te banti tuchʼemik te stsakojibal schayike. Jaʼnix jich la yichʼik ikʼel yuʼun te Jesuse,
22 oranax la yijkitayik jilel te sbarcoik soknix la yijkitayik jilel te statike, jich la stʼunik bael.
23 Jich bajt te Jesús ta spamal skʼinal Galilea ta nojpteswanej ta sinagogaetik sok ta scholel te lek yachʼil kʼop yuʼun te Wentainele.* La slekubteslan spisil te machʼatik ayik ta chamel sok te machʼatik ay bintik kʼux ya yaʼiyike.
24 Pujk skʼoplal ta skʼinal Siria te bin yak ta spasele. Jich la yikʼik tal ta stojol spisil te machʼatik ayik ta chamel, te machʼatik ay bin kʼux ya yaʼiyik, te machʼatik ochem pukuj ta yoʼtanik, te machʼatik ya xtupʼ yikʼik sok te machʼatik chamen yok skʼabik. Spisil la slekubteslan.
25 Jaʼ yuʼun la yichʼ tʼunel yuʼun kʼax bayal ta tul ants winiketik te talemik ta Galilea, ta Decápolis,* ta Jerusalén, ta Judea soknix ta lumetik te ay ta jejch Jordán.
Notaetik
^ O «Diabloe».
^ O «Jijtsʼ».
^ O «Diablo».
^ O «Diabloe».
^ O «chʼul lum».
^ O «Diabloe».
^ O «Diabloe».
^ O «tijil».
^ O «jijtsʼajel».
^ O «tijil».
^ O «Lajunpam Lumetik».
