Carta ta stojol te Romanoetik 3:1-31
3 Jich yuʼun, ¿bin ya xlokʼ yuʼun-a te machʼa judioe? ¿Bin ya xlokʼ-a te circuncisione?*
2 Bayal bin lek ya xlokʼ-a. Ta sbabial, te judioetik jaʼ la yichʼik akʼbeyel ta stojolik te schʼul kʼop te Diose.
3 Jich yuʼun, ¿bin la apasik jiche? Teme ay machʼatik chʼay schʼuunel yoʼtanike, ¿yuʼunbal ya skʼan ya yal te maba ya skʼotes ta pasel Dios spisil te bin yaloj ta skaj te ay machʼa chʼay schʼuunel yoʼtane?
4 ¡Ma jichuk stukel-abi! Te Dios spisil-ora ya yal te bin smelelil, manchukme ya spasik lot spisil te ants winiketike, jich te bin-utʼil tsʼibaybile: «Ta swenta te bintik ya awale ya xchiknaj ta ilel te tojat sok ya awaʼiy tsalaw te kʼalal yakat ta ichʼel ta kʼop», te xchie.
5 Teme ta swenta te bin ma tojuk ya jpastik jich ya xchiknajxan ta ilel te bin stojil ya spas stukel te Diose, ¿bin ya kaltik yuʼun? ¿Yuʼunbal ma stojiluk te bin ya spas te Dios te kʼalal ya yakʼ ta ilel te yilinba ta jtojoltike? (Ta skʼop ants winiketik yakon ta kʼop).*
6 ¡Ma jichuk stukel-abi! Te yuʼunuk ma stojiluk te bin ya spase, ¿bin-utʼil ya yichʼ ta kʼop te ants winiketik ta balumilal te jichuke?
7 Pero, teme ta swenta te ya jpas lot, jich ya xchiknajxan ta ilel te smelelil te bin ya yal stukel te Dios yuʼun jich ya yichʼ albeyel yutsil skʼoplal, ¿bin yuʼun-nix-a jiche te ya kichʼ ichʼel ta kʼop jich bitʼil jmulawil?
8 ¿Bin yuʼun te ma jichuk ya kaltik: «Akʼa jpastik te bintik chopol* swenta jich ya xtal te bintik lek», jich te bin-utʼil ay machʼatik ya sle jmultik te jich ya kaltike? Stojil te castigo ya yichʼik te machʼatik jich ya yalik ta jtojoltike.
9 ¿Bin-utʼil ay-a jiche? ¿Yuʼunbal jaʼ mukʼxan jkʼoplaltik te bitʼil judiootike? ¡Ma jichuk stukel-abi! Jich te bin-utʼil kalojtikix ta jamal, jpisiltik ayotik ta mulil, chikan teme judiootik o griegootik.
10 Jich te bin-utʼil tsʼibaybil: «Maʼyuk jtuluk ants winik te toj ta kʼinal, ni jtuluk;
11 maʼyuk machʼa ay spʼijil yoʼtan; maʼyuk machʼa ya sle te Diose.
12 Spisil jowijemik ta be, pajal ma xtuunik; maʼyuk machʼa ya yakʼ ta ilel slekil yoʼtan, ni jtuluk».
13 «Te sbe snukʼik jaʼ jich bin-utʼil mukenal te jamal stiʼile; ya xloʼlaywanik sok te skʼopike». «Ta stiʼil yeik ay svenenoil jtiʼawal chan».
14 «Te yeike nojel ta bolkʼop sok ta bin chʼa».
15 «Te yokik animalnax ya xbajt smalik chʼichʼ».
16 «Ay jinel sok wokolil ta beetik yuʼunik,
17 sok ma snaʼojbeyik sba te sbelal te lamalkʼinal».
18 «Maba ya xiʼik* te Diose».
19 Jich yuʼun jnaʼojtik te spisil te bin ya yal te Ley jaʼ yuʼun te machʼa wentainbilik yuʼun te Ley, jich maʼyuk machʼa ya smak sba ta kʼop-a sok spisil te ants winiketik jaʼnix ay ta swentaik te castigo ya yichʼik akʼbeyel yuʼun te Diose.
20 Jich yuʼun, maʼyuk machʼa toj ya yichʼ ilel yuʼun Dios ta swenta te ya schʼuun spasel te bin ya yal te leye, melel ta swenta te ley jnaʼojtik ta lek bin-a te mulile.
21 Pero, ta ora ini ma jaʼukix ta swenta te ley te toj ya xjuʼ ya yilotik te Diose, jich bitʼil ya yal te Ley sok te J-alwanejetike.
22 Jich, toj ya xjuʼ ya yilotik te Dios ta swenta te schʼuunel koʼtantik ta stojol te Jesucristo sok spisil te machʼatik ya yakʼ schʼuunel yoʼtanik ta stojole. Melel jpisiltik pajalotik.
23 Melel jpisiltik jmulawilotik sok maba ya jtabeytik yutsilal te Diose.
24 Ta swenta te slekil yoʼtan Dios te ma snujpʼuk ya kichʼtik jaʼ jun majtanil te toj ya xjuʼ ya yilotik te Dios ta swenta te la stojix jmultik te Cristo Jesús.
25 Te Dios la sjam te be yuʼun lek ya kil jbatik sok* ta swenta teme ya schʼuun koʼtantik te la smal schʼichʼel ta jtojoltik te Jesús. Jich la spas te Dios yuʼun ya yakʼ ta ilel te stojil te bin ya spase. Melel kujch yuʼun sok la spasbey perdón te smul te ants winiketik ta nameye.
26 Jich la spas te Dios yuʼun ya yakʼ ta ilel te stojil te bin ya spas ta ora ini, yuʼun jich toj ya yil te machʼa ya yakʼ schʼuunel yoʼtan ta stojol te Jesús.
27 Jich yuʼun, ¿aybal bin ya xjuʼ ya jtoy jbatik yuʼun? Maʼyuk. ¿Yabal xjuʼ ya jtoy jbatik yuʼun te ya jchʼuuntik spasel te bin ya yal te leye? Maʼuk, jaʼnax teme ya jchʼuuntik te ley yuʼun te schʼuunel oʼtanil ta stojol te Diose.
28 Jich ya kaltik, melel toj ya yichʼ ilel yuʼun Dios jtul ants winik ta swenta te schʼuunel yoʼtan, ma jaʼuk ta swenta te ya schʼuun spasel te bin ya yal te ley.
29 Te Diose, ¿jaʼnaxbal Dios yuʼun te judioetike? ¿Mabal jaʼuk Dios yuʼunik-euk te jyanlumetike? Jaʼ, jaʼnix Dios yuʼunik-euk te jyanlumetike.
30 Jich bitʼil jtulnax te Diose, jaʼme ya yal te toj ya xkʼotik ta swenta schʼuunel yoʼtanik te machʼatik yichʼojik circuncisión* sok te machʼatik maba yichʼojik circuncisión.
31 Jich yuʼun, ¿yabal jtupʼbeytik skʼoplal te ley ta swenta te schʼuunel koʼtantike? ¡Maʼuk! Jich ya kakʼbeytikxan yip te bin ya yal te leye.
