Carta ta stojol te Romanoetik 16:1-27
-
Te Pablo la yakʼ ta naʼbeyel sba te kermanatik Febe (1, 2)
-
Spatjibal yoʼtanik ta stojol te jchʼuunjeletik ta Roma (3-16)
-
Tsajtaya abaik ta stojol te machʼatik ya xatawanik (17-20)
-
La stikunik spatjibal oʼtanil te sjoʼtak ta aʼtel te Pablo (21-24)
-
La yakʼ ta naʼel te Dios te bin ma yakʼoj ta naʼel-a (25-27)
16 Ya kakʼbeyex anaʼbeyik sba te kermanatik Febe, te ya x-abatin ta congregación te ay ta Cencreas,
2 ikʼbonikme ta atojolik sok slekil awoʼtanik ta swenta te Kajwaltik jich te bin-utʼil ya spasik te machʼatik chʼultesbilik sok te yakuk akoltayik ta swenta te bin ya xtuun yuʼune, melel jaʼnix jich bayal machʼatik skoltayojbey skʼoplal-euk, la skoltayon-euk.
3 Akʼbonik spatjibal yoʼtan te Prisca* sok te Áquila, te joʼtak ta aʼtel ta stojol te Cristo,
4 jaʼik te machʼatik la yakʼik ta wokol skuxlejalik ta jtojol, ma joʼukon-nax ya kalbey wokol ta stojolik, jaʼnix jich spisil te congregacionetik te maba judioetik ya yalik wokol ta stojolik-euk.
5 Jaʼnix jich akʼbon spatjibal yoʼtanik te congregación te ya stsob sba ta snae. Akʼbonik spatjibal yoʼtan te Epéneto te kʼux ta koʼtane, te jaʼ sbabial jnopojel yuʼun Cristo ta skʼinal Asia.
6 Akʼbonik spatjibal yoʼtan te María, te tulan aʼtejem ta atojolike.
7 Akʼbonik spatjibal yoʼtan te Andrónico sok te Junias, te jaʼik joʼtak ta chukel sok te ay bin kut-tiklanoj jba soke, naʼbil sbaik ta lek yuʼun te jpuk-kʼopetik sok te ayix bayal tiempo schʼuunojik te Cristo yuʼun-a te joʼone.
8 Akʼbonik spatjibal yoʼtan te Ampliato te kʼux ta koʼtan ta swenta te Kajwaltike.
9 Akʼbonik spatjibal yoʼtan te Urbano, te joʼtaktik ta aʼtel ta stojol te Cristo, sok akʼbonik spatjibal yoʼtan te kermanotik Estaquis te kʼux ta koʼtane.
10 Akʼbonik spatjibal yoʼtan te Apeles, te lek ilbil yuʼun te Cristo. Akʼbonik spatjibal yoʼtan te machʼatik ayik ta sna te Aristóbulo.
11 Akʼbonik spatjibal yoʼtan te Herodión, te ay bin kutoj jba soke. Akʼbonik spatjibal yoʼtan te machʼatik ayik ta sna te Narciso, te schʼuunojik te Kajwaltike.
12 Akʼbonik spatjibal yoʼtan te Trifena sok te Trifosa, te jaʼik antsetik te tulan yakik ta aʼtel ta stojol te Kajwaltike. Akʼbonik spatjibal yoʼtan te kermanatik Pérsida te kʼux ta koʼtantike, melel bayal aʼtejem ta stojol te Kajwaltike.
13 Akʼbonik spatjibal yoʼtan te Rufo te tsabil yuʼun te Kajwaltike, sok akʼbonik spatjibal yoʼtan te snan,* te jich kʼoem te bin-utʼil jnan-euke.
14 Akʼbonik spatjibal yoʼtan te Asíncrito, te Flegonte, te Hermes, te Patrobas, te Hermas soknix te hermanoetik te jokinbilik yuʼune.
15 Akʼbonik spatjibal yoʼtan te Filólogo sok te Julia, te Nereo sok te yijtsʼin* achʼixe, te Olimpas sok spisil te machʼatik chʼultesbilik te jokinbilik yuʼune.
