Carta ta stojol te Romanoetik 12:1-21
12 Jich yuʼun, kermanotak, ya jkʼanbeyex wokol ta swenta te skʼuxul yoʼtan te Dios te yakuk awakʼ te abakʼetalik jich bin-utʼil kuxul chikʼbil majtanil te chʼultesbil sok te lek yoʼtan yuʼun te Diose; jichme ya atuuntesik ta lek te snopojibal awuʼunik te kʼalal ya x-abatinex ta stojol te Diose.
2 Mame xa akʼayinbeyik stalel te balumilal ini; jaʼukme ya yachʼubtesbeyex te snopojibal awuʼunik te Diose, yuʼun jaʼexnix ya ataik ta ilel te lek, te ya jmulantik spasel sok te toj te skʼanojel yoʼtan te Diose.
3 Ta swenta te slekil yoʼtan Dios te ma snujpʼuk ya kichʼtik te yakʼojbon kile, ya kalbeyex ta jujuntul te mame kʼax mukʼuk akʼoplal ya awaʼiy abaik, te pʼisbiluk sok yichʼojuk swentail te bin-utʼil ya awil abaik ta jujuntule, jaʼ chikan te bin-utʼil smukʼul te schʼuunel awoʼtanik te yakʼojbeyex te Diose.
4 Jich te bin-utʼil te jbakʼetaltik te bayal ta chajp te bintik yichʼoje, pero yanyantik te bin-utʼil ya x-aʼtejike,
5 jaʼnix jichotik-euk, manchukme bayalotik, jun-nax jbakʼetaltik ta swenta te jun ayotik sok te Cristoe, pero ta jujuntul jtsʼakoj jbatik ta jun-nax bakʼetalil.
6 Jaʼ yuʼun, yanyantik te majtanil kichʼojtik akʼbeyel ta swenta te slekil yoʼtan Dios te ma snujpʼuk ya kichʼtike. Teme jaʼ jmajtantik te ya xkʼopojotik jich bitʼil j-alwanej, akʼa jpastik jaʼ chikan te smukʼul te schʼuunel koʼtantik akʼbilotike;
7 teme jaʼ te ya x-abatinotik ta stojol te yantike, jpastik tulan te bantito kʼalal ya xjuʼ kuʼuntik spasel te aʼtelil ini; teme ay machʼa jaʼ smajtan te ya xnojpteswane, akʼa nojpteswanuk;
8 te machʼa ya yakʼ mukʼul oʼtanil, akʼa yakʼ mukʼul oʼtanil; te machʼa ya snaʼ yakʼel te bintik ay yuʼune, akʼame yakʼ sok slekil yoʼtan; te machʼa ya xwolawan, akʼame yakʼ yoʼtan ta spasel; te machʼa ya snaʼbey yoʼbolil sba te yantike, tseʼelukme yoʼtan akʼa spas.
9 Smelelilukme te skʼuxul awoʼtanike. Ilayaik te bintik chopole;* jaʼme xa atʼunik te bin lek ta pasele.
10 Kʼuxme xa awaʼiy abaik sok kʼuxukme ta awoʼtanik te machʼatik pajal schʼuunel awoʼtanik soke, jich te bin-utʼil kʼux ya yaʼiy sbaik te machʼatik jun-nax smeʼ statike. Jaʼme nailuk xa awakʼik ta ilel te talel kʼaxel ya awichʼ abaik ta mukʼe.
11 Tulanukme ya x-aʼtejex, mame xchʼajubex. Akʼame yakʼbeyex awipik te chʼul espiritue,* akʼa abaik ta abatinel ta stojol te Jehová.*
12 Tseʼelukme awoʼtanik yuʼun te bin yakex ta smaliyele. Kujchukme awuʼunik te kʼalal ay awokolike. Mame xa akom abaik ta skʼoponel Dios.
13 Akʼbeyaik te bin ay awuʼunik te machʼatik chʼultesbilik jaʼ chikan te bin ya xtuun yuʼunike. Spisilukme-ora ya x-otseswanex ta anaik.
14 Spisilukme-ora xa akʼanbeyik bendición ta stojol te machʼatik ya skontrainexe; kʼanbeyaik bendición ta stojolik, mame jaʼuk xa akʼanik te bin chopol* ya xkʼot ta stojolike.
15 Tseʼelukme awoʼtanik sok te machʼatik tseʼel yoʼtanik; okʼanikme sok te machʼatik ya x-okʼike.
16 Jichme xa awilik te yantik te bin-utʼil ya awil abaik te jaʼexe; mame jaʼuk ya xbajt ta awoʼtanik sleel te bintik mukʼ akʼoplalik ya xkʼoex yuʼune, pekʼelukme akʼoplal xa awaʼiy abaik. Mame pʼijuk xa akuy abaik.
17 Mame xa asutbeyik ta bin chopol* te machʼa chopol bin ya spasbeyexe. Pasaik ta stojol spisil te ants winiketik te bin lek ya yilike.
18 Te bantito kʼalal ya xjuʼ awuʼunike, lamalukme kʼinal awuʼunik sok spisil te ants winiketike.
19 Kermanotak te kʼuxex ta koʼtane, mame xa asutbeyik spakol te bin ma lek ya awichʼik pasbeyele, ijkitayaik ta swenta yilinba te Diose. Melel jich tsʼibaybil: «‹Joʼonme ya jsutbey spakol; joʼon ya kakʼbey stoj›, xchi te Jehová».*
20 Jaʼ lek te jich ya apase, «teme ay swiʼnal te akontrae, akʼbeya sweʼel; teme takin yoʼtane, akʼbeya bin ya yuchʼ; melel teme jich ya apase, jichme ya abusanbey kʼajkʼal akʼal ta sjol».*
21 Mame xa awakʼ stsalat* te bin chopole,* tsalame te bin chopol ta swenta te bin leke.
Notaetik
^ O «ma leke».
^ O «ma lek».
^ O «ma lek».
^ Jaʼ ya skʼan ya yal te ya jkʼunubtesbeytik yoʼtan sok ya kulubtesbeytik te stulanil yoʼtan te ants winike.
^ O «yuʼuninat».
^ O «ma leke».
