Rut 3:1-18
3 Te Noemí te yalib meʼel* te Rut jich la yal: «Kantsil-al, ya skʼan ya jlebat te banti ya xjuʼ ya xnainat yuʼun lek ya xkuxinat.
2 ¿Mabal jichuk te jaʼ jfamiliatik te Boaze? Te j-aʼtel antsetike jaʼ j-abatetik yuʼun. ¿Yabal anaʼ? Ta ajkʼabal ini te Boaz ya xbajt te banti ya yichʼ majel te sit awal tsʼunubil yuʼun ya yikʼuy te cebadae.
3 Jaʼ yuʼun atinan* sok akʼbeya aba perfume; lapa te lekil akʼuʼ sok baan te banti ya yichʼ majel te sit awal tsʼunubil, pero mame xa awakʼ aba ta ilel yuʼun te Boaz jaʼto te kʼalal lajix yoʼtan ta weʼel-ae.
4 Te kʼalal ya xbajt ta wayele, ilawil te banti ya smejtsʼan sbae. ¡Baan tey-a, jolbeya te yok sok mejtsʼana aba tey-a! Jaʼme ya yalbat te bin ya skʼan ya apase».
5 Jich la yal te Rut: «Ya jpas spisil te bin ya awalbone».
6 Jich bajt te banti ya yichʼ majel te sit awal tsʼunubil, la spas spisil te bin albot ta mantal yuʼun te yalib meʼel.*
7 Te Boaz laj yoʼtan ta weʼel uchʼel, sok tseʼelnax yoʼtan, tey-abi bajt smejtsʼan sba ta stiʼil te banti busul te sit awal tsʼunubile. Ta patil, te Rut muken noptsaj* bael, la sjolbey te yok sok la smejtsʼan sba tey-a.
8 Ta olil ajkʼabal la yaʼiy sik te Boaz, jich yuʼun la snajkan sba, tey la yil-a te ay jtul ants te metsel ta yoke.
9 Jich la sjojkʼoy: «¿Machʼaat-a?». Jich la yal: «Joʼon Rut te j-abat awuʼun. Lima te anajtil kʼuʼ ta stojol te j-abat awuʼun, melel jaʼat te machʼa ya xjuʼ ya akoltayonkotike».*
10 Jich albot yuʼun te Boaz: «Akʼa yakʼbat bendición te Jehová, kantsil nichʼan. Kʼax bayal te skʼuxul awoʼtan te ma x-ijkitaywan ya awakʼ ta ilel ta ora ini te bitʼil ta nail, melel maba la ale jtul kerem chikan teme pobre o jkʼulej.
11 Jaʼ yuʼun, kantsil nichʼan, mame xiwat, ya jpas spisil te bin la awale, melel spisil te ants winiketik snaʼojik te kʼax lek atalele.
12 Manchukme joʼon ya xjuʼ ya xkoltaywanon* ay yan te jaʼ mero afamiliaxan-a te bitʼil te joʼone.
13 Kʼaxuk awuʼun liʼi te ajkʼabale. Teme ta sakubel kʼinal jaʼ ya skʼan ya skoltayat, kʼax lek, akʼa skoltayat. Pero jamal ya kalbat ta stojol Jehová te kuxul Diose, teme ma skʼan ya skoltayate, joʼon-nix ya jkoltayat. Jaʼ yuʼun, kuxa awoʼtan liʼi jaʼto te kʼalal ya sakub te kʼinale».
14 Jaʼ yuʼun, te Rut wayal jil ta yok te Boaz jaʼto ta yan kʼajkʼal, sok jajch bael kʼalal mato sakub-a te kʼinal swenta maʼyuk machʼa ya x-ilot yuʼun-a. Jich la yal te Boaz: «Mame ayuk machʼa ya snaʼ te xtaluk jtul ants liʼ te banti ya yichʼ majel te sit awal tsʼunubil».
15 Jich la yalxan: «Ichʼa tal te anajtil kʼuʼ awichʼoje. Lima sok tsaka ta lek». Kʼalal slimoj-ae, te Boaz la yakʼbey wakpʼis* cebada. Patil la slikbey moel yuʼun ya yakʼbey skuch, jich bajt ta mukʼul lum te Rute.
16 Kʼalal kʼot ta sna te yalib meʼele,* jich jojkʼoybot yuʼun: «¿Bin la yalbat, kantsil-al?». Te Rut jajch scholbey spisil te bin albot yuʼun te Boaz.
17 Jich la yalxan: «La yakʼbon te wakpʼis* cebada ini, sok jich la yalbon ‹Mame jocholuk akʼab ya xkʼoat ta sna te awalib meʼele›».*
18 Jich la yal te Noemí: «Kantsil-al, maliya te bin ya xkʼot ta pasel, melel maba ya skux yoʼtan ta kʼajkʼal ini jaʼto te kʼalal ya schajpane».
Notaetik
^ Ta yantik variante «smeʼ alib».
^ Ta yantik variante «nuxan».
^ Ta yantik variante «smeʼ alib».
^ Ta yantik variante «jijtsʼaj», «tijtsaj».
^ Jaʼniwan wakeb sea, o jteb ma sta 44 litro. Ilawil ta apéndice, B14.
^ Ta yantik variante «smeʼ alibe».
^ Jaʼniwan wakeb sea, o jteb ma sta 44 litro. Ilawil ta apéndice, B14.
^ Ta yantik variante «ameʼ alibe».
