Rut 1:1-22
1 Ta yorail te ya xchajpanwanik te juecetik, tal tulan wiʼnal ta kʼinal. Jtul winik te jaʼ slumal Belén ta skʼinal Judá bajt ta nainel ta skʼinal Moab sok te yinam soknix te chaʼtul snichʼnab, tey nainik jich bitʼil jyanlumetik.
2 Te winike Elimélec* sbiil, te yiname jaʼ Noemí,* te chaʼtul snichʼnab jaʼ Mahlón* sok Kilión.* Jaʼ slumalik te Efrata ta Belén ta skʼinal Judá. Kʼotik ta skʼinal Moab, tey nainik-a.
3 Te kʼalal kʼax bael te tiempoe, laj te Elimélec. Jich stukel jil te Noemí sok te chaʼtul yalatak.
4 Ta patil bael, te chaʼtul keremetik nujpunik sok moabitaetik, te jtule Orpá sbiil, te yane Rut. Ayniwan lajuneb jaʼbil nainik tey-a.
5 Laj-euk te Mahlón sok te Kilión, jich te Noemí maʼyukix jil yalatak sok smamalal.
6 Te kʼalal ayikto ta Moab-a, te Noemí la yaʼiy stojol bitʼil te Jehová yak ta skoltayel sok yak ta yakʼbeyel sweʼel te lum yuʼune, jich yuʼun sujt bael ta slumal sok te yalibtake.
7 Te Noemí sok te chaʼtul yalibtak la yijkitayik te banti yakik ta nainel-ae. Te kʼalal yakik ta bael ta skʼinal Judá,
8 te Noemí jich la yalbey te yalibtak: «Baanik, jaʼ lek te ya sujtex bael ta sna te ananike.* Akʼa yakʼbeyex awilik te Jehová te skʼuxul yoʼtan te ma x-ijkitaywan, jich bitʼil la awakʼbonik kil sok la awakʼbeyik yil-euk te kalatake.
9 Te Jehová akʼa yakʼbeyex amamalalik sok te banti ya xjuʼ ya xnainex». Ta patil la yujtsʼuy* ta jujuntul, jich bayal jajchik ta okʼel te yalibtake.
10 Jich la yalik: «Maʼuk, maba ya sujtotik. Ya jokinatkotik bael sok ya xnainotik tey ta alumale».
11 Pero, te Noemí jich la yaltiklanbey: «Sujtanik bael, kantsil alatak, ¿bin yuʼun te ya ajokinonik bael? ¿Yuʼunbal yato jta kalatak te ya xnujpunex sok?
12 Sujtanik bael, kantsil alatak, baanik, melel kʼax meʼelonix te ma xjuʼ ya xnujpunonixe. Te ayuk bitʼil ya xnujpunon ta ajkʼabal ini sok te ya jta kalatak,
13 ¿yuʼunbal yato amaliyik te ya xmukʼubik yuʼun ya xnujpunex sok? ¿Yuʼunbal maba ya xnujpunex te jayeb kʼajkʼal ya xkʼaxe? Ma jichuk, kantsil alatak. Kʼalal ya jnop ta koʼtan te ayex ta wokol ta skaj te skontrainojon te Jehová, jkʼaxel ma lek ya kaʼiy jba yuʼun».
14 Jich bayal chaʼjajchik ta okʼel. Ta patil, te Orpá la yujtsʼuy* te yalib meʼel* sok sujt bael, pero te Rut maba la skʼan la yijkitay jilel stukel.
15 Te Noemí jich la yalbey: «Ilawil, te ajoy ta antsil sujtix bael ta slumal sok ta stojol te diosetik yuʼun. Baan sok».
16 Pero, te Rut jich la yal: «Ma xa awalbon te ya kijkitayat sok te ya jpijtesat, melel te banti ya xbaat tey ya xboon-a, te banti ya xnainat tey ya xnainon-a. Te alumal jaʼ jlumal ya xkʼot, te Dios awuʼun jaʼ Dios kuʼun ya xkʼot.
17 Te banti ya xlajat tey ya xlajon-a sok tey ya kichʼ mukel-a. Akʼa yakʼbon tulan castigo te Jehová teme ya kijkitayat teme ma jaʼuk ta swenta te lajele».
18 Kʼalal te Noemí la yil te yakʼoj ta yoʼtan te Rut te mananix ya x-ijkitayot yuʼun-ae, maʼyuk bin la yalbeyix.
19 Ta schebalik jajchikxan ta beel, bajtik ta Belén. Jaʼnax te kʼalal kʼotike, spisil te lum jajchik ta kʼop, jich yakik ta yalel te antsetike: «¿Jaʼnixbal-a te Noemí?».
20 Jich la yaltiklanbey: «Ma xa awalbonikix Noemí. Jaʼ lek albonik Mara,* melel te Machʼa spisil ya xjuʼ yuʼun yakʼojbon bayal jwokol.
21 Spisil ay kuʼun-a te kʼalal boone, pero jochol jkʼab sujton tal yuʼun te Jehová. ¿Bin yuʼun ya awalbonik Noemí? Melel skontrainojon te Jehová. Te Machʼa spisil ya xjuʼ yuʼun yakʼojbon bayal jwokol».
22 Jaʼ jich te bitʼil lokʼ tal ta skʼinal Moab te Noemí sok te Rut, te yalib te jaʼ moabita. Te kʼalal kʼotik ta Belén, jaʼ yorail-a te ya xjajch stsobik te cebadae.
Notaetik
^ Te ya skʼan ya yal «jaʼ ajwalil te Dios kuʼun».
^ Te ya skʼan ya yal «lek koʼtan yuʼun».
^ Talemniwan ta hebreo kʼop te ya skʼan ya yal «te ya xlaj yip» o «te ya stsakot ta chamel».
^ Te ya skʼan ya yal «te machʼa ya xyal» o «te machʼa ya xlaj».
^ Ta yantik variante «ameʼike», «amamaike».
^ Ta yantik variante «sbujtsʼi».
^ Ta yantik variante «sbujtsʼi».
^ Ta yantik variante «smeʼ alib».
^ Te ya skʼan ya yal «chʼa».
