Te lek yachʼil kʼop ya yal te Mateo 6:1-34
-
NOJPTESEL TA WITS (1-34)
-
Tsajtayame abaik te manchuk ya awakʼik ta ilel te bintik toj ya apasike (1-4)
-
Te bin-utʼil ta kʼoponel Dios (5-15)
-
Te Jesús nojpteswan ta skʼoponel Dios (9-13)
-
-
Te skomel weʼelil (16-18)
-
Kʼulejalil ta balumilal sok ta chʼulchan (19-24)
-
«Mame xa amel awoʼtanik» (25-34)
-
«Jaʼ nail xa aleik te Wentainel yuʼun te Diose» (33)
-
-
6 »Tsajtayame* abaik te manchuk ya awakʼik ta ilel ta komonsitil te bintik toj ya apasike. Melel teme jich ya apasike, maba ya awichʼik akʼbeyel amajtanik yuʼun te aTatik te ay ta chʼulchan.
2 Te kʼalal ay machʼa ya awakʼbey koltayel,* mame xa awokʼesin atrompeta, jich bin-utʼil ya spasik te jchaʼlam-oʼtanetik* ta sinagogaetik sok ta calleetik swenta ya yichʼik albeyel lek skʼoplalik. Jamal ya kalbeyex te yichʼojikix stukel te smajtanike.
3 Jaʼ yuʼun, te kʼalal ay machʼa ya awakʼbey koltayele, mame xa awakʼbey snaʼ te akʼexam kʼab te bin la spas te awaʼel kʼabe;
4 jichme maʼyuk machʼa ya snaʼ te kʼalal ay machʼa ya awakʼbey koltayele. Yuʼun jich, te aTat te ay ta chʼulchan te ya yilat stukele yame smajtantesat.
5 »Jaʼnix jich, te kʼalal ya akʼoponik te Diose, mame jichuk xa apasik te bitʼil te jchaʼlam-oʼtanetike.* Ya smulanik te ya stejkʼan sbaik ta skʼoponel Dios ta sinagogaetik sok ta esquina yuʼun mukʼul calleetik swenta ya yichʼik ilel yuʼun. Jamal ya kalbeyex te yichʼojikix stukel te smajtanike.
6 Yan te jaʼate, te kʼalal ya akʼopon te Diose, ochan ta yutil ana, te kʼalal amakojix-a te tiʼnaile, kʼopona te aTat te ay ta chʼulchan te ya yilate sok yame smajtantesat stukel.
7 Te kʼalal ya akʼopon te Diose, mame junuknax te bin ya awalulanbey skʼoplale, melel jich ya spasik te jyanlumetik, te ya skuyik te jich ya yichʼ aʼiybeyel skʼopik teme bayal buelta ya yalulanike.
8 Mame jichuk xa akʼayinik. Te aTatik te ay ta chʼulchan snaʼojix-a te bin ya xtuun awuʼunik te kʼalal mato akʼanojbeyik-ae.
9 »Te jaʼexe, jichme xa akʼoponik te Diose:
»‹Jtatik te ayat ta chʼulchan, akʼa yichʼ chʼultesel te abiile.
10 Akʼa taluk te Wentainel* awuʼune. Akʼa yichʼ pasel te skʼanojel awoʼtan ta balumilal jich bin-utʼil yak ta pasel ta chʼulchan.
11 Akʼbotik te jweʼelkotik ta kʼajkʼal ini;
12 sok pasbotik perdón yuʼun te jmulkotik, jich bitʼil la jpasbeytikix perdón te machʼatik staoj smulik ta jtojolkotike.
13 Sok mame xa awakʼ xyalonkotik ta spasel te mulile, koltayawonkotik lokʼel ta skʼab te Satanase›.*
14 »Melel teme ya apasbeyik perdón te machʼatik staoj smul ta atojolike, yame spasbeyex perdón-euk te aTatik te ay ta chʼulchane.
15 Yan teme maba ya apasbeyik perdón te machʼatik staoj smulik ta atojolike, jaʼnix jich maba ya spasbeyex perdón-euk te aTatik te ay ta chʼulchane.
16 »Te kʼalal ya akom aweʼelike, mame xa awakʼik ta ilel ta asit awelawik te yakex ta mel-oʼtan jich bitʼil ya spasik te jchaʼlam-oʼtanetike,* melel ya syanijtesik te sit yelawik* swenta ya yichʼik ilel te yakik ta skomel sweʼelike. Jamal ya kalbeyex te yichʼojikix stukel te smajtanike.
17 Yan te kʼalal ya akom aweʼel te jaʼate, malbeya aceite te ajole sok poka te asite.
18 Jich maba ya snaʼik-a te ants winiketik te yakat ta skomel aweʼele, jaʼnax ya snaʼ te aTat te ay ta chʼulchan sok yame smajtantesat stukel.
