Carta ta stojol te Romanoetik 13:1-14
13 Ta apisilik, akʼa abaik ta wentainel yuʼun te machʼatik yichʼoj mukʼ yaʼtelik, melel jich ya skʼan Dios te yichʼoj yaʼtelike; te machʼatik yichʼoj mukʼ yaʼtelik jaʼ akʼbilik yuʼun Dios te banti ya xwentainwanike.
2 Jich yuʼun, te machʼatik ya skontrainik te machʼatik yichʼoj mukʼ yaʼtelike jaʼ yakik ta skontrainel te bin schajpanoj te Diose; te machʼatik ya skontrainik te bin schajpanoj te Diose yame yichʼik castigo.
3 Te machʼatik ya spasik te bin leke maba ya xiʼik te ajwaliletike, pero te machʼatik ya spasik te bin chopole* ya xiʼik te ajwaliletike. Teme maba ya akʼan ya axiʼik te ajwaliletike, mame xa akom abaik ta spasel te bin leke, jichme ya yalbeyex lek akʼoplalik,
4 melel jaʼ yakik ta abatinel ta stojol Dios ta swenta alekilalik. Pero, teme yakat ta spasel te bin chopole,* xiwanme yuʼun, melel te machʼatik yichʼoj mukʼ yaʼtelike maba tojol te stsakojik te yespadaike. Jaʼ yakik ta abatinel ta stojol Dios yuʼun ya yakʼbeyik spakol sok ya yakʼbeyik castigo te machʼa ya spas te bin chopole.
5 Jich yuʼun ya skʼan te ya awakʼ abaik ta wentainel ta stojolik, ma jaʼuknax yuʼun te ya awichʼik castigoe, jaʼnix jich ta swenta-euk te lekuk te bin ya yalbeyex te awoʼtanike.
6 Jaʼ swentail te ya atoj apatanik-euke, melel te machʼatik ayik ta ajwalil jaʼik j-abatetik yuʼun Dios ta stojol te ants winiketik te spisil-ora ya x-aʼtejik.
7 Akʼbeyaik te bin ya skʼanbeyex ta jujuntule: te machʼa ya skʼan patanil, akʼbeya; teme ay machʼa ya skʼan te ay bin ya atojbeye, tojbeya; teme ay machʼa ya skʼan xiʼele, xiʼame; teme ay machʼa ya skʼan ichʼel ta mukʼe, ichʼa ta mukʼ.
8 Mame ayuk machʼa ay abetik yuʼun, jaʼuknaxme te talel kʼaxel kʼux ya awaʼiy abaike; melel te machʼa kʼux ta yoʼtan te spatxujke jich skʼotesoj ta pasel te bin ya yal te leye.
9 Melel te Ley jich ya yal: «Mame xa awaʼiy antsiwej sok mame xa awakʼ aba ta antsinel, mame xa awaʼiy milaw, mame xa awaʼiy elekʼ, mame ayuk sbikʼtal awoʼtan» sok te yantikxan mantaliletik te ayik ta Ley, jun-nax smakojbey skʼoplal ta mantalil ini: «Kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate».
10 Te kʼuxul oʼtanil maʼyuk bin chopol* ya spasbey te yantik. Jich yuʼun, te kʼuxul oʼtanil jaʼ te skʼotesel ta pasel te leye.
11 Jaʼnix jich pasaik ini, melel anaʼojik te bin kʼajkʼalil yakotik ta kuxinele. Anaʼojik te yorailix te ya xwijkʼ asitik yuʼun te wayele, melel kʼax nopol* ayix te jkoleltike, kʼaxtoxan jich-a te bin-utʼil ochotik ta jchʼuunjele.
12 Kʼubenix te ajkʼabale, nopol* ya sakubix te kʼinale. Akʼa kijkitaytik te yaʼtelul te ijkʼal kʼinale, akʼa jlaptik te aʼtejibaletik yuʼun te sakal kʼinale.
13 Stojilukme te bin-utʼil ya xkuxinotik jich te bin-utʼil ya xkuxinotik ta kʼajkʼaleltik; mame jpastik kʼin te jkʼaxel ma stojiluke sok mame kaʼiytik yakubel, mame kaʼiytik mulwej* sok mame jkʼayinbeytik stalel te machʼatik maʼyuk skʼexlalik ta skʼaxuntayel mantal,* mame jachtik kʼop sok mame kaʼiytik lab-oʼtantaywanej.
14 Jaʼme xa atʼunbeyik ta lek stalel te Kajwaltik Jesucristo sok mame jaʼuk xa achajpan ta awoʼtanik te bintik ya smulan spasel te abakʼetalike.
