Carta ta stojol te Romanoetik 11:1-36
11 Jaʼ yuʼun, jich ya jojkʼoy: ¿yuʼunbal la spʼaj te Dios te lum yuʼune? ¡Ma jichuk stukel-abi! Melel te joʼone israelon-euk, talemon ta stsʼumbal Abrahán, ta stsʼumbal Benjamín.
2 Te Dios maba la spʼaj te lum yuʼun te nail la stsae. ¿Yuʼunbal ma xa anaʼik te bin ya yal te sJun Dios ta swenta te Elías te kʼalal la yalbey Dios ta swenta te bintik ma lek yak ta spasel te Israel?
3 «Jehová,* la smilikix te j-alwanejetik awuʼun sok la sjinikix te skajtajib chikʼbil majtaniletik awuʼune, joʼonxanix jtukel jilemon sok ya skʼan ya smilonik-euk ta ora ini», te xchie.
4 Pero, ¿bin albot yuʼun te Diose? «Ayto 7 mil ta tul winiketik kuʼun te maba skejanoj sbaik ta stojol te Baal».
5 Jaʼnix jich, ta ora ini ay jtsojb te machʼatik tsabilik ta swenta te slekil yoʼtan Dios te ma snujpʼuk ya kichʼtike.
6 Teme la yichʼik tsael ta swenta slekil yoʼtan Dios te ma snujpʼuk ya kichʼtike, jich ma jaʼukix ta swenta te yaʼtelik te la yichʼik tsaele. Te jaʼuk la yichʼik tsael ta swenta te yaʼtelike, ma jaʼukix slekil yoʼtan Dios ta stojolik te jichuke.
7 ¿Bin ya kaltikix yuʼun-a? Te israeletik maba la staik te bin kʼaxto yakik ta sleel-ae, yan te machʼatik tsabilike la staik stukelik. Te yantike la yakʼ tulanubuk te yoʼtanike,
8 jich te bin-utʼil tsʼibaybil: «Jaʼto ta ora ini, te Dios la yakʼ kʼubuk swayelik. Manchukme ay sitik, ma xyilik kʼinal; manchukme ay schikinik, ma xyaʼiyik kʼop».
9 Jich la yal-euk te David: «Te sweʼelik akʼa kʼatpʼujuk ta chʼajan, ta pejtsʼ, ta kʼojchinojibal sok ta castigo ta stojolik.
10 Akʼa majkuk te sitik yuʼun jich ma xyilik kʼinal-a. Sok akʼa te spisiluk-ora kʼujul te spatike».
11 Jaʼ yuʼun, jich ya jojkʼoy: ¿yuʼunbal jkʼaxel ma juʼ te ya stejkʼan sbaik jajchel te kʼalal la skʼojchin yokik sok te kʼalal yalike? ¡Ma jichuk stukel-abi! Pero, ta skaj te la skʼaxuntayik mantale, tal kolel ta stojol te jyanlumetik, jich jachbot yilinba te israeletik.
12 Jich yuʼun, teme ta swenta skʼaxuntayel mantal yuʼunik la staik bendición te balumilale sok teme ta swenta te ya xpejkʼajik ya staik bendición te jyanlumetike, ¡kʼaxtoxan ya yichʼik bendición te kʼalal ya stsʼakaj te jayebik ta tule!
13 Ta ora ini, jaʼme ya jkʼoponex, jaʼex te jyanlumexe. Jich bitʼil te jpuk-kʼopon ta stojol te jyanlumetike, bayal skʼoplal ta koʼtan te kaʼtel kichʼoj
14 yuʼun jich ya kil teme ya xjuʼ ya jachbey yilinba ta atojolik te jlumale, jich ya xjuʼ ya xkolik chaʼoxtul.
15 Teme la yichʼik pʼajel te judioetik yuʼun jich lek ya yichʼik ilel yuʼun Dios te jyanlumetike, ¿bin yilel ya kiltik teme la yichʼik ikʼel yan bueltae? ¿Mabal jichuk te ya xchaʼkuxajik tale?
16 Teme chʼultesbil jxujtʼuk te smatsʼul te pan te ya yichʼ akʼel ta stojol te Diose, jaʼnix jich chʼultesbil skʼolol te smatsʼul te pane. Teme chʼultesbil te slojpʼ o yisim* te olivoe, jaʼnix jich chʼultesbil te skʼabkʼabe.
17 Pero, teme ay skʼabkʼab te la yichʼ bojel lokʼel, jaʼat te teʼtikil olivoat te la awichʼ tsʼakel te banti la yichʼtiklan bojel lokʼele sok te teynix ya awichʼ awip-euk-a ta slojpʼ o yisim* te olivo,
18 mame xa atoy aba ta stojol te skʼabkʼabe. Pero, teme ya atoy aba ta stojole, naʼame te ma jaʼuk kuxul ta awenta te slojpʼ o yisim* te olivoe, jaʼme kuxulat ta swenta.
