Rut 2:1-23
2 Te Elimélec, te smamalal te Noemí, ay jtul sfamilia te Boaz sbiil te jaʼ jtul jkʼulej winik.
2 Te Rut, te moabita, jich la yalbey te Noemí: «Akʼawon bael ta stamel* te cebada te yak ta jilel yuʼun te j-aʼteletike». Jich albot yuʼun te Noemí: «Baan, kantsil-al».
3 Jich bajt te Rut, jajch stam* te bin yak ta jilel yuʼun te j-aʼteletike. Kʼot ta skʼinal te Boaz te jaʼ sfamilia te Elimélec.
4 Jaʼ yorail-a te lokʼ tal ta Belén te Boaz, kʼot ta skʼinal te banti ay te j-aʼteletik yuʼun, jich la yaltiklanbey: «Akʼa sjokinex te Jehová». Jich albot yuʼun te j-aʼteletik: «Akʼa yakʼbat bendición te Jehová».
5 Tey-abi, te Boaz jich la sjojkʼoybey te machʼa swentainoj te j-aʼteletik: «¿Banti talem te achʼix ini?».
6 Jich la yal te machʼa swentainoj te j-aʼteletik: «Jaʼ jtul moabita te sjokinoj tal te Noemí te tal ta skʼinal Moab.
7 Jich la yalbon: ‹Awokoluk, ¿yabal xjuʼ ya jtam* bael te cebada te yak ta jilel yuʼun te j-aʼteletike?›. Jaʼto te kʼalal jul ta sabe maba skomoj sba ta aʼtel, jaʼtonax ta ora ini te bajt skux yoʼtan ta axibal na».
8 Ta patil, te Rut jich albot yuʼun te Boaz: «Aʼiya awaʼiy, kantsil nichʼan. Mame xbaat ta stamel* te cebada ta yan kʼinal, jilan liʼi. Jokina jilel te j-aʼtel antsetik kuʼune.
9 Ilawil te banti yakik ta aʼtele, jokina bael. La kalbeyix ta mantal te keremetik te manchuk ya yutsʼinate.* Te kʼalal ya awaʼiy takin tiʼil, baan te banti ay te yawil jaʼ sok uchʼa te jaʼ te ya slokʼesik te keremetike».
10 Te kʼalal jich la yaʼiy stojol te Rut, la skejan sba sok la snijan sba, jich la sjojkʼoybey: «¿Bin-utʼil ay-a te lek ya awilone? ¿Bin yuʼun te ay jkʼoplal ta awoʼtan te bitʼil yan jlumale?».
11 Jich la yal te Boaz: «La yalbonik spisil te bin apasoj ta stojol te awalib meʼel* jaʼto tal te kʼalal laj te amamalale, sok te la awijkitay jilel te ameʼ atat sok alumal te talat ta nainel ta jpam lum te maba ya anaʼbey sbae.
12 Akʼa stojat te Jehová ta swenta te bin apasoj. Akʼa smajtantesat ta lek te Jehová te Dios yuʼun Israel, melel awakʼoj aba ta yeʼtal xikʼ».
13 Jich la yal te Rut: «Kajwal, ya jkʼan te lekuk ya awilon, melel te bitʼil awabaton awakʼojbon smukʼul koʼtan sok awakʼojbon slamalil koʼtan ta swenta te bintik la awalbone, manchukme maba j-aʼtelon awuʼun».
14 Te kʼalal la sta yorail te weʼele, te Boaz jich la yalbey te Rut: «Laʼ liʼi. Tsaka jxejtʼuk pan, mula ta pajal vino». Jich bajt snajkan sba te Rut te banti ay te j-aʼteletike. Te Boaz la yakʼbey chʼilbil cebada, jich weʼ jaʼto te kʼalal noj schʼujt sok ayto jil yuʼun.
15 Kʼalal te Rut bajt stam* te cebada, te Boaz jich la yalbey ta mantal te j-aʼteletik yuʼun: «Akʼbeya stam-euk te banti bojtiklanbilix awuʼunik. Mame xa awutsʼinik.*
16 Jaʼnix jich lokʼesaik jtebuk te banti tomtiklanbilix* awuʼunik yuʼun jich ya stam* bael sok mame xa akomik».
17 Te Rut maba la skom sba ta stamel* te cebada jaʼto ta mal kʼajkʼal. Te kʼalal laj yoʼtan ta smajel ta teʼ te jayeb cebada stamoj-ae, ayniwan junuk efá* cebada lokʼ yuʼun.
18 Jich bajt ta mukʼul lum, la yichʼ bael te cebada te stamoj-ae,* kʼot yakʼbey yil te yalib meʼel* te jayeb la stam tale. Jaʼnix jich la slokʼes sok la yakʼbey te weʼelil jil yuʼun te kʼalal weʼe.
19 Jich jojkʼoybot yuʼun te yalib meʼel:* «¿Banti la atam* te cebada te naxe? ¿Banti aʼtejat? Akʼa akʼbotuk bendición yuʼun Dios te machʼa la yakʼ ta ilel slekil yoʼtan ta atojole». Jich te Rut jajch scholbey yaʼiy te machʼa aʼtej soke. La yalbey te Boaz sbiil te winik te aʼtej sok.
20 Kʼalal la yaʼiy stojol te Noemí, jich la yal: «Akʼa akʼbotuk bendición yuʼun te Jehová te ya yakʼ ta ilel skʼuxul yoʼtan te ma x-ijkitaywan ta stojol te machʼatik kuxulik sok te machʼatik lajemike». Sok jich la yalxan: «Te winik-abi jaʼ jfamiliatik. Jaʼ jtul te machʼa ay ta swenta skoltaybelotik».*
21 Jich la scholxan te Rut, te moabita-ants: «Jaʼnix jich la yalbon: ‹Jokina jilel te j-aʼteletik kuʼun jaʼto te kʼalal ya xlaj yoʼtanik ta stsobel spisil te sit awal tsʼunubile›».
22 Te Noemí jich la yalbey te yalib: «Jichnix-a, kantsil-al. Jaʼ lekxan te ya ajokin te j-aʼtel antsetik yuʼune, jich maba ya awichʼ utsʼinel* ta yan kʼinal».
23 Te jayebxan kʼajkʼal jalajik ta stsobel te cebada sok trigo te j-aʼtel antsetik yuʼun te Boaz, tey kʼot-euk-a te Rut ta stamel te sit awal tsʼunubile.* La sjokinxan ta nainel te yalib meʼele.*
Notaetik
^ Ta yantik variante «yilbajinate».
^ Ta yantik variante «ameʼ alib».
^ Ta yantik variante «awilbajinik».
^ Ta yantik variante «yomtiklanbilix».
^ Jaʼniwan 22 litro. Ilawil ta apéndice, B14.
^ Ta yantik variante «smeʼ alib».
^ Ta yantik variante «smeʼ alib».
^ Ta yantik variante «ilbajinel».
^ Ta yantik variante «smeʼ alibe».