16 Te k’alal ya apatbey aba awoʼtanik, talel kʼaxel ujtsʼuya* abaik. Spisil te congregacionetik yuʼun te Cristo ya stikunbeyex spatjibal awoʼtanik.
17 Kermanotak, ya jkʼanbeyex wokol te yakuk atsajtay* abaik ta stojol te machʼatik ya yakʼ axat abaik sok te ya yakʼ akʼojchin abaik ta swenta te ya skontrainik te nojptesel awichʼojike, mame xa ajokinik.
18 Te machʼatik jich ya spasik ini ma jaʼuk j-abatetik yuʼun te Kajwaltik Cristo, jaʼnax ya spasik te bin ya skʼan yoʼtanike, ya stuuntesik tʼujbil kʼopetik sok ya x-utsilkʼoptaywanik yuʼun jich ya sloʼlaybey yoʼtanik te machʼatik ya xjuʼ ta loʼlayel ya yilike.
19 Pujkemix akʼoplalik ta bayuk te ya achʼuunik mantal te jaʼexe, ta swenta-abi tseʼel koʼtan ta atojolik. Pero ya jkʼan te jaʼuk ay spʼijil awoʼtanik ta spasel te bin leke, te manchuk jaʼuk ay apʼijilik ta spasel te bin chopole.*
20 Te Dios te ya yakʼ lamalkʼinal nopolme* ya yakʼbeyex atsʼoʼik* ta tekʼel te Satanás. Ayukme ta atojolik te slekil yoʼtan te Kajwaltik Jesús te ma snujpʼuk ya kichʼtike.
21 Ya stikunbeyex tal spatjibal awoʼtanik-euk te Timoteo, te joy jba ta aʼtel soke. Jaʼnix jich ya stikunbeyex tal spatjibal awoʼtanik te Lucio, te Jasón sok te Sosípatro te ay bin kut-tiklanoj jba soke.
22 Joʼon, te Tercio, te la jtsʼibay te carta ini, ya jtikunbeyex spatjibal awoʼtanik ta stojol te Kajwaltike.
23 Ya stikunbeyex tal spatjibal awoʼtanik te Gayo, jaʼ te machʼa yakʼojbon ta majanel te sna sok te teynix ya stsob sba-a te congregación. Jaʼnix jich ya stikunbeyex tal spatjibal awoʼtanik te Erasto, te tesorero yuʼun te lume, soknix te yijtsʼin* te Cuarto sbiile.
24 *
25 Te Dios ya xjuʼ ya yakʼbeyex yip awoʼtanik ta swenta te lek yachʼil kʼop te ya kalbey skʼoplale sok ta swenta te scholbeyel skʼoplal te Jesucristo, jaʼ te bin la yakʼix ta naʼel te Dios te ayix tal bayal jaʼbil te maba yakʼoj ta naʼel-ae;
26 pero ta ora ini la yakʼbotikix kiltik sok la yakʼbotikix jnaʼtik te bin la stsʼibayik jilel ta sJun Dios te j-alwanejetike, te Dios kuʼuntik te stalel ay ta sbajtelkʼinal la yal ta mantal te akʼa yichʼ naʼel ta yolil te nacionetik yuʼun jich ya schʼuunik mantal ta swenta te schʼuunel yoʼtanik,
27 te Dios te ay spʼijil yoʼtan stukele, akʼa yichʼ albeyel yutsil skʼoplal ta sbajtelkʼinal ta swenta te Jesucristo. Jichuk.
Notaetik
^ O «Priscila».
^ O «smeʼ», «smama».
^ Ta griego kʼop ma xyal teme yijtsʼin o swix.
^ O «bujtsʼia». Te jchʼuunjeletik ya yujtsʼuy sbaik ta schoik te kʼalal ya spatbey sba yoʼtanik-ae.
^ O «awil».
^ O «ma leke».
^ O «tijilme».
^ O «apechʼik».
^ Ta griego kʼop ma xyal teme yijtsʼin o sbankil.
^ Manchukme ya xchiknaj ta cheʼoxeb Bibliaetik te versículo ini, maba ya xchiknaj ta antiguo junetik te ayik ta griego kʼop te naʼbilik sba ta leke.