19 Jichniwan ya awal: «La yichʼ bojel lokʼel cheʼoxeb skʼabkʼab yuʼun tey la kichʼ tsʼakel-a».
20 ¡Melelnix-a! La yichʼik bojel lokʼel ta swenta te maʼyuk schʼuunel yoʼtanike, yan te jaʼate la awichʼ tsʼakel tey-a ta swenta te schʼuunel awoʼtane. Mame xa atoy aba, xiwukme awoʼtan.
21 Teme Dios maba la spasbey perdón te mero skʼabkʼabe, jaʼnix jich maba ya spasbat perdón-euk.
22 Jich yuʼun nopa ta swenta te slekil yoʼtan Dios sok te ya yakʼ castigo. La yakʼbey castigo te machʼatik ma la yakʼik ta ilel schʼuunel yoʼtanike, pero la yakʼbat awil slekil yoʼtan, jaʼnax teme spisil-ora ayat ta stojol te slekil yoʼtane. Teme maʼuke, yame awichʼ bojel lokʼel-euk.
23 Jaʼnix jich, ta stojol te judioetik teme ya yakʼik ta ilel te schʼuunel yoʼtanike, yame yichʼikxan tsʼakel, melel te Dios ya xjuʼ ya stsʼak yan buelta.
24 Melel teme jaʼat la awichʼ bojel lokʼel ta teʼtikil olivo sok te la awichʼ tsʼakel ta mero steʼel olivo, ¡jaʼuktobalix-a te machʼatik mero skʼabkʼab te olivoe! Maba wokol te ya yichʼ tsʼakelxan ta mero steʼele.
25 Kermanotak, ya jkʼan te ya anaʼik stojol te bin mato yakʼoj ta naʼel-a te Diose yuʼun jich maba pʼij ya akuy abaik: ay jtsojb israeletik te tonob yoʼtanik jaʼto teme ya stsʼakaj te yajtalul te jyanlumetike,
26 jichme ya sta skolel spisil Israel. Jich te bin-utʼil tsʼibaybil: «Te jkoltaywanej yame xlokʼ tal ta Sion sok yame yakʼ te ya yijkitayik spasel te bintik chopol* ya spas te stsʼumbal Jacob.
27 Jaʼ ini jaʼme te chapbilkʼop ya jpas ta stojolik kʼalal ya jchʼaybey te smulike».
28 Ta melel, te judioetik la skontrainik te lek yachʼil kʼop, ta swenta-abi jich la ata alekilalik te jaʼexe; pero te bitʼil jaʼ la yichʼik tsael yuʼun te Diose, kʼux aʼiybilik yuʼun ta swenta te antiguo smeʼ statike.
29 Melel te Dios maba ya sujtes skʼop ta swenta te majtaniletik ya yakʼe sok te ikʼel yuʼune.
30 Te jaʼexe maba achʼuunojbeyik smantal Dios ta nailalto, pero ta ora ini la awichʼik naʼbeyel yoʼbolil abaik ta skaj te la skʼaxuntayik mantal te judioetike.
31 Jaʼnix jich, ta ora ini la skʼaxuntayik mantal te judioetik, ta swenta-abi la snaʼbeyex yoʼbolil abaik te Diose, jaʼnix jich te judioetik ya yichʼik naʼbeyel yoʼbolil sbaik ta ora ini.
32 Melel te Dios la yakʼ te chukul ya xkʼot spisil te ants winiketik ta swenta te skʼaxuntayel mantale yuʼun jich ya yichʼik naʼbeyel yoʼbolil sbaik yuʼun Dios ta spisilik.
33 ¡Kʼax kʼubul te skʼulejal, te spʼijil yoʼtan sok te bin ya snaʼ te Diose! ¡Kʼax wokol ta naʼel te bin-utʼil ya xchajpanwane sok wokol ya xkʼot ta koʼtantik te bin-utʼil ay te beetik yuʼune!
34 Melel, «¿machʼa snaʼojbey te snopojibal yuʼun te Jehová?* O ¿machʼa ya xjuʼ ya x-albot yuʼun te bin ya spase?».
35 O «¿machʼa-a te ay bin nail yakʼojbey te Dios swenta ya sujtesbot sjelol yuʼun?».
36 Melel spisil te bintik ay talem ta stojol, chiknajem ta swenta sok jaʼ yuʼun. Akʼa yichʼ albeyel yutsil skʼoplal ta sbajtelkʼinal. Jichuk.