19 »Mame xa atsob akʼulejalik ta balumilal te banti ya xjochʼob sok te ya xchuxub* soknix te banti ya x-och te j-elekʼetike.
20 Jaʼ lek te ya atsob akʼulejalik ta chʼulchan te banti ma xjochʼob sok te ma xchuxub* soknix te banti ma xjuʼ ya x-och te j-elekʼetike.
21 Melel te banti ay te akʼulejalike, tey ay-a te awoʼtanike.
22 »Te asit jaʼ sakal kʼinal yuʼun te abakʼetale. Jaʼ yuʼun, teme jun-nax te banti ya atʼojan te asite, ayme ta sakal kʼinal spisil te abakʼetale.
23 Pero, teme ay bin ya sbikʼtal o’tantay* te asite, ayme ta ijkʼal kʼinal spisil te abakʼetale. Teme ya xkʼatpʼuj ta ijkʼal kʼinal te sakal kʼinal awuʼune, ¡jkʼaxel ayat ta ijkʼal kʼinal!
24 »Maʼyuk jtuluk j-abat te ya xjuʼ ya yakʼ sba ta abatinel yuʼun cheb yajwal, melel ya spʼaj te jtule sok kʼux ta yoʼtan te yane, o jun yoʼtan ta stojol te jtule sok maʼyuk skʼoplal ta yoʼtan te yane. Ma xjuʼ te ya awakʼ abaik ta abatinel ta stojol te Diose soknix ta stojol te Kʼulejalile.
25 »Jaʼ yuʼun ya kalbeyex: mame xa amel awoʼtanik yuʼun te bin-utʼil ya xkuxinex, jaʼ te bin ya aweʼik sok te bin ya awuchʼik; o te abakʼetalik, jaʼ te bin ya alapike. ¿Mabal jaʼuk bayalxan skʼoplal te akuxlejalik te bitʼil te aweʼelike? Sok ¿mabal jaʼuk bayalxan skʼoplal te abakʼetalik te bitʼil te akʼuʼ apakʼike?
26 Ilawilik ta lek te jaʼmal mutetike. Maba ya stsʼunbajik, maba ya yaʼiyik kʼajoj sok maba ya stsobik ta yawil te yawal stsʼunubike, pero jaʼ ya xmakʼlinotik yuʼun te aTatik te ay ta chʼulchane. ¿Mabal jaʼuk bayalxan akʼoplalik-a te bin-utʼil te jaʼmal mutetike?
27 ¿Machʼa ya xjuʼ ya snajtubtes jun xujkʼubil te skuxlejal ta skaj te bayal bintik ya snaʼulan yoʼtane?
28 Jaʼnix jich, ¿bin yuʼun ya amel awoʼtanik yuʼun te akʼuʼ apakʼike? Ilawilik te bin-utʼil ya xchʼi te jaʼmal nichimetike. Maba tulan ya x-aʼtejik sok maba ya yaʼiyik jalab;*
29 pero ya kalbeyex te maʼyuk la spajbey stʼujbilal junuk nichim te skʼuʼ spakʼ te ajwalil Salomone.
30 Teme jich la yakʼbey stʼujbilal te jaʼmal nichimetik te Diose, te jun-nax kʼajkʼal kuxul sok te pajel ya yichʼ chikʼele, ¿mabal kʼaxemuktoxan jich ya yakʼbeyex akʼuʼ apakʼik-a, jaʼex te maʼyuk lek schʼuunel awoʼtanike?
31 Jich yuʼun, mame ayuk bin ya snaʼulan awoʼtanik te jich ya awalike: ‹¿Bin ya jweʼtik?›, o ‹¿Bin ya kuchʼtik?›, o ‹¿Bin ya jlaptik?›.
32 Melel te machʼatik ma snaʼbeyik sba te Diose* jaʼ baem ta yoʼtanik sleel spisil ini. Pero, te aTatik te ay ta chʼulchan ya snaʼ te ya xtuun awuʼunik spisil ini.
33 »Jaʼ yuʼun, jaʼ nail xa aleik te Wentainel* yuʼun te Diose sok te bin toj ta pasel* ya yil stukele, jichme ya awichʼik akʼbeyel spisil ini.
34 Jaʼ yuʼun mame xa amel awoʼtanik yuʼun te pajele, melel te pajele aynanix swokolil-euk-a. Tikʼuk-a te wokoliletik ay awuʼunik ta kʼajkʼal ini.
Notaetik
^ O «Ilame».
^ O «jcheb-oʼtanetik».
^ O «jcheb-oʼtanetike».
^ Ta griego: «Machʼa Chopole».
^ O «jcheb-oʼtanetike».
^ O «jkʼaxel ma schajpan sbaik».
^ O «stsaʼekʼub».
^ O «stsaʼekʼub».
^ Jaʼ ya skʼan ya yal te bayal bintik ya smulane.
^ Maba ya spasik hilo.
^ Jaʼ skʼoplal te jyanlumetik.
