Carta ta stojol te Romanoetik 2:1-29
2 Jich yuʼun, teme ay machʼa ya alebey smule, chikan machʼaat-a, maʼyuk bin ya xjuʼ ya amak aba ta kʼop yuʼun te jich ya apase. Melel, te kʼalal ya alebey smul te yane, jaʼatnix yakat ta sleel castigo ta atojol, te mulil te yakat ta yalel ta stojol te yane jaʼnix te bin yakat ta spasel-euke.
2 Jnaʼojtik te kʼalal ya x-ichʼawan ta kʼop te Diose, jaʼ ya yichʼ ta wenta te bin smelelile sok ya yakʼbey castigo te machʼatik jich ya spasike.
3 Pero, te mulil te yakat ta yalel ta stojol te yan te jichnix yakat ta spasel-euke, ¿yuʼunbal ya akuy te maba ya yakʼbat castigo te Diose?
4 ¿Yuʼunbal ya apʼaj te yakʼojbat awil bayal slekil yoʼtan te Dios, te ma x-ilin ta ora sok te ya snaʼ maliywaneje? ¿Yuʼunbal ma xa anaʼ te jaʼ ta swenta slekil yoʼtan Dios te ya skʼan te ya asujtes awoʼtane?
5 Pero, ta skaj te tonoben awoʼtan sok te ma xa akʼan ya asujtes awoʼtane, jaʼatnix yakat ta stsobel castigo ta atojol ta skʼajkʼalel yilinba te Diose sok te kʼalal ya xchiknaj te tojil chajpanel yuʼune.
6 Jaʼme ya yakʼbey stoj ta jujuntul jaʼ chikan te bin yilel te yaʼtele.
7 Yame x-akʼbot skuxlejalik sbajtelkʼinal te machʼatik yaʼtelinojik spasel te bin leke, te ya sleik mukʼ yaʼtelik, ichʼel ta mukʼ sok te bin ma xkʼaʼe;
8 yan stukel te machʼatik ya sjachik kʼop sok te ma schʼuunik spasel te smelelil kʼop soknix te ya spasik te bin ma stojiluke yame yilik te yilinba te Diose sok te skʼajkʼal yoʼtane.
9 Yame yaʼiybeyik swokolil sok skʼuxul spisil te machʼatik ya spasik te bin chopole,* jaʼ nail ta stojol te judioetik, jaʼnix jich ta stojol-euk te griegoetik.
10 Pero, spisil te machʼatik ya spasik te bin leke ya sta mukʼ yaʼtelik, ichʼel ta mukʼ sok lamalkʼinal, jaʼ nail ta stojol te judioetik, jaʼnix jich ta stojol-euk te griegoetik.
11 Melel, maʼyuk machʼa tsabilnax yuʼun te Diose.
12 Jich yuʼun, spisil te machʼatik ma la snaʼbeyik sba te ley te kʼalal la sle smulike, maʼyuk ley ta stojolik te kʼalal ya xlajik baele, pero spisil te machʼatik la snaʼbeyik sba te ley te kʼalal la sle smulike yame yichʼik ichʼel ta kʼop jaʼ chikan te bin ya yal te leye.
13 Melel, ma jaʼuk toj ya x-ilotik yuʼun Dios te machʼatik ya yaʼiyik stojol te ley, jaʼ toj ya yichʼik ilel te machʼatik ya schʼuunik spasel te bin ya yal te leye.
14 Melel, te jyanlumetik te maʼyuk yuʼunik te leye jich stalel ay ta yoʼtanik te ya skʼotesik ta pasel te bin ya yal te leye, manchukme maʼyuk ley yuʼunik, jaʼiknix ley kʼoemik.
15 Jaʼiknix ya yakʼik ta ilel te tsʼibaybil ta yoʼtanik te bin ya yal te leye sok jaʼnix ya x-albotik yuʼun te yoʼtanik teme lek o ma lek te bin la spasike, jaʼnix jich ya x-albotik yuʼun te snopojibal yuʼunik teme ay smul ya yaʼiy sbaik o maʼyuk.
16 Jaʼ ini yame xkʼot ta pasel ta yorail te kʼalal ya x-ichʼawan ta kʼop te Dios ta swenta te Cristo Jesús te bintik muken spasoj te ants winiketike, jich te bin-utʼil ya yal te lek yachʼil kʼop te ya jpuk ta alele.
17 Jich yuʼun, teme jaʼat ya awal te judioat sok te awichʼoj ta mukʼ te ley sok te mukʼ akʼoplal ya akuy aba te bitʼil achʼuunoj te Diose,
18 teme ya anaʼ bin-a te skʼanojel yoʼtan sok te ya ana’ stsajtayel* te bin lek ta pasel ta skaj te awichʼoj nojptesel yuʼun te bin ya yal te Leye,
19 teme schʼuunoj awoʼtan te jaʼat jtojobteswanejat yuʼun te machʼatik ma xyilik kʼinal, te sakal kʼinalat ta stojol te machʼatik ayik ta ijkʼal kʼinal,
20 teme jnojpteswanejat yuʼun te machʼatik maʼyuk spʼijilik sok maestroat yuʼun te alaletik sok teme kʼoem ta awoʼtan te bin-utʼil cholanbil te Ley sok te bin smelelil ya yale...,
21 jich yuʼun, jaʼat te ya anojptes te yantik, ¿mabal jaʼuk lek te jaʼ nail ya anojptes abae? Jaʼat te ya awal «Mame x-elkʼajat», pero ¿ya x-elkʼajat?
22 Jaʼat te ya awal «Mame xa awaʼiy antsiwej sok mame xa awakʼ aba ta antsinel», pero ¿ya awaʼiy antsiwej sok ya awakʼ aba ta antsinel? Jaʼat te ya awilay te lokʼombaetik, pero ¿ya awelkʼan te bintik ay ta temploetik?
23 Jaʼat te ya atoy aba yuʼun te awichʼoj te ley, pero maba ya awichʼ ta mukʼ te Dios te kʼalal ya akʼaxuntay te bin ya yal te Ley.
24 Ta melel, yuʼun-nix jich tsʼibaybil-a, «jaʼex ta awentaik te yak ta bolkʼoptayel te sbiil te Dios ta yolil te nacionetik».
25 Ta melel, jaʼnax ay skʼoplal ya xkʼot te circuncisión* teme ya achʼuun spasel te bin ya yal te ley. Pero, teme ya akʼaxuntay te ley, maba circuncisión kʼoem te circuncisión awichʼoje.
26 Jich yuʼun, teme ay jtul winik te maba yichʼoj circuncisión* te ya schʼuun spasel te bin ya yal te Ley, ¿mabal yichʼojuk circuncisión kʼoem-abi?
27 Te winik te maba yichʼoj circuncisión* ta sbakʼetal, ta swenta te ya spas te bin ya yal te Ley, yame yichʼat ta kʼop ta swenta te ya akʼaxuntay te ley, manchukme awichʼoj te ley te tsʼibaybil sok te awichʼoj circuncisione.
28 Te judío ma jaʼuk te machʼa mero chʼichʼbakʼet sok ma jaʼuk circuncisión* te machʼa yichʼoj mero circuncisión ta sbakʼetal.
29 Jaʼ mero judío te machʼa jich ya yaʼiy sba ta yoʼtan sok ta yoʼtan yichʼoj te circuncisión* ta swenta te chʼul espíritu,* ma jaʼuk ta swenta te bin tsʼibaybile. Te machʼa jich-abi jaʼ ya x-albot yutsil skʼoplal yuʼun te Diose, ma jaʼuk te ants winiketike.
