Carta yuʼun Santiago 1:1-27
-
Spatjibal oʼtanil (1)
-
Te kʼalal ya xkujch kuʼuntik ya yakʼ stseʼelil koʼtantik (2-15)
-
Spisil te lekil majtaniletik talem ta toyol (16-18)
-
Ya skʼan ya kaʼiytik te skʼop Dios sok ya skʼan ya jpastik ta jkuxlejaltik (19-25)
-
Te machʼa ya yil sit yelaw ta espejo (23, 24)
-
-
Te bin-utʼil stojil ta ichʼel ta mukʼ te Dios sok te maba boloben skʼoplale (26, 27)
1 Joʼon Santiagoon, te yabaton te Dios sok te Kajwaltik Jesucristo, ya jtsʼibaybeyex te carta ini, jaʼex te 12 ta chajp stsʼumbal Israel te pujkemex bael ta bayuk:
Ichʼaik spatjibal awoʼtanik.
2 Kermanotak, bayalukme stseʼelil awoʼtanik te kʼalal ya xtal ta atojolik bayal ta chajp pruebaetik,
3 melel anaʼojik teme la yichʼix akʼel ta prueba te schʼuunel awoʼtanik te ay yipe, jaʼ ya skoltayex yuʼun ya xkujch awuʼunik.
4 Teme ya xkujch awuʼunike, jaʼme ya skoltayex yuʼun ayukxan awipik, jich lek ayex sok chapal ya xkʼoex ta spisil, sok te maʼyuk bin ya spasbeyex faltae.
5 Jich yuʼun, teme ay jtul ta awolilik te maʼyuk spʼijil yoʼtan, akʼa skʼanbey Dios ta spisil-ora, jichme ya x-akʼbot yuʼun, melel ma pʼisbiluknax ya yakʼ stukel sok maba ya stabotik ta alel.
6 Pero mame skom sba ta skʼanel sok schʼuunel yoʼtan, sok mame xchebetuk yoʼtan, melel te machʼa xchebet yoʼtan jaʼ jich kʼoem te bin-utʼil sbul mar te bayuknax ya xtenot bael yuʼun te ikʼe.
7 Ta melel, te machʼa jich ya spase mame skuy te ay bin ya yichʼ akʼbeyel yuʼun te Jehová.*
8 Melel xchebet yoʼtan sok ya sjeltiklan te bintik snopoj ya spase.
9 Pero tseʼelukme yoʼtan te hermano te pekʼel yoʼtan ta skaj te la yichʼ toyesbeyel skʼoplale,
10 sok tseʼelukme yoʼtan te jkʼulej ta skaj te la yichʼ pejkʼanbeyel skʼoplale, melel te jkʼulej ya xchʼay bael jich te bin-utʼil te jaʼmal nichimetik.
11 Melel te kʼalal ya xlokʼ tal te kʼajkʼale, ya stakijtes te nichim te skʼuxul te kʼajkʼale; ya xlubaj koel te sniche sok ya xlaj te yutsilale. Jaʼnix jich ya xchʼay bael te jkʼulej te kʼalal yak ta smulanbeyel yutsilal-a te skuxlejale.
12 Tseʼelnaxme yoʼtan te machʼa ya xkujch yuʼun te kʼalal yak ta kʼaxel prueba ta stojole, melel te kʼalal lek ilbilix-ae, yame yichʼ akʼbeyel te corona yuʼun kuxlejalil te jamal yaloj te Jehová* te ya yakʼbey te machʼatik kʼux ya x-aʼiyot yuʼune.
13 Mame ayuk machʼa jich ya yal te kʼalal yak ta kʼaxel ta prueba: «Yak spasbelon ta prueba te Diose». Melel maʼyuk machʼa ya xjuʼ ya spas ta prueba te Dios ta bintik chopol,* jaʼnix jich te Dios maʼyuk machʼa ya spas ta prueba-euk.
14 Melel ta jujuntul ya yichʼ pasel ta prueba jaʼ chikan te bin ya smulan yoʼtan.
15 Jich yuʼun, te kʼalal jajchemix-a te bin chopol* ya skʼan yoʼtane, ya yayintes* te mulile, te kʼalal yichʼojix pasel-a te mulile, ya yayintes te lajele.
16 Kermanotak te kʼuxex ta koʼtan, mame xa aloʼlay abaik.
17 Spisil te bintik lek akʼbilotik sok te lekil majtaniletik talem ta toyol, talem ta stojol te Tatil te la spas te kʼajkʼal, te u sok te ekʼetike. Stalel ay stukel, sok maba ya xyanaj jich te bin-utʼil te axinale.
18 Jaʼ skʼanojel yoʼtan te la yakʼ ayinukotik* ta swenta te smelelil kʼope, yuʼun jich ya xkʼootik te bin-utʼil sba sit awal tsʼunubil ta stojol te ants winiketike.
19 Kermanotak te kʼuxex ta koʼtan, ya jkʼan te yakuk anaʼik ini: chapalukexme apisilik ta yaʼiyel ta ora te bin ya yichʼ alele, pero mame orauknax ya xkʼopojex sok mame orauknax ya x-ilinex,
20 melel te yilinba te ants winik maba ya yakʼ te ya yichʼ pasel te bin stojil ay ta pasel yuʼun te Diose.
21 Jich yuʼun ijkitayaik spisil te bin boloben skʼoplal sok spisil te bintik chopol* ta pasel, sok mansouk awoʼtanik ya awaʼiyik te skʼop Dios te tsʼunbil ta awoʼtanik te ya xjuʼ ya yakʼbeyex akolelike.
22 Pero pasaik te bin ya yal te skʼop Dios, mame jaʼuknax te ya awaʼiyik stojole, te jich ya aloʼlay abaik atukelik ta swenta te snopojibal awuʼunike.
23 Melel teme ay machʼa ya yaʼiy te skʼop Dios, pero maba ya spas, jaʼ pajal kʼoem sok te machʼa ya yil sit yelaw ta espejo:
24 ya yil sba, pero te kʼalal ya xbajt, oranax ya xchʼay ta yoʼtan te bin yilele.
25 Yan stukel te machʼa ya yil ta lek te bin ya yal te lekil ley te ya x-akʼawan ta libre sok te ya yoʼtanin ta yilele maba ya xchʼay ta yoʼtan te bin ya yaʼiy stojole, melel ya spas te aʼtelile; jichme ya sta stseʼelil yoʼtan yuʼun te bin ya spase.
26 Teme ay machʼa ya skuy te yak ta yichʼel ta mukʼ te Diose, pero maba ya skom te yakʼe, stukel yak ta sloʼlayel te yoʼtane, tojolnax te yak ta yichʼel ta mukʼ te Diose.
27 Te bin-utʼil ya skʼan te jTatik Dios te ya kichʼtik ta mukʼ, te stojil sok te maba boloben skʼoplale jaʼ ini: te ya jkoltaytik te meʼba alaletik sok te meʼba antsetik te kʼalal ya xkʼax swokolike sok te yakuk jkanantay jbatik te manchuk ya sbolobtesotik te balumilale.
Notaetik
^ O «ma lek».
^ O «ma lek».
^ O «spʼejkʼajtes», «stojkes».
^ O «pʼejkʼajukotik», «tojkukotik».
^ O jaʼniwan ya skʼan ya yal «te kʼax chopole».
