Rut 4:1-22
4 Te Boaz mo bael ta yochibal te mukʼul lum, tey najkaj-a. Te kʼalal la yil te yak ta kʼaxel te machʼa ay ta swenta yakʼel te koltayel,* jich la yalbey: «Amigo,* laʼ, najkajan liʼi». Jich bajt snajkan sba te winik-abi.
2 Ta patil, te Boaz la yikʼ tal lajuntul mamaletik te ayik ta mukʼul lum, jich la yaltiklanbey: «Najkajanik liʼi». Jich najkajik.
3 Te Boaz jich la yalbey te machʼa ay ta swenta yakʼel te koltayel:* «Te Noemí te la yijkitay jilel te skʼinal Moab ya schon te kʼinal te jaʼ yuʼun-a te Elimélec te jaʼ jfamiliatik.
4 La jnop te ya skʼan ya kalbat skʼoplal ini: ‹Mana te kʼinal ta sit te ants winiketik sok ta stojol te mamaletik yuʼun te mukʼul lum. Teme ya akʼan ya aman, mana. Pero, teme maba ya amane, albon kaʼiy. Melel teme maba ya aman, joʼon ayix ta jwenta smanel-abi›». Jich la yal te machʼa ay ta swenta yakʼel te koltayel:* «Yak, ya jkʼan ya jman».
5 Jaʼ yuʼun, jich la yal te Boaz: «Te kʼalal ya amanbey te skʼinal te Noemí, jaʼnix jich ya skʼan ya amanbey te skʼinal te Rut, te moabita, te jaʼ yinam-a te machʼa lajemix swenta maba ya xtupʼ skʼoplal-a te sbiile».
6 Kʼalal jich la yaʼiy te machʼa ay ta swenta yakʼel te koltayel,* jich la yal: «Ma xjuʼ ya jman, melel ya xjuʼ ya yakʼbon jwokol ta swenta te bintik ayix kuʼune. Jaʼ lek, mana jaʼat, ichʼa te bin ay ta jwenta, melel ma xjuʼ ya jman».
7 Ta yorail-abi, te bin kʼayemik ta spasel ta lum Israel, jaʼ teme ay jtul winik te ya skʼan ya schap skʼop ta swenta te ay bin ya yichʼ chonel sok te ay bin ya yichʼ kʼasesel ya skʼan ya slokʼes junuk step o xanab sok ya yakʼbey te machʼa ya schap skʼop soke. Jaʼ jich te bitʼil ya schap skʼopik ta lum Israel.
8 Jaʼ yuʼun, te machʼa ay ta swenta yakʼel te koltayel* la slokʼes jun step o xanab sok jich la yalbey te Boaz: «Mana jaʼat».
9 Jich yuʼun, te Boaz la yalbey te mamaletik sok te ants winiketik te tey ayik-ae: «Jaʼex testigoex kuʼun ta kʼajkʼal ini te ya jmanbey te Noemí spisil te bintik ay yuʼun-a te Elimélec sok spisil te bintik ay yuʼun-a te Kilión sok te Mahlón.
10 Jaʼnix jich ya kikʼ kinamin te Rut te talem ta Moab, te jaʼ meʼba ants yuʼun te Mahlón yuʼun jich maba ya xtupʼ skʼoplal-a te sbiil sok yuʼun ma xchʼay ta yoʼtanik te yermanotak sok te ants winiketik ta mukʼul lum te sbiile. Jaʼex testigo ya xkʼoex».
11 Spisil te mamaletik sok te machʼatik ayik ta yochibal te mukʼul lume, jich la yalik: «¡Jaʼ testigootik! Te ants te ya x-och ta ana jichuk ya xkʼot yuʼun Jehová te bin-utʼil te Raquel sok te Lea te tey chiknaj-a te lum yuʼun Israel. Akʼa pʼoluk te bintik ay awuʼun ta Efrata sok te lekuk akʼoplal ta Belén.
12 Ta swenta te achʼix ini, akʼa pʼoluk te atsʼumbal te ya yakʼbat te Jehová jich te bin-utʼil te sfamilia te Pérez te jaʼ yal te Tamar te la sta sok te Judá».
13 Jich te Boaz la yikʼ yinamin te Rut sok la sjokin ta wayel. Te Jehová la yakʼ te ya sta jtul skerem-al te Rut.
14 Te antsetik jich la yalbeyik te Noemí: «Akʼa yichʼ albeyel yutsil skʼoplal te Jehová, te la yakʼ te ay machʼa ya skoltayate.* ¡Akʼa yichʼ akʼel ta naʼel te sbiil ta lum Israel!
15 Te alal ini tal smukʼubtesbat kʼinal awaʼiy sok jaʼ ya skanantayat te kʼalal meʼelatix-ae, melel jaʼ yal te awalib te kʼuxat ta yoʼtan sok te jaʼ kʼax lekxan-a te bitʼil juktul awalatake».
16 Te Noemí la yikʼ te alal sok jaʼ la schʼites.
17 Te antsetik te jaʼ spatxujk la yakʼbeyik sbiil te alale, jich la yalik: «Ayin* jtul skerem-al te Noemí». Obed la yakʼbeyik sbiilin. Jaʼ stat kʼot te Jesé, te stat te David.
18 Jaʼik ini te stsʼumbal te Pérez: te snichʼan Pérez jaʼ te Hezrón;
19 te snichʼan Hezrón jaʼ te Ram; te snichʼan Ram jaʼ te Aminadab;
20 te snichʼan Aminadab jaʼ te Nahsón; te snichʼan Nahsón jaʼ te Salmón;
21 te snichʼan Salmón jaʼ te Boaz; te snichʼan Boaz jaʼ te Obed;
22 te snichʼan Obed jaʼ te Jesé; te snichʼan Jesé jaʼ te David.
